Isirayeel yab sá kii kinimpulaakpaai kin yil pɔ̄ɔ̄yee
3
1 Ti-Dindaan lī yii:Unil yaa jìn̄ u-nimpuu
ní u yīkìi cūtìi mɔ́ǹ ubɔee,
udaan gíti cáá nsan kí fàtīí fōoń-uaaa?
Aayee! Di sá yii atuun gbanti pu ní kitiŋ kɔ́ tijɔkɔndi.
Ama sii Isirayeel, a ŋá tilaakpaal
nì bibɔntiibi tikpila
ní ki bàà là kí fàtīí gítiń m-cee!
Ti-Dindaan di lī míǹ.
2 Wáaǹ kí kpèè ŋgbantamu yilpu.
Kigbantaŋ kiba pée bí
si nì a-bɔɔn ubɔ kaa jɔ́m̀ ki-pu ki dōoǹaaaa?
A kàal̀ isan caŋin ki cīití-bi
kii ulaalibuja un kóò kuteeunee.
A dū a-jɔkɔntuuŋŋi nì a-laakpaatuuŋŋi
ki kɔ́ǹ kitiŋ tijɔkɔndi.
3 An puee maa yāntì utaa nìn̄,
maa yāntì a ká utaa kuseeun.
Ama a ŋá mpɔɔgbifin
ki gbíntìi nìkì ki ŋáań a-laakpaatuuŋŋi,
ní ki yíì kaa béè a-bɔkpil.
4 Ní kɔŋkɔnnee a cáá dipɔbil
ki kūuntí ki yíì-mi yii:
«M-baa, sii un sá m-bɔɔ doooo m-biyatinee!
5 A gbíntìi gíí m-pu diŋuulaaa?
A gbíntìi díkí m-puɔɔɔ?»
A lì míǹ ní ki gbíntìi nìkì ki ŋáań ikpiti,
a nyí ikpiti diŋál nan ní!
Isirayeel nì Juuda yab kaa yúliǹ Unimbɔti deedee
6 Ubɔti Joosiyaasi yuntiŋu ní ti-Dindaan nìn bí-mi yii: «Kéè a ká Isirayeel yab nín nyáń m-boonee yaa? Bi jɔ́m̀ ajoon ŋin fɔ̀kɔ̀ee kɔkɔ yilpu, ki cūtì isufi in faati sɔ̀m̀ee kɔkɔ taapui ki ŋá tilaakpaal. 7 Ní m lī m-neen yii: <Bi yaa ŋá míǹ kɔkɔ ki dóòyee, bi làá fàtīí gítiń m-cee, ama baa gítìń. Ní u-naal Juuda tiŋkin yab bin kaa yú deedeeyee mun ká. 8 Tilaakpaal tin Isirayeel yab ŋée puee, m jìn̄-bi kii uninja nín jì u-nimpuu puee, ki ŋmàn̄ kugbɔŋu kun dàkà kun pu ní m jìn̄-bee ki ŋúbiǹ-bi. Ama u-naal Juuda tiŋkin yab bin kaa yú deedeeyee ká míǹ ní an kaa cúú-bi tifaandi. Nì míǹ kɔkɔee, bi mun páatìi jéetì tilaakpaal pu. 9 Bi ŋá tilaakpaal nì awaa ŋin sá ataŋkpee nì isufee. An nín kaa ŋá-bi nyàaa bí ŋá tilaakpaalee, bi kɔ́ǹ kitiŋ tijɔkɔndi. 10 Nì míǹ kɔkɔee, Isirayeel naal Juuda un kaa yú deedeeyee kaa fātìi gítìń m-cee nì dipɔbil diba. U-bakpantil kaa sá mbaamɔn.» Ti-Dindaan di lī míǹ.
11 Ti-Dindaan bí-mi yii: «Isirayeel yab pɔɔgaatib sɔ́ǹ Juuda yab bin kaa yú deedeeyee. 12 Á cù kí dū tibɔti nee kí bāakì ŋgan watil pú yii:
<Isirayeel yab pɔɔgaatib, fàtīí gítímaan m-cee,
m làá bútí m-nimbiin kí tīī-ni.
Tiŋman, m sá ubɔɔtimɔnti ní,
maa làá nīn díkí ni-pu diŋuul míǹ
kí nīn cá jaanjaan.
