Yeereemii 5

Baa kāntí unibaanti Jeerusaleem u bí deedee

1 Yìim̀maan Jeerusaleem daŋŋi kɔkɔ pu kí kpèè,

bàlifìmaan kí béé.

Nyàab̀maan imɔŋkijaa pu.

Ni yaa ká unibambaanti

bí deedee ki sòoǹ ibaamɔnee,

m làá dū Jeerusaleem tiŋki kpitii kí pɔ̄-kì.

Yeereemii

2 Bi pée pùtī ki lì yii:

«Nì ti-Dindaan yindi puee...»

Ama bi-pùtitam gbanti kaa sá mbaamɔn.

3 Ti-Dindaan, an sá ibaamɔn ní a là.

A gbáń-bi, ama an kaa píĺ-bi,

a bàà nìn lēē kí kúntí-bi, ama an kaa cíikì-bi.

Bi wíiḿ bi-nimbiin an pɔ̄ɔ̄ kiŋkiŋ kii ditaŋkpalee,

bi yíì kaa gítìń a-cee.

4 M nìn dākafì yii: «Binib bin kaa bí tibanee di ŋáań míǹ.

Bi ŋáań kaa dàkafī.

Di sá yii baa nyí tin ti-Dindaan lèe,

kaa nyí tin Unimbɔti bālifì bí ŋée.

5 M làá cùú sòoǹ nì bikpootiliibi.

Bíǹ nyí tin ti-Dindaan lèe,

nì tin Unimbɔti bàlifī bí ŋée.»

Ama bi-kɔkɔ sá bibaantiibi ní,

bi yíkì kaa kíí bi-ba pu,

ní ki gbáń ki kpītì mpèé ŋun bí

bi nì Unimbɔti kansikinee.

6 An pu ní gbikintib nyēeń kubambaŋŋun ki cútí-bi

ní kuteeun gbiŋgbiliŋ tɔ̀ntī-bi.

Igbii làá màntī kí tū bi-timmu,

ní kí ŋmɔ́ bin kɔkɔ làá nyānnée.

ti-Dindaan

7 «Jeerusaleem, mana ní m ŋūǹ kí dū a-kpitii kí pɔ̄-si?

A-jipɔmbi dū-mi ki fá,

ki pùtī awaa ŋin kaa sá Unimbɔtee.

M tīī-bi tin kɔkɔ máaǹee,

ama ní bi ŋá tilaakpaal,

ní ki kpákà kinimpulaakpaai pu.

8 Bi bí kii itaamu in bí màlmal ki pútèe ní.

Báà ŋma fèefī ki nyàab̀ u-juti nimpuu.

9 Ti-Dindaan bí yii: Maa cáá nsan kí ŋá binib nee tibaaa?

Maa máaǹ kí tɔ̀ ditimbundi din bí kii di neeyee ipɔntoonaaa?

10 Dàb̄maan agun ŋin bi máń ki tú bufiinyikpaa nee

kí kɔ́ kí bīil̀-bu,

ama ní taa bīil̀-bu kɔkɔ.

Gàatìmaan fiinyee paŋŋi,

di sá yii ŋaa ti sá ti-Dindaan wanti.

11 Isirayeel beel yab

nì Juuda beel yab

nyáń m-boon an kaa cáá bí lì.»

Ti-Dindaan di lī míǹ.

Unil yaa fá ti-Dindaanee tafadaaldi

12 Juuda yab fātì bi-boon ki tīī ti-Dindaan,

ní ki lì yii: «Ti-Dindaan kpá,

nnaabu ŋubɔ kaa làá bàn̄-ti.

Taa làá ká kujaauaaa, ŋkùm mun kaa làá nyā ti-pu.

13 Unimbɔti bɔnaatiliibi sá kii kubuŋuee ní,

Unimbɔti ubɔ kaa sòon̄ nì bi.

Bi nín sòoǹ nnaabu ŋun puee ń gítí bi-pu!»

14 An puee, ti-Dindaan Mpɔŋkɔdaan nín lī puee sèé:

«Yeereemii, kii bi nín bí ki sòoǹ míǹ puee,

m làá yàntī tibɔti tin m dūu ŋá a-nyɔkɔnee

ń kpántí kii ŋŋmee ní.

Dinibul nee làá kpántí kii idɔee,

ní ŋŋmi ń dāá wà-i.

15 Ti-Dindaan bí yii:

<Isirayeel yab, m làá cáań

ditimbundi din nyánní ndanee kí tɔ̄ ni-pu.

