Yeesaya 62

Jeerusaleem nyaaŋku

1 Dineendi din m cáá sii Jeerusaleem puee,

maa làá nīn kā ki ŋmí.

Dineendi din m cáá sii Siiyɔn puee,

maa làá nīn kā ki jòon̄ iŋal,

kí nīn cí ŋyunti ŋun ní a-baamɔŋyi

làá dāá nyā kí páań kii ŋwalifee,

ní a-fiil ń dāá ŋmíntí kii ŋŋminaapoolee.

2 Atimbun làá dāá ká a-deedeeu,

ní bibɔtiibi kɔkɔ ń dāá ká a-nyooti.

Bi làá dāá páań-si diyindi^a

din ní a-Dindaan làá dāá lēē

bí nīn yíì-see.

3 A làá dāá nīn sá kii kibeefuulii

kinyaaŋŋi a-Dindaan ŋaan,

ní kí nīn sá ubɔti ŋaayilkaaŋu

a-Nimbɔtiu ŋaan.

4 Baa làá dāá nīn gíti yíì-si yii

<Kitiŋ kin bi dūu fée>,

baa làá dāá gíti yíiń a-tiŋki yii

<Kitiŋ kin dɔ̄ fámee>.

Ama bi làá dāá nīn yíì-si yii

<Kitiŋ kin bɔti fáatiǹ-mee>,

ní kí dāá nīn yíì a-tiŋki yii

<Unimpu un mɔ́ǹ ticamɔntiilee>.

Di sá yii a-bɔti làá dāá nīn fáatiǹ a-Dindaan,

ní a-tiŋki ń dāá nīn sá ucamɔnli.

5 Kii unaacimpɔɔn nín cāab̀ usapɔɔn puee,

míǹ mbaantiim ní bin làá dāá fàtīí mā-see

làá dāá nīn sá a-cal.

Kii unimpucaan bɔti nín mɔ̄ǹ u-cal puee,

míǹ ní a-bɔti làá dāá nīn mɔ̄ǹ a-Nimbɔtiu.

6 Jeerusaleem, m kāaǹ biciitiliibi a-guŋŋi pu.

An yaa sá ŋwiimpuɔɔɔ, kunyeeuɔɔɔ,

baa pée máaǹ kí nīn kā ki ŋmí.

«Nimbi bin di téetí ti-Dindaan

Jeerusaleem puee,

ní taa ŋùŋfì.

7 Ní taa pée yàntī ú ŋùŋfì kí tin sāā ŋyunti ŋun

u làá dāá fàtīí yòon̄ Jeerusaleem tiŋki yilpu

ní duulinya kɔkɔ ń nīn nyɔ́ŋkí-kèe.»

8 Ti-Dindaan pūtì ki pōoǹ yii:

«Man ni-Dindaan un sá Mpɔŋkɔdaanee

nín lī puee sɔ̀.

Dalba dalba maa làá ti dū a-kpaajinti

kí tīī a-nannanliibi bí jī,

dalba dalba binicambi kaa làá ti nyɔ̀

a-damam min a gīī digìńdi ki kée.

9 Ama bin cáń tikpaajinee di làá dāá jī-tì

ní kí dāá nyɔ̄ŋkì man ni-Dindaan.

Bin di yaa láa kītì fiinyi subiliŋee

di làá dāá nyɔ̀ ŋi-damam

m-Circir kɔŋkooŋŋu cindin.»

10 Jeerusaleem yab, nyāmaan,

ní nyāmaan kitiŋin malaa.

Ní cátímaan nsan m-nibul ń dī.

Ní gbīŋkìmaan abɔbil didandi pu

kí kóom̀maan ataŋkpee kí fá

ní kí cóoḿmaan kiŋaabiki anibul nimbiin.

11 Tibɔti tin ti-Dindaan sòon̄

bi tin gbìl̄-tì doooo kitiŋ kuntilaŋkee sèé:

«Ní tùkùmaan Siiyɔn tiŋki yii:

<Kpèè a-Fiiliu di dòońee.

Kpèè úǹ di dòoń ki ŋúbiń u-paatee,

u-tundi paatii di līiń u-nyɔkɔpuee^b.>

12 Bi làá dāá yíiń a-nib yii

<Dinibul din di bí circiree>,

<binib bin ní ti-Dindaan dá ki líìyee>.

Baa ti làá yíiń-si yii <kitiŋ kin bi dūu fée>,

bi làá dāá nīn kíǹ ki yíì-si yii

<Kitinneeŋkaai ní>».