Eeseekiyeel 32

Eejipiti nì ki-bɔtiu kpiisilaŋŋu

1 Bi nín cúú Isirayeel yab ki cūnnì kuyuŋu abin saalaa nì ali boon, uŋmal saalaa nì uliliiti wimpeekaaŋu dalee ní ti-Dindaan sòon̄ nì mi yii: 2 «Nisaaleen, gāā Eejipiti bɔtiu Faaroo ŋkpiisilan nee yii:

<A bí atimbun kansikin kii digbikintipɔmbilee ní.

Ama a nìn bí kii upɔɔnyaanee ní ki bí tiŋkun.

A nìn yíkí ki dèentí nnyim pu.

A nìn cáá a-taaŋi ki gbàtī nnyim.

A nìn kùtī ibun nyim ki gbàtī-mì.

3 Ti-Dindaan Unimbɔti sòon̄ yii binib tikpil yaa láa kpáfèe, m làá dāá tɔ̄ m-laaŋku a-pu ní an cúú-si ní bí dáaĺ kí nyāntí dimɔɔgbandi. 4 M làá dāá dū-si kí lúkú kitiŋ ní kí dū-si kí tɔ̄ tisatin inoon kɔkɔ ń gbáb́ kí bìin̄ a-pu ní ipeel ń dāan̄ kí ŋmɔ́ a-wunti. 5 M làá dāá dū a-wunti laakin kíǹee kí yàaǹ ajoon pu ní kí yàntī án gbí atantaka. 6 M làá dāá dū a-fatikuu kí yàaǹ kitiŋ pu. An làá dāá bìin̄ ajoon pu kí gbí mbùmbiyaamu. 7 A yaa kaa láa gíti bí dimaŋfalinee, m làá dāá dū tiba kí bìin̄ kutagbɔŋu pu ní iŋmalbijaa ń kpántí dibɔmbɔndi. M làá dū atagban kí bìin̄ ŋwìiń pu ní uŋmal kaa ti làá nīn ŋmíntí. 8 A-puee, m làá yàntī iwalfi in kɔkɔ bí yilpuee ń kpántí dibɔmbɔndi ní kí yàntī kunyeeu ń mɔ́ a-tiŋki pu. Man ni-Dindaan Unimbɔti di sòon̄ míǹ. 9 Anibul tikpil ki kpáaǹ ntimu mun ní a nyée nib yaa láa gbìl̄ m nín yāntì nnaabu ŋun jítì a-pueeyee, bi-pɔbiliŋ làá dāá bīil̀. 10 Sii puee, anibul tikpil làá dāá kɔ́ kunimbaaun. M yaa láa tāntì m-tàataajiki bi-bɔtiibi nimbiinee, bi làá dāá kɔ́ dinyoondin. Ŋwiin ŋun a làá dāá lítée, bi-wunti làá dāá nīn jìkì di sá yii báà ŋma dāa kíǹ ki sūǹ u-ba pu ní.

11 «<Ti-Dindaan Unimbɔti nín sòon̄ puee sɔ̀. Babiloon bɔtiu janjaliibi làá cíliń a-pu. 12 M làá tɔ̄ń bijanjaliibi bin néeń tipɔmbɔti ki jítiǹ báà ŋmee bí kpɔ̀ a-nib cutimaanyi nee. Bi làá nàan̄ Eejipiti ulambidaan ní kí kpɔ̀ kí céetí ki-nib kɔkɔ múb. 13 M làá yàntī tiwaŋkuti tin a cáá Niil mɔɔgbandee kɔkɔ ń kpú. Binib àá tiwaŋkuti taaŋi kaa làá ti tāā kí gbàtī nnyim. 14 M làá yàntī mí ŋùŋfì. Mì làá nīn dɔ̄ ki ŋùŋfī soooo kii ŋkpamee ní. Man ni-Dindaan Unimbɔti di sòon̄ míǹ. 15 M làá yàntī Eejipiti tiŋki ń kpántí kii kuteeuee ní. M làá nyāntí tin kɔkɔ bí ki-poonee ní kí kpɔ̀ kí céetí ki-nib. Niinee bi làá béé yii man di sá ni-Dindaan.>

16 «Atimbun kɔkɔ nimpoobi nín làá dāá gāā Eejipiti tiŋki nì ki-nib kuwaawiiu pu ŋkpiisilan ŋuŋyee dee. Man ni-Dindaan Unimbɔti di sòon̄.»