13 Tin bée di sá yii á béé a-bɔkpil,
béé yii a jáń nì man,
a-Dindaan a-Nimbɔtiu.
A cūtì ilaan kɔkɔ ki nyàab̄ awaa
isuboon kɔkɔ taapui,
ní kaa pílifì man nyɔkɔ.
Ti-Dindaan di lī míǹ.>»
Juuda yab gítintam
14 Ti-Dindaan bí yii: «Fàtīí gítímaan mbiyaamu mpɔɔgaatimu. Man di sá ni-kpiliu. M làá lēē ubɔ kitiŋ kiba poon, ní kí lēē bili kudicaŋu kubɔ poon, ní kí cáá-ni kí cùnnì Siiyɔn. 15 M làá dāá tīī-ni bikpootiliibi bin kā m-pɔbil puee ní bí dāá dū iciin nì dinyil kí kpòotī-ni.»
16 Ti-Dindaan gíti lī yii: «Ŋyunti gbantee, ni làá dāá bùtī ki gbí kitiŋ nee. Ubɔ kaa dāa gíti tùkù u-juti dipoondi dakaau bɔti, ní ubɔ mun kaa dāa gíti dàkafī u-pu. Baa làá dāá gíti téetí u-pu, kaa làá dāá yāliŋkì u-kpátam pu. Baa làá dāá gíti kpáá upɔɔn ubɔ mun. 17 Ŋyunti gbantee, bi làá dāá yíiń Jeerusaleem yii <Ti-Dindaan beejal>. Atimbun kɔkɔ làá dāá kóoǹ kí kpāfì niin, man ni-Dindaan cee. Bi làá dāá fá bi-landɔkɔkpitii. 18 Ŋyunti gbantee, Juuda yab làá dāá cùú kpāfì nì Isirayeel yab, ní bi-kɔkɔ ń nyānní ŋgan pú tiŋkin dicilpu kí fàtīí gítiń kitiŋ kin m nìn dūu tīī bi-naanjab an nīn sá bi-fakalee poon.»
Isirayeel yab pɔɔgaatib làá fàtīí gítiń Unimbɔti cee
ti-Dindaan
19 M lī m-ban yii: «M bàà là
kí dū-si kí kpántí m-jipɔŋkpiliu,
kí tīī-si mmɔn tiŋki kin ŋān̄
ki jítiǹ mu-kɔkɔ duulinya poonee
án nīn sá-si difakal atimbun kansikin.
M lī yii a làá dāá yíiń-mi yii: <M-baa>,
ní aa ti làá fàtī a-boon kí tīī-mi dalba dalba.
20 Kii unimpu nín nyēē u-cal boon puee,
míǹ ní nimbi Isirayeel yab, ni nyáń m-boon.
Man ni-Dindaan di lī míǹ.
21 «Bi gbìl̄ ibiil pu ŋgbantamu pu,
an sá Isirayeel yab di bíi sūǹ ki tíminsí.
Di sá yii bi yīntì nsan
ki súntì man bi-Dindaan bi-Nimbɔtiu pu.
22 Fàtīí gítiḿmaan, nimbi pɔɔgaatib.
M làá cáaǹ-ni ni nín gáatì puee weeŋyi.»
Isirayeel nibul
«Kpèè ti sèé, ti gítiń a-cee,
di sá yii sii ti-Dindaan di sá ti-Nimbɔtiu.
23 Tiŋman ti yāntì ŋgbantamu pu waatootii
nì kuwoou kun bi ŋáań ajoon puee kíil̀-ti.
Ibaamɔn, ti-Dindaan ti-Nimbɔtiu
di ŋūǹ kí fīī Isirayeel yab.
24 Doooo ti-biyatin ní icoo waaŋi
jíń ti-baabi nín pɔ́ɔǹ ki túń atuun
ki ká tigaajati tiŋyee.
Ŋi jíń bi-piii nì bi-ŋoobui nì bi-naai
nì bi-jipɔmbi nì bi-bisalib.
25 Tí dòom̄maan ti-cooi poon!
Tí kíí kí fá ti-jilmau.
Di sá yii ti nì ti-naanjab
kaa yúl̀ nì ti-Dindaan ti-Nimbɔtiu deedee,
doooo ti-biyatin ki dāa sāā díǹ.
Taa pílifiǹ ti-Dindaan ti-Nimbɔtiu nyɔkɔ.»