Eeseekiyeel 6

Bin tòotī awaayee

1 Ti-Dindaan sòon̄ nì mi yii: 2 «Nisaaleen, fàtī a-nimbikpeeŋu kí túĺ Isirayeel jooŋŋi kí sòoǹ m-nyɔɔbundi kí tɔ̄ ŋi-pu. 3 Lì yii: Isirayeel jooŋŋi, pīlifì anyɔɔbun ŋin ti-Dindaan Unimbɔti cáá kí tùkù bin kóò ni-puee nì bin kóò ŋgbantamu pu nì igalin nì atantaka poonee. U bí yii: <Kpèè, m làá cáań kujaau kí tɔ̄ ni-pu ní kí nàan̄ ni-waatootipaaŋyi. 4 Bi làá gbá kí wìil̀ ni-saraafaŋyi nì ni-sambiyaamu mun poon ni tùutī talaalubee. M làá kpɔ̀ ni-kansikin biba kí bíĺ ni-waaŋi gbanti nimbiin. 5 M làá dū Isirayeel yab bin kpíìyee wunti kí bíĺ bi-waaŋi nimbiin ní kí kàfì bi-kpabiŋ kí yàaǹ bi-saraafaŋyi pu kí màntīí tū. 6 Laakin kamaa ni yaa kóòyee, ni-timmu làá kpántí adigbuŋkati ŋma ní ní sāǹ kí fá ni-waatootipaaŋyi. Bi làá gbá kí wìil̀ ni-saraafaŋyi ní iaa ti làá nīn bí tiban. Bi làá nàan̄ ni-waaŋi kí kúntí-ŋi, ní kí gbá kí bɔ̀b̄ ni-sambiyaamu mun poon ni tùutī talaalubee. Bi làá nàan̄ tin kɔkɔ ni pée dū ni-ŋalii ki máń àá ki kpítèe. 7 Ni-kansikin tikpil làá lítí kí kpú. Niinee ní ní béé yii man di sá ni-Dindaan. 8 Nì míǹ kɔkɔee, m làá yàntī ni-kansikin biba ń ŋmátí kí taa kpú kujaaun. Bíǹ gbanti di làá dāá yàl̄ kí cù nnicantimun. 9 Bin ŋmátì gbantee làá dāá téetí m-pu bin cúú-bi kuyuŋuee kansikin. Bi làá dāá téetí m nín nāaǹ-bi miŋyee pu. Di sá yii bi nyáń m-boon: bi fātì bi-boon ki tīī-mi ní ki dū bi-nimbikpeeŋu ki báaǹ awaa pu. Niinee bi-naŋki làá dāá nyā nì bi-ba ntimbiil tuuŋŋi ŋin bi ŋée pu. 10 Bi làá béé yii man di sá bi-Dindaan, ní m nín nìn sòon̄ yii nnaabu làá jēetí bi-puee, maa nìn sòon̄ fám!>»

11 Ti-Dindaan Unimbɔti nín sòon̄ puee sèé: «Kpāafì a-ŋalii, fáá a-taaŋi ní kí lì yii: <An bàn̄ an laŋki!>, ntimbiil tuuŋŋi ŋin Isirayeel yab ŋée bàn̄ an laŋki. An kíǹ kujaau nì ŋkùm nì bìlbil kúm ń kpɔ̀ kí céetí-bi dee. 12 Bìlbil kúm làá kpɔ̀ bin bínní ndandatee, kujaau làá kpɔ̀ bin bí ki pìl̄ee ní bin kíǹ ki bí dimaŋfalinee ń kpú ŋkùm. M làá yàntī m-ŋuul ń tɔ̄ di-tundi ní kí cáá kátí. 13 Bi-nikpiliŋ làá dāá nīn dɔ̄ an kɔkɔ pu fìlfil bi-waaŋi kansikin ki māntìi tú bi-saraafaŋyi nì ajoon nì ŋgbantamu yilpu, nì isuboon nì iwaasufi taapu laakin bi nìn ŋáań saraabi ki tìì bi-waaŋee^a. Niinee, bi làá dāá béé yii man di sá bi-Dindaan. 14 M làá dàkà-bi m-pɔŋŋu ní kí nàan̄ bi-tiŋki. M làá jà bin kóò ki-puee kí yòon̄ kuteeu ŋgiil pú kí cáá sāā Riibila tiŋki ŋgan pú. Bi làá dāá béé niin yii man di sá bi-Dindaan.»