Yeereemii 52

Neebukadineesaar cúú ubɔti Seedeesiyasi

(Kpèè 39.4-7, 2 Bib 24.18-25.7)

1 Seedeesiyasi nìn cáá abin mmuŋku nì diba ní ki kpántì ubɔti. U nìn kāl̀ Jeerusaleem ki jíń dibeel abin saalaa nì diba. Bi yíì u-na Amutaal ní. U nìn sá uliibinaja^a Irimeeya bisal ní. 2 Seedeesiyasi nìn ŋá tin kaa kítì ti-Dindaan ceeyee, kii Yooyakiim nín nìn ŋá puee ní. 3 Tin nìn jítì Jeerusaleem tiŋkin nì Juuda beelinee nìn yāntì ti-Dindaan gíí diŋuul, áli ki dāa gīī ki jìn̄ u-nibul ki tɔ́ ndan ki wāatì u-ba.

Seedeesiyasi nìn yíkì kaa kíí u-ba pu Babiloon bɔtiu Neebukadineesaar cee. 4 Niinee ní úǹ dɔ́miń kí já nì Jeerusaleem tiŋki nì u-janjakitil kɔkɔ. U-janjaliibi nìn gāā bi-janjanaapaal kitiŋee nyɔkɔpu ní ki gbìn̄ mbòó ki māntìi tú-kì. Seedeesiyasi nín kāl̀ dibeelee biŋwawatiil uŋmal saalaati iwiin saalaa dal ní tíǹ jítì. 5 Bi nìn māntìi tú kitiŋ míǹ ki tin sāā Seedeesiyasi nín kpántì ubɔtee abin saalaa nì diba.

6 Ŋyunti gbantee ŋkùm nìn píĺ ki pɔ́ɔkì Jeerusaleem tiŋkin ní binib kaa nìn gíti cáá tiba kí jī. Uŋmananaati iwiin iwa dalee 7 ní Babiloon yab sāā ki cíl̀ digundi din nìn māntìi tú Jeerusaleem tiŋkee. Kunyeeuee ní Juuda janjaliibi kɔkɔ sáǹ. Babiloon yab nìn māntìi tú kitiŋ. Nì míǹ kɔkɔee, bijanjaliibi nìn dūu dī kipunyɔkɔ kin bí agun ali kansikin, ki bí ubɔti kpaabu caŋinee ki nyáń kitiŋin. Míǹ boonee ní bi kíĺ Jɔɔdan tantakal saŋŋu ki nín cá. 8 Ama Babiloon janjaliibi nìn kùl̄ ki bīiǹ ubɔti Seedeesiyasi boon ní ki tin cúú-u Jeeriikoo tantakalin. Niinee ní u-janjaliibi kɔkɔ sáǹ ki fá-u. 9 Babiloon yab nìn cúú-u kuyuŋu ki cáá-u ki cūnnì Riibila, Amaati tiŋkin, Babiloon bɔtiu cee. Niin ní úǹ sòon̄ u-bɔti 10 Riibila niin ní ki yāntì bi kūū Seedeesiyasi jipɔmbi u-nimbilaaliyin nì Juuda kàliŋkpilib kɔkɔ. 11 Míǹ boonee ní u yāntì bi sāā ki cɔ́tì Seedeesiyasi nimbiliŋ, ní ki dū tasa kúti kusakai ki bóob́-u. Míǹ boonee ní u yōoǹ-u ki cūnnì Babiloon tiŋkin ki tɔ́ sarka. U kāl̀ sarkan míǹ ní ki tin sāā u-kúm dal^b.

Neebusaradan púntìi nāaǹ Jeerusaleem tiŋki

(Kpèè 39.8-10, 2 Bib 25.8-21)

12 Babiloon bɔtiu Neebukadineesaar nín kpántì ubɔtee abin diba kpá mmuŋku poon, uŋmaŋmooŋmooti iwiin saalaa dalee ní Neebusaradan kɔ́ Jeerusaleem tiŋkin. U nìn sá bijanjaliibi bin cí Babiloon bɔtiuee kpiliu ní ki nìn sá ubɔti kpambal kansikin ubɔ. 13 U nìn tūū kunimbɔtidii^c nì Juuda bɔtiu beecindi nì adikpaan ŋin nìn bí kitiŋee nee kɔkɔ ŋŋmi. 14 Babiloon janjaliibi bin nìn bí bin cīití ubɔtee kpiliu ceeyee nìn gbáń ki wīī digundi din bi nìn máń ki tú Jeerusaleemee.

15 Míǹ boonee ní Neebusaradan cúú bin nìn kíǹ kitiŋee nee ki cūnnì kuyuŋu. Bíǹ di sá bisoodambi kansikin biba nì bin nìn sáǹ ki kɔ́ Babiloon bɔtiuee nì bin tūǹ ŋŋal pu tundee. 16 Ama u nìn yāntì bisoodambi biba kitiŋee ni bí nīn kù fiinyib nì akpaan.

