Yeereemii 51

1 Ti-Dindaan nín sòon̄ puee sèé:

«M làá cáań kubuŋu kun nàantée

kú jītí Babiloon tiŋki nì ki-nib pu.

2 M làá cáań binicambi kí tɔ̄ ki-pu

ní bí jà ki-nib kí yàl̄

kii kubuŋu nín yòontí tifeel kí fá puee ní.

Bi làá nàan̄ kitiŋee.

Dinimbinaamandi dalee,

bi làá màntī kí tū-kì ijaan kɔkɔ pu.»

3 Bipintɔliibi ń tɔ̄ binannanliibi pintɔliibi.

Binannanliibi ń taa nín̄ pùlifī bi-gbampɔɔŋi pu!

Ní taa yàntī bi-janjapɔmbi ubɔ ń ŋmátí!

Ní nàan̄ bi-janjakitil kɔkɔ!

4 Bin fōō tiweendee làá dāá nīn dɔ̄

Kaldee tiŋkin fìlfil,

ní bin bi làá kpɔ̀ kujaaunee

ń dāá nīn dɔ̄ adan pu tàbitab.

5 Di sá yii ikpiti in bi ŋá

Isirayeel circir Nimbɔtiuee gbí bi-tiŋki.

Ama Isirayeel nì Juuda Nimbɔtiu un sá

ti-Dindaan Mpɔŋkɔdaanee kaa kpíì ki fá-bi.

6 Sāǹ kí nyāmaan Babiloon tiŋkin,

báà ŋma ń sāǹ kí fīī u-ba!

Niinee naa làá kpú ki-kpitii pu^a.

Di sá yii ŋyunti bāań ti-Dindaan ń tɔ̀ ipɔntoon,

u làá pà bi-paati nín máaǹ puee.

7 Babiloon nìn sá kii sindaariya kɔŋkɔnnyɔkaau

ní ki kā ti-Dindaan ŋaan.

Kì nìn yàntī kitiŋ pu nib kɔkɔ nyù ki gbéè.

Atimbun nib nìn nyù ki-daam

ní bi-yiliŋ ń lábití^b.

8 Ama dicilpu dicilpu ní Babiloon lítì ki wúkul̀.

Yāliŋkìmaan ki-pu!

Nyàab̀maan ŋkpam kí ŋá ki-buuŋyi,

an yaa yíì kì làá pɔ̄ɔkì.

9 Ti pɔ́ɔǹ kí bàà cáaǹ Babiloon tiŋki,

ama ní kàa pɔ́ɔkì.

An puee tí yàntī-kì!

Báà ŋma ń nīn gítí u-tiŋkin.

Tiŋman, ditafadaaldi din lítì ki-puee nyìm̀ tikpil,

di jɔ́m̀ ki tin tūū kutagbɔŋu,

di tūū atagban^c.

10 Ti-Dindaan pɔ̀n̄-ti.

Tí cùmaan Siiyɔn tiŋkin kí māafì

atuun ŋin ti-Dindaan ti-Nimbɔtiu túnnée.

11 Ti-Dindaan bɔ́ntì kí nàan̄ Babiloon tiŋki. An pu ní u tīī Meedi yab bɔtiibi kunyannyaau bí ŋá u nín bɔ́ntì puee. Ti-Dindaan bíi tɔ̀ ipɔntoon, u bíi tɔ̀ u-diiku pɔntooŋyi.

Lòom̄maan ni-piiŋyi,

ní gbéem̀maan ni-baataŋŋi.

12 Ní cóoḿmaan kujaau daaŋku ŋaabiki

digundi din bi máń ki tú Babiloon tiŋkee pu.

Ní kūtì bijanjaliibi bin cée wíiŋŋu pu!

Ní nyàab̀ bijanjaliibi kí síiń sintil,

Ní dū bijanjaliibi kí nákań nákań.

Di sá yii ti-Dindaan nín bɔ́ntì kí ŋá puee,

u làá ŋá míǹ,

u làá jáǹ Babiloon yab.

