Yeesaya 60

Jeerusaleem làá nīn sá ŋwalifi ki tīī duulinya

1 Jeerusaleem, yīkì kí ŋmíntí,

di sá yii a-walfiŋu bāań,

ti-Dindaan nyooti nyáń a-pu kii ŋwìińee.

2 Tiŋman, kpèè dibɔmbɔndi bīī kitiŋ pu

ní kunyeeu mɔ