An sá ditimbundi din ubɔ kaa ŋūǹ kí já kí pɔ̄ɔkiǹee ní,

ditimbundi din sá dikpiŋkpikilee,

ditimbundi din sooŋyi naa nyí

kaa gbìl̀ee.

16 Di-piiŋyi cāabìń ŋkúm ní,

di-nib kɔkɔ sá bibaatandambi ní.

17 Bi làá dāá jī kí céetí ni-kpaajinti nì ni-jikaati,

kí kpɔ̀ ni-jipɔmbi nì ni-bisalib,

kí làntì ni-naai nì ni-piii nì ni-ŋoobui,

kí nàan̄ ni-fiinyi nì ni-fiigi sufii.

Bi làá dāá kpēelikì ni-timmu mun ni máń agun ki tú

ki dàkafī yii tiba kaa ŋūǹ kí ŋá-nee kujaau poon.»

18 Ti-Dindaan bí yii: «Nì míǹ kɔkɔee, maa làá dāá kúntí-ni nyíki nyiki. 19 Binib yaa láa bālifì yii: <Ba ní ti-Dindaan ti-Nimbɔtiu ŋá-ti mimmee?>, sii Yeereemii, á dāá kíí-bi yii: <Ni dū-u ki fá ki nóó anicaŋwaa ni-tiŋki poon. Míǹ mbaantiim ní ni làá cù kinicantiŋin kí cùú tɔ̄ ditundi kí tīī binicambi.>»

Binib kaa ti nyí Unimbɔti tuuŋŋi

20 Ti-Dindaan bí yii:

«Ní sòoǹ tibɔti nee kí tùkù Jaakɔb yab,

ní bāakì-tì Juuda tiŋkin.

21 Ní pīlifìmaan tibɔti nee,

nimbi dinibul din kaa nyí tiba, kaa cáá nlandɔkɔee.

Ni cáá animbil, ama ní kaa wāĺ,

ki cáá atafal, ama ní kaa gbìl̀^a.»

22 Ti-Dindaan bí yii:

«Naa fàŋkí-maaa?

Naa yɔ́tifí m-nimbiinaaa?

Man di kaa dū dibul ki bíl̀ án nīn sá tiŋku kpaanyɔkɔki,

kikpaanyɔkɔ kin waa máaǹ kí lákatéeee?

U-nyiŋgbanti ŋūǹ kí yīkì, ama tàa cáá mpɔn,

tì gà kuwoou, nì míǹ kɔkɔee tàa ŋūǹ kí jītí^b.

23 Ama nimbi dinibul nee pɔbil nyìm̀ ki gáatì,

ni fātì ni-boon ki tīī-mi ki búntì.

24 Baa lì bi-pɔbilin yii:

<Tí fàŋkìmaan ti-Dindaan ti-Nimbɔtiu.

Úǹ di tìì-ti utaa ŋyunti ŋun an máaǹee,

utaapeekaa nì ujoolkaa.

Dibindi kamaayee,

u síiǹ-ti nnyɔmu mun ti làá nīn cēē tikpaajinee.>

25 An sá ni-kpitii di pìkil̄ tin Unimbɔti bɔ́ntì ki síiǹee,

ni-yìntitam di pìintí tiŋan gbanti nsan.

26 Di sá yii m-nibul kansikinee,

binikpitib bí.

Kii un kpáŋkí inoonee nín bí puee,

míǹ ní bi bāal̀ ki cí.

Bi píĺ titalindi ki sātì binib.

27 Kii inoon nín gbí anɔndiinni puee,

míǹ ní tiwan tin bi fìkēe gbí bi-diiŋŋin.

Bi nín dī pu ki kpántì binikpaambi nì bigaajab,

28 ki gbīfiǹ ki ŋá ŋkpamee dee.

Bi ŋá ikpiti an lákatì.

Baa sòoǹ tibɔti ti-pú,

kaa mɔ́tí ditaŋkpiibil pu,

ama ní an bútí-bi.

Baa pɔ̀ uwɔfi.

29 Maa cáá nsan kí ŋá binib nee tibaaa?

Ti-Dindaan di lī míǹ.

Maa máaǹ kí tɔ̀ ditimbundi

din bí kii di neeyee ipɔntoonaaa?

30 «Ntimbiil nì atulim bɔti

bíi jītí kitiŋ nee pu.

31 Unimbɔti bɔnaatiliibi nàatī tinyimɔmbɔti,

ní bisaraaŋaliibi kāntí ipaati,

ní m-nibul ká yii míǹ ŋān̄^c!

Mimmee tin bí nee kɔkɔ yaa láa kúntèe,

ni làá dāá ŋá mana dee?»