13 Sii Babiloon un di kóò

dimɔɔkpaandi gbandee,

sii un di cáá tigaajati tikpilee,

an dóò a-pu dee.

14 Ti-Dindaan Mpɔŋkɔdaan

pūtì úǹ u-ba ki lī yii:

«M làá yàntī binib bin wīikí kii inaakitoonee

ń gbáb́ kí bìin̄ a-pu.

Bi làá kúuǹ a-pu ijanjakuŋkuunti.»

15 Ti-Dindaan dū u-pɔŋŋu ní ki náań kitiŋ,

ní ki dū u-ciiŋŋu ki bíl̀ duulinya

ní u bá ki pɔ̄ɔ̄,

ní ki dū u-nyil ki kpátì kutagbɔŋu

ki dāntì kutaa pu.

16 U tīī mara ní inyiŋfi kóoǹ ki kpáfì yilpu,

ní atagban nyánní kitiŋ kúntinyɔkɔ ki jɔ́m̀.

U yāntì utaa ŋmɔ́ ní ki nìn̄.

U yāntì kubuŋu nyánní ku-walimbookun.

17 Án làá dāá ŋá binib bitii,

ní bí nīn yú kaa gbìl̀ taapu.

Icoo cúú bin dùntī tikúti ki mɔ́ɔ̀ awaayee.

Bi-waaŋi gbanti sá tinyimɔŋwan ní,

ŋaa cáá kufoou ŋi-ni.

18 Ŋaa pée bí tiban, ki mɔ̄ tilaal,

ditafadaaldi wiiŋŋu dalee,

ŋi làá dāá wāŋkì.

19 Ama Unimbɔti un sá Jaakɔb gaajatee,

kaa bí kii ŋi nín bí puee.

Úǹ di sá duulinya kɔkɔ náanliu,

ní Isirayeel sá-u difakal.

Úǹ ní bi yíì ti-Dindaan Mpɔŋkɔdaan

Babiloon kúntitam

20 Sii Babiloon nìn sá-mi kii dikújalee ní,

a nìn sá-mi tijanjawan ní.

M dī a-pu ki nàn̄ atimbun dúsi dusi

ki nāaǹ abee.

21 M dī a-pu ki nàn̄ itaamu nì bitanjakaliibi,

janjatɔrɔkub nì bin ŋàal̀-bee.

22 M dī a-pu ki nàn̄ bininjab nì binimpoobi,

binipɔmbi nì bitikpilib,

binaacimpɔmbi nì bisapɔmbi kunaau.

23 M dī a-pu ki nàn̄

bipikpaaliibi nì bi-picaŋkpunti,

bikpaabi nì bi-naai in bi cáa kù tikpaalee,

gɔminab nì kɔmandambi.

24 Ama ni-nimbilaaliyin ní m làá pà

Babiloon tiŋki nì Kaaldee yab

tikpitil tin bi ŋá Siiyɔŋyee paati,

man ni-Dindaan di lī míǹ.

25 Tiŋman, m làá já nì sii Babiloon tiŋki,

ti-Dindaan di lī míǹ.

Kí nàan̄ee, a nìn pɔ̄ɔ̄ kii dijoolee,

ní ki nìn nàantí duulinya kɔkɔ.

M làá tàntī m-ŋal kí túĺ a-watil pú.

M làá téeń-si á gàaǹ ataŋkpee pu kí lítí,

ní kí yàntī á kpántí dijool din fòol̄ lìblibee.

26 Baa ti làá ká a-cee ditaŋkpajal

àá ataŋkpee ŋin bi dūu bíl̀ a-nyeelee,

di sá yii a làá kpántí kuteeu ní kí nīn cá jaanjaan,

ti-Dindaan di lī míǹ.

27 Ní cóoḿmaan kujaau daaŋku ŋaabiki kitiŋin,

ní búń ŋyin atimbun nib ń gbìl̄.