17 Babiloon yab nìn gbáń ki wīī tasa kúti jaantalkub bin nìn yú kunimbɔtidii nyɔkɔpuee nì tɔrɔkub nì tasa kúti sɔŋkpaaŋku kun nìn yú kunimbɔtidii cindinee^d. Bi nìn yōoǹ tasa kúti gbanti kɔkɔ ki cūnnì Babiloon tiŋkin. 18 Bi nìn yōoǹ tasa kúti wanti tin bi nìn cáa ŋáań saraa tundi kunimbɔtidiinee kɔkɔ, an dàkà yii asambil ŋin poon bi fà ŋfantam ki ŋáańee nì peelab nì njimu nì asambil ŋin poon bi ŋáań fatiku ki cáa yàantée nì asambil aba mun. 19 Bijanjaliibi bin cīití ubɔtee kpiliu nìn gíti yōoǹ tin kɔkɔ sá sindaariya nì animbil kútee: msampeemu nì nsambiyaamu mun poon bi ŋáań talaalu ki tùutēe nì asambil ŋin poon bi ŋáań fatiku ki cáa yàantée nì asambil ŋin poon bi fà ŋfantam ki ŋáańee nì fitilab tɔ́kɔŋkaati nì njiimu nì asambil aba mun.

20 Ubɔti Saloomɔn nìn dū tasa kúti ki mɔ́ɔ́ tiwan tikpil ki yóoǹ kunimbɔtidiin: jaantalkub liitil nì kusɔŋkpaaŋŋu kun nìn tɔ́kɔ́ inajaa saalaa nì ili puee nì tɔrɔkub. An pɔ̄ɔ̄ bí ŋmā kí ŋmàntī tikúti gbanti kɔkɔ. 21 Jaantalku kamaa fɔkɔŋŋu nìn sá meetab biwa ní kí màntīí tūee sá meetab biluu. Jaantalku kamaa poon nìn cáá mbùń ní tasa kúti tin bi dūu nyūntèe gbifiŋŋu sá santimeetab binii. 22 Bi nìn dū tasa kúti ki mɔ́ɔ́ dikɔl ki tɔ́kɔǹ jaantalku kamaa pu. Akɔlee fɔkɔŋŋu nìn sá meetab bili nì dijandi ní. Bi nìn dū tasa kúti ki mɔ́ɔ́ kilàaŋ́ŋi nì asubil ŋin bi yíì greenaadee ki nyɔ̄kɔntì jaantalkubee. Jaantalkubee nì tiwan tin bi nìn dūu nyɔ̄kɔntì-bee nìn sá tiwambaantiil ní. 23 Greenaadi biliŋ anaa kpá dilaataal di nìn lúń ajan kɔkɔ pu, an dàkà yii greenaadi biliŋ dilaataal di nìn māntìi tú kilàaŋ́ŋee.

24 Bijanjaliibi bin cīití ubɔtee kpiliu nìn cúú usaraaŋakpil Seeraya nì u-taapu yɔu Seefaniya nì bisaraaŋaliibi bita bin nìn cí kunimbɔtidii punyɔkɔkee. 25 U nìn gíti cúú ukàlinjakpil un nìn kpèé bijanjaliibee nì ubɔti saŋkiliibi binib biluli. U nìn cúú ujanjakpil gbaŋŋmaliu un bin nìn tīī ditundi ú fōō bijanjaliibee, nì Juuda yab binib imuŋku ita. Binib gbanti kɔkɔ nìn bí Jeerusaleem tiŋkin ní. 26 Neebusaradan nìn yōoǹ bin u nìn cúúyee kɔkɔ ki cáa cūnnì Babiloon bɔtiu cee Riibila tiŋkin. 27 Úǹ nìn kūū-bi Riibila, Amati tiŋkin niin.

Míǹ ní bi nìn cúú Juuda yab ki cūnnì kuyuŋu ki wāatì bi-tiŋki.

28 Binib bin Neebukadineesaar nìn cúú ki cūnnì kuyuŋuee nyɔkɔm sɔ̀.

Neebukadineesaar nín kpántì ubɔti abin aluli poonee, u nìn cúú Juuda yab binib kutukub bita nì binib mmuŋku nì bita.

29 U nín kpántì ubɔti abin saalku nì ata poonee, u nìn cúú Jeerusaleem yab binib alaataa anii nì binib mmuŋku nì saalaa nì bili.

30 U nín kpántì ubɔti abin mmuŋku nì ata poonee, bijanjaliibi bin cīití ubɔtee kpiliu Neebusaradan nìn cúú Juuda yab alaataa aluli nì binib imuŋku ili nì biŋmoo ki cūnnì kuyuŋu. Binib bin kɔkɔ bi nìn cúú ki cūnnì kuyuŋuee kɔkɔ nìn kpáfì binib kutukub binaa nì binib alaataa aluu ní.

Babiloon yab bɔtiu gíiǹ Yooyakiim ki líì

(Kpèè 2 Bib 25.27-30)

31 Bi nín cúú Juuda bɔtiu Yooyakiim ki cūnnì kuyuŋu abin ata kpá imuŋku ilee ní Eefiil Meerodaki kpántì Babiloon bɔtiu. Dibindi din u kpántì ubɔtee iŋmal saalaa nì ili poon iwiin mmuŋku nì iŋmoo dalee ní u nyántì Juuda bɔtiu Yooyakiim sarkan ki tīī-u dibatɔl. 32 U nìn sòoǹ nì u kubɔɔtiiu poon ní ki nìn kāaǹ-u mpaan ŋun jítiǹ bibɔtiibi bin kɔkɔ nìn bí u-cee Babiloon tiŋkinee yai. 33 U nìn yāntì Yooyakiim kaa ti pèentí disarkabɔkutil. Yooyakiim nì Babiloon bɔtiu di nìn kíǹ ki jīǹ disambibaantiilin. 34 Kí yòon̄ ŋwiin gbanti kí tin sāā Yooyakiim kúm dalee, Babiloon bɔtiu di nìn tìì-u tin u máaǹ kí nīn cáá kí nīn bí dimaŋfalinee.