Eeseekiyeel 5

Unimbɔti làá jáǹ Jeerusaleem yab

1 «Sii nisaaleen, yòon̄ bɔlfi kí dūú ŋá kijikoolkaai. Á dū-kì kí kòol̀ a-yil nì a-nyimpul. Míǹ boonee, á ŋmàntī tiyikpiti tin a kōol̀ee saniya pu ní kí cúú yàkatī mita pu. 2 Bi nín māntìi tú kitiŋ kí jáǹ-kì puee yaa láa kúntèe, á dāá dū dijandi diba kí wà ŋŋmi kitiŋ kansikin. Á dāá yòon̄ dijanliliitiil kí dū a-tàataajiki kí fáá kí màntīí tū kitiŋ. Á dāá dū dijantataatiil din kíǹee kí yàaǹ kubuŋu ń yòon̄ ní man ń dāá dū m-tàataajiki kí páań di-boon. 3 Ama á dāá kíń tikutee fiii kí dūú fúuń a-wampeeŋkaati lookun. 4 Á dāá lēē pooki kí tɔ̄ ŋŋmin án wà. Ŋŋmi gbanti làá dāá nyàtī kí bà Isirayeel yab kɔkɔ cee.

5 «Man ni-Dindaan Unimbɔti di bíi sòoǹ yii: Kpèèmaan Jeerusaleem tiŋki! M dū-kì ki ŋá atimbun kansikin, ní ntimu māntìi tú-kì. 6 Ama Jeerusaleem yab dū marab bin m tīī-bee ki fá. Bi yíì kaa nóó m-bɔkpaaŋi. Bi gíti ŋá ikpiti ki jítiǹ atimbun nì ntimu mun māntìi tú-bee nib. Di sá yii bi dū m-bɔkpaaŋi nì m-marab ki fá kaa tɔ́-ŋi. 7 An pu ní man ni-Dindaan Unimbɔti sòon̄ yii: Ni jáń nì mi ki jítiǹ atimbun ŋin māntìi tú-nee, ní kaa tɔ́ m-marabaaa, kaa tí ŋúb́ m-bɔkpaaŋi mun, ní kaa kpáàa dī atimbun ŋin māntìi tú-nee marab gba. 8 An pu ní man ni-Dindaan Unimbɔti sòon̄ yii: m làá jáǹ nimbi Jeerusaleem yab. M làá dáaĺ ni-tafal atimbun ŋin kíǹee nimbiin ŋi-nib ń wāl̀. 9 Ni-timbiilituuŋŋi puee, m làá jáǹ-ni kii m nín kaa láá pée jáń nì ni dalba dalba puee ní. Maa làá ti pée jáǹ-ni míǹ mun jaanjaan. 10 Míǹ puee, bibaatiibi làá dāá ŋmɔ́ bi-biyaamu nanti ní mbiyaamu ń dāá ŋmɔ́ bi-baabi nanti. M làá dāá dáaĺ ni-tafal ní kí jà bin kíǹ kaa kpíìyee kí yàl̄ an kɔkɔ pu.

11 «An puee man ni-Dindaan Unimbɔti un bí dimaŋfalinee nín lī yii, ni nín ŋá pu ki dū ni-waaŋi nì ni-timbiilituuŋŋi ki kɔ́ǹ m-Diiku tijɔkɔndee, ma mun làá fàtī m-boon kí tīī-ni. M làá dàkà-ni nnimbinaakulim kaa làá sɔ̄ ni-saai. 12 Bi yaa cúú-ni ki yākatì mita puee, bìlbil kúm àá ŋkùm làá kpɔ̀ dijandi diba kitiŋin, ní bí dū kitàataajiki kí kpɔ̀ dijandi diba kitiŋ gundi boon. Dijandi din kíǹee, m làá jà-bi kí yàl̄ ijaan kɔkɔ pu ní kí dū m-tàataajiki kí kùl̄ kí páań bi-boon. 13 M làá yàntī m-ŋuul ń tɔ̄ di-tundi. M làá yàntī m-bum ń tɔ̄ mi-tundi kí cáá kátí ní ḿ tɔ̀ m-pɔntooŋyi. Niinee, ni làá béé yii man ni-Dindaan di sòon̄, di sá yii ni nín kaa yú nì mi deedeeyee kaa mɔ̄ǹ-mi. 14 M làá yàntī Jeerusaleem tiŋki ń kpántí adigbuŋkati ŋma, ní kí yàntī atimbun ŋin māntìi tú-kèe nì bisanjitiliibi ń nīn cáa bèel̄ ki lāā. 15 M làá dū m-ŋuul kí sòoǹ Jeerusaleem yab bɔti ní kí wòoǹ-bi tikpil. Atimbun ŋin māntìi tú-kèe làá nīn bèel̄-kì ki sìí-kì, ama kì làá nīn sá mun kii ŋabikee ní ki tīī-bi ní bí fàŋkì. Man ni-Dindaan di bíi sòoǹ nì ni.

16 «M làá dū ŋkùm kí tɔ̄ ni-pu mí kpɔ̀-ni. Mi làá tīī-ni tiweendi kii ipiinee ní. M làá bīil̀ ni-jiŋkpaafikaati ní kí yàntī ní kpú ŋkùm. 17 M làá dū ŋkùm nì ipeecuncuti kí tɔ̄ ni-pu ní í kpɔ̀ ni-biyaamu. Bìlbil kúm nì tipɔmbɔti nì kujaau làá kpɔ̀ kí céetí-ni. Man ni-Dindaan di sòon̄ nì ni.»