Kóom̀maan atimbun kí kpāfì ŋí jáǹ Babiloon tiŋki,

yíiḿmaan Ararati nì Miini nì Asikeenaasi

beeŋi ŋí jáǹ-kì.

Ní lēēmaan bijanjakpilib

bí fōō bijanjaliibi bí jáǹ-kì.

Dūmaan itaamu in wīikí kii inaakitoonee

kí tɔ̄ ki-pu í jáǹ-kì.

28 Kóom̀maan atimbun kí kpāfì ŋí jáǹ-kì,

cilinjee Meedi bɔtiibi nì bi-gɔminab

nì bi-kɔmandambi nì ntimu mun kɔkɔ bi kpòotēe.

29 Kitiŋ cīŋkì màkà maka

ki kɔ́ dinyoondin,

ŋyunti ŋun ti-Dindaan ŋá

u nín bɔ́ntì kí ŋá Babiloon tiŋki puee.

U yāntì Babiloon tiŋki kpántì kuteeu

báà unil kaa ti kóò ki-ni.

30 Babiloon baatandambi gbēeǹ kaa ti bíi jáà,

bi sáǹ ki kɔ́ ki bál̀ bi-balilammun.

Baa ti cáá dipɔbil,

bi kpántì binimpoobi ní.

Kitiŋ punyɔmmu pīitì ki wāā,

bi tūū ki-diiŋŋi ŋŋmi.

31 Ituun sáń ki fòol̄ tɔb.

Bi sáń malaa malaa

ki cá Babiloon bɔtiu cee

kí cùú tùkù-u yii

bi jáń ki fōō u-tiŋki kɔkɔ.

32 Bi pīiǹ laakin unil ŋūǹ kí còom̀ kí dùtī mbunee,

digundi din bi máń ki tú kitiŋee wùn̄ ŋŋmi,

ní tifaandi cúú bijanjaliibi.

33 Ti-Dindaan Mpɔŋkɔdaan Isirayeel Nimbɔtiu bí yii:

«Babiloon tiŋki náań nì

didigbanaapaal din bi ŋātèe ní.

An kaa ti làá sūŋkì

kudiceeu yuntiŋu làá bàń ki-pu.»

Ti-Dindaan làá tɔ̀ u-nibul pɔntooŋyi

Jeerusaleem

34 Babiloon bɔtiu Neebukadineesaar,

cátikì-mi ki tɔ̄ntì-mi.

U dū-mi ki fá kii disambikulindee.

U dū-mi ki náĺ kii kupeebiliŋŋuee,

u jíń m-jimmɔntiiti ki gbéeǹ u-pool,

míǹ boonee ní u jìn̄-mi.

35 Babiloon ń fōō nnaabu nì falaabi

bin kì kɔ́ǹ-tee tafadaaldi!

Siiyɔn yab ń lì yii:

«Tiŋman Kaaldee yab ń túń

ti-fatikuu kpuulool.»

36 Ti-Dindaan nín sòon̄ nì Jeerusaleem pu puee sèé:

«Mama m-ba di làá mɔ̄tì a-pu,

man di làá tɔ̀ a-pɔntooŋyi.

M làá yàntī Babiloon buŋyi ń kpā

ní kí yàntī u-nyimbulii ń gúń.

37 M làá yàntī Babiloon tiŋki ń kpántí adigbun ŋma.

Iŋɔkɔ di làá nīn kíǹ ki kóò niin,

ní an kpántí mpaan ŋun fàantée.

Bi làá dāá nīn gbáà inimɔɔn biilii,

ní báà uniseen kaa dāa gíti kíikí kí kɔ́ niin.

38 Babiloon yab mùuǹ dicilpu kii gbikintibee,

bi gbùkum̄ kii agbikintipɔmbilee.

39 Ŋyunti ŋun ní kpɔkɔsi cúú-bee

ní ḿ bɔ́ntí tijimmɔntiil kí tīī-bi.