Anibul ŋin bi jáń ki pɔ́ɔkiǹee yaliŋkii

17 Bi nín cúú Isirayeel yab ki cūnnì kuyuŋu abin saalaa nì ali boon, uŋmal saalaa nì uliliiti iwiin saalku dalee ní ti-Dindaan sòon̄ nì mi yii: 18 «Nisaaleen, yāliŋkì Eejipiti yab kɔkɔ pu. A-yaliŋkii ń kpáaǹ bi nì atimbuŋkpaan ŋin kíǹee kí sìntī ditaŋkpiilin, laakin bin kpíìyee sìntēe. 19 Tùkù-bi yii: A dàkafī yii a sɔ́ǹ bin kíǹee níii? Nín̄ sìntī ditaŋkpiilin kí cùú dòon̄ kí ŋàl̄ bin kaa gíí dikpancandee pu. 20 Di sá yii bi làá kpɔ̀ Eejipiti yab dikɔ̀ndin ní. Ntàataajimu bɔ́ntì kí kpɔ̀ binib. Mú kpɔ̀ Eejipiti yab nì bi-janjakitil kɔkɔ. 21 Ditaŋkpiilinee, bibaatandambi nì bin nìn kútì Eejipiti yab pu bi jáńee làá dāá téeń yii: <Bin ní bi kūū kujaaunee, bi nín sìntī kí cùú dòon̄ kí ŋàl̄ bin kaa gíí dikpancandee pu.>

22 «Asuur bɔtiu nì u-janjakitil bí niin. U-janjaliibi kaakuliŋ māntìi tú-u. Bi kūū bi-kɔkɔ kujaaun ní. 23 Bi-kaakuliŋ bí ditaŋkpiilin taapu taapu ki māntìi tú ubɔti kaakul. Bíǹ bin di nìn yàntī binifoobi kóò dinyoondinee, bi kūū bi-kɔkɔ kujaaun.

24 «Eelam bɔtiu nì u-janjakitil bí niin. U-janjaliibi kaakuliŋ māntìi tú-u. Bi kūū bi-kɔkɔ kujaaun ní. Bíǹ bin kaa gíí dikpancandi ki nìn fàantí binifoobee sīntìń kitiŋ taapu. Kɔŋkɔnnee, bi kútì bin kɔkɔ sīntì ditaŋkpiilinee pu ki tú icoo gbòooo. 25 Eelam bɔtiu nì u-janjakitil dɔ̄ bin bi kūū kujaaunee kansikin. U-janjaliibi kaakuliŋ māntìi tú-u. Bin baa gíí dikpancandi nee kɔkɔee, kujaaun ní bi kūū-bi. Bíǹ puee, binib wunti nìn gbáà ní kpàkpakpa binifoobi tiŋkin. Kɔŋkɔnnee, bi kútì bin kɔkɔ bi kūū kujaaunee pu ki tú icoo gbòooo.

26 «Meeseeki nì Tuubaal bɔtiibi mun bí niin, bi nì bi-janjakitil. Bi-janjaliibi kaakuliŋ māntìi tú-bi. Bin baa gíí dikpancandi nee kɔkɔee, kujaaun ní bi kūū-bi. Bíǹ puee, binib wunti nìn gbáà ní kpàkpakpa binifoobi tiŋkin. 27 Baa síb́-bi cannaaku baatandambi bin nìn fàantí binib binifoobi tiŋkinee cee. Bi nín sìntī ditaŋkpiilin ki ŋúb́ bi-janjawanti. Bi dū bi-tàataajimmu ki kūĺ bi-yiliŋ ní ki dū bi-gbampɔɔŋi ki páaǹ bi-pu. 28 Eejipiti yab, ni mun yuntiŋu bāań dee, ni làá kpú ní bí síb́-ni bin kaa gíí dikpancandi ki kpíì kujaaunee kansikin.

29 «Eedoom yab nì bi-bɔtiibi nì bi-bɔtibiliŋ mun bí niin. Nì min kamaa bi cáá dipɔbilee, bi dū-bi ki kútì bin bi kūū kujaaunee pu. Bi síb́-bi ki kútì bin kaa gíí dikpancandi ki sīntì ditaŋkpiilinee pu.

30 «Ŋgan pú nibuliŋ kpootiliibi mun bí niin, ki kpáaǹ Siidɔn yab bin sīntì ditaŋkpiilinee. Bi nìn sá bibaatandambi ní binib nìn fàŋkí-bi yɔ́kɔ́ yɔkɔ. Ama kɔŋkɔnnee, binib bin baa gíí dikpancandi gbantee kpíì ki cūtìi ŋàl̄ bin bi kūū kujaaunee pu. Bi tú icoo ní gbòooo, bi nì bin kɔkɔ bí ditaŋkpiilinee.

31 «Faaroo yaa láa ká bijanjaliibi gbanti kɔkɔ niinee, án làá dāá ŋméeǹ-u tin bāań u-janjaliibee pu. Di sá yii bi làá kpɔ̀ u nì u-janjaliibi kujaaun. Man ti-Dindaan Unimbɔti di sòon̄. 32 M yāntì Faaroo kɔ́ǹ binib dinyoondi binifoobi tiŋkin. Ama kɔŋkɔnnee, bi làá síb́ úǹ u-ba nì u-janjaliibi binib bin kaa gíí dikpancandi ki kpíì kujaaunee kansikin. Man ni-Dindaan Unimbɔti di sòon̄.»