Yeesaya 61

Ti-Dindaan tuuŋŋu tundi nì ŋu-nyɔɔbundi

61

1 Ti-Dindaan Unimbɔti

Fam bí m-pu^a.

Tiŋman, u lēē-mi ḿ sòoǹ

tibɔmɔntiil kí tīī biwɔfib.

U túnní-mi ḿ cáaǹ

bin pɔbiliŋ bíil̀ee,

kí bāakì kí tùkù bin bi cúú kuyuŋuee yii

bi làá líí-bi,

kí tùkù bisarkadambi yii

bi làá ká dibatɔl.

2 U túnní-mi ḿ bāakì kí tùkù binib yii:

«Dibindi din ní ti-Dindaan

làá sɔ̄ bi-saayee sèé!

Ŋwiin ŋun ní ti-Dindaan làá tɔ̀

u-nannanliibi ipɔntoonee sèé!

U túnní-mi ḿ sɔ̀ŋkì

bin kā dikpoolee pɔbil^b.

3 Siiyɔn pu ní bi kā dikpool.

M làá pítí ŋfantam min bi dūu pùkū bi-yilee

kí dū ŋŋaamɔnti kí fìn̄ bi-yiliŋ.

M làá cúú kpɔsata kí pèetī-bi

ní kí dū ŋkpam min sɔ́fèe kí ŋmìtī-bi.

M làá dū dijiŋaabɔkutil kí pèen̄-bi

ní dí fōō diwuŋyɔtil paaŋŋu.

Niinee bi làá dāá yíiń-bi yii

isufi in tìì Unimbɔti tinyoolee,

bukpaa bun dàkà ti-Dindaan nyootee.

4 Bi làá dāá fàtīí mā

dooooyee guŋkatiŋ,

bi làá dāá fàtīí mā

dooooyee digbuŋkatiŋ.

Bi làá dāá fàtīí náań

ntimu mun bi nìn nāaǹee,

ntimu mun bi nìn nāaǹ abin abinee.

5 Binicambi làá dāá dāan̄

kí nīn kpàá ni-piii nì ni-ŋoobui.

Laaba nib làá dāá dāan̄

kí nīn kù ni-sati nì ni-fiinyi kpaaŋŋi.

6 Nimbee, bi làá dāá yíiń-ni yii

<Ti-Dindaan saraaŋaliibi>.

Bi làá dāá nīn yíì-ni yii

<Ti-Nimbɔtiu tɔntɔnliibi>.

Ni làá dāá jī atimbun nib gaajawanti pu,

ní kí dāá nīn gà ni-biŋŋi bi-gaajati pu.

7 «An nín bàà sá icoo ń cúú-nee,

ni làá dāá fōō jilma mili pu.

An nín bàà sá bí sìì-ni puee,

ni làá nīn fàal̀ dijandi din ni fōōyee pu.

Di sá yii ni làá dāá fōō

ni-tiŋkin difakal mili pu,

ní kí dāá nīn bí ifaal

in kaa cáá dikúntilee poon.

8 Di sá yii man ni-Dindaan

néeń ibaamɔn bɔti ní,

m ná bunaayubu nì tin kaa bí deedeeyee.

M làá dāá pà-ni ni-paati

nín pée sá puee ní deedee,

m làá dāá yóoń man nì ni kansikin

mpèé ŋun làá nīn bí ki cá jaanjaanee.»

9 Ni-naantiibi làá dāá nyā diyindi

atimbun ŋin kíǹee kɔkɔ poon,

binib làá dāá béé-bi anibul kansikin.

Bin kɔkɔ di yaa láa pée ká-bee

làá dāá béé yii bíǹ di sá

dinibul din boon ti-Dindaan bīiǹee.

Ijaam laŋŋu

10 An mɔ̄ǹ-mi tikpil m-Dindaan pu,

m bí dipɔɔpindin m-Nimbɔtiu pu.

Di sá yii u dū difiil ki pēeǹ-mi

kii dibɔkutilee,

ní ki dū u-deedeeu ki bīiǹ m-pu

kii dibɔkutipaaŋkaalee

kii unimpucaan cal un di dū

jiŋaal ŋaabuŋu ki fìn̄ u-yilee,

a lì kii unimpucaan di dū

abeedimbil ki nyáantì u-bee^c.

11 Tiŋman, kii kitiŋ nín yàntī

tiwan ń pā kí nyā pu,

ní bukpaa ń yàntī ŋwambool ń nyā puee,

míǹ ní ti-Dindaan làá yàntī

deedee nì inyɔŋki ń pā kí nyā

atimbun kɔkɔ nimbiin.