M làá yàntī bí nyɔ̀ kí gbí,

bi làá gèeǹ ŋgeem min kaa kúntée,

man ni-Dindaan di lī míǹ.

40 M làá péetí-bi kí cùnnì laakin bi làá kpɔ̀-bee

kii bi nín péetí apibil nì ipijaa nì iŋɔjaa

ki cáǹ kí kpɔ̀ puee ní.»

Bi bíi yáliŋkí Babiloon tiŋki pu

41 Bi jáń ki pɔ́ɔkiǹ Seesaki tiŋki

ki fōō-kì.

An dī mana ní ki bāań míǹ?

Babiloon tiŋki kpántì kuteeu

kun gbí inimɔɔnee atimbun kansikin.

42 Tiŋku gbí ki bīiǹ Babiloon tiŋki pu,

u-nyiŋgbanti yíkìi léeǹ ki-pu.

43 Ki-timmu kpántì kuteeu kun gbí inimɔɔnee.

Kitiŋee kpántì kitiŋkuliŋŋi,

mpaan ŋun pu báà ubɔ kaa kóò,

ní báà uniseen kaa ti jītée ní.

44 M làá jáǹ diwaal Beeli Babiloon tiŋkin.

M làá dáaĺ kí lēē kun kā ki-nyɔkɔnee,

atimbun kaa làá nīn gíti bìtifī ki cá ki-cee.

Babiloon gundi gba lítì.

45 M-nibul, sāǹ kí nyā kitiŋ gbantin!

Báà ŋma ń sāǹ kí fīī u-ba

ti-Dindaan ŋuukpaandi ń taa kpáaǹ-u.

46 Ni-wunti ń taa yɔ̀tī! Ní taa yàntī tin bi sòoǹ kitiŋee ni ń fàaǹ-ni. Dibindi dibee bi sòoǹ tiba, ní dibindi dibee, bí tí sòoǹ tiba mun. Tipɔmbɔti jíń dinyandi kitiŋee ni, ní ubɔ ń yīkì kí já nì ubɔti un kēe kí fōō u-yil.

47 Too, iwiin bí ki dòoń,

m làá jáǹ Babiloon waaŋi.

Kitiŋee kɔkɔ làá kɔ́ icoo ni.

Ki-nikpiliŋ kɔkɔ làá nīn dɔ̄ kitiŋ kansikin fìlfil.

48 Bin làá nàan̄ Babiloon tiŋkee làá nyānní ŋgan pú ní.

Niinee yilpu nì taapu

nì tin kɔkɔ bí bi-puee

làá dāá nīn kūuntí nì dipɔɔpindi^d ki-pu.

Ti-Dindaan di lī míǹ.

Ubɔnaatil

49 Duulinya kɔkɔnee,

binib tikpil kpíì Babiloon pu.

Míǹ mbaantiim ní Babiloon mun

làá kpú Isirayeel yab

bin kpíì u-puee pu.

Unimbɔti nibul

50 Nimbi bin ŋmátì kaa kpíìyee,

nín̄ cámaan, taa nín̄ kāmaan doo.

Ni yaa bí ndanaaa, ní nīn dàkafī ti-Dindaan pu,

kí nīn téetí Jeerusaleem pu.

51 Ti yaa nìn gbìl̀ bi sìí-tee,

an nìn wù-ti ní.

Icoo nìn cútí-ti,

di sá yii binicambi nìn kɔ́ ti-Dindaan

circir kɔŋkooŋŋun.

52 An pu ní ti-Dindaan bí yii:

«Ŋwiin bí ki dòoń m làá jáǹ

Babiloon waaŋi.

Kitiŋee kɔkɔ poonee,

bin fōō tiweendee làá dāá nīn yáliŋkí.

53 Báà Babiloon yaa jɔ́m̀ ki tin tūū kutagbɔŋu,

báà kì yaa máń digundi din

ubɔ kaa ŋūǹ kí dàb̄ee ki tú ki-ba,

m làá tīī mara

ní bin làá nàan̄-kèe ń bàń-kì,

ti-Dindaan di lī míǹ.»

54 Binib gbáà ibiil Babiloon tiŋkin

ki nyàab̀ dijòońdi,

bi gbìl̀ bi nín bíi nàantí Babiloon tiŋkee.

55 Di sá yii ti-Dindaan di bíi nàantí Babiloon tiŋki,

u yāntì u-wookpaaŋku ŋmíl̀.

Binannanliibi janjakitil bíi gà dibintindi

kii tiŋku nyiŋgbantee.

Kuwoou kun bi ŋáańee náań nì ditaadundee ní.

56 Di sá yii un làá nàan̄-kèe bāań-kì.

U làá jáǹ Babiloon tiŋki.

U làá cúú ki-baatandambi kí cùnnì kuyuŋu,

u làá kɔ̄fì ki-tɔfii.

Tiŋman, ti-Dindaan sá Unimbɔti

un tɔ̀ ipɔntoonee ní.

U làá pà báà ŋma u nín máaǹ tipaal tiŋyee ní.

57 M làá nyùntī ki-kàliŋkpilib nì ki-ciŋfitiibi nì ki-gɔminab nì ki-kɔmandambi nì ki-baatandambi ndaam bí gbí. Bi làá gèeǹ talku geem, bi pée gíti kpá kí fìntī. Ubɔti un bi yíì ti-Dindaan Mpɔŋkɔdaanee di lī míǹ. 58 Ti-Dindaan Mpɔŋkɔdaan bí yii:

«Babiloon guŋkpaaŋŋi kpéelikì kɔkɔ múb,

ki-punuufɔkɔbee wùn̄ ŋŋmi.

Anibul pée bíi ŋáań falaa fám deeyaa,

atimbun pée bíi gì ki tìì ŋŋmi deeyaa!»

Dinyɔɔbundi din bi dūu tɔ́ Eefiraati mɔɔlinee

59 Unimbɔti bɔnaatiliu Yeereemii nìn tīī Neeriya jipɔɔn Seereeya, Meeseeya naantiiu mara ŋyunti ŋun u nì Juuda bɔtiu Seedeesiyasi nìn cūtì Babiloon tiŋkinee. Ŋyunti gbantee, Seedeesiyasi nìn kā dibeel an ŋá abin anaa dee. Seereeya di nìn sá ubɔti kpambal din bɔ́ntí u-bɔti kɔkɔee. 60 Yeereemii nìn ŋmàn̄ kugbɔmbaantiiu poon inaabu in kɔkɔ làá jēetí Babiloon tiŋki puee, anyɔɔbun ŋin di jáǹ Babiloon tiŋkee. 61 Yeereemii nìn bí Seeraya yii: «A yaa bàn̄ Babiloon tiŋkinee, á kàaǹ tibɔti tin kɔkɔ ŋmàn̄ ki kā kugbɔŋu nee poonee. 62 Míǹ boonee ní á lì yii: <Ti-Dindaan, sii a-ba di sòon̄ ki síiǹ yii bi làá nàan̄ Babiloon tiŋki, ní báà unilaaa, kuwaŋkuluaaa, tiba kaa ti làá nīn bí ki-pu. Kì làá kpántí kuteeu kun gbí inimɔɔnee kí nīn cá jaanjaan.> 63 A yaa láa kàan̄ kugbɔŋu gbanti ki dóòyee, á nyàab̀ ditaŋkpal kí páań kí bóob́ ní kí cáá tɔ̄ Eefiraati mɔɔlin. 64 A yaa ŋá míǹ ki dóòyee ní á lì yii: <Míǹ ní Babiloon tiŋki làá wāŋkì. Ti-Dindaan di làá cáań nnaabu ŋun kí tɔ̄ ki-pu boonee, kàa ti làá ŋmā kí yīkì^e.>»

«Yeereemii bɔti nín kúntí laakiŋyee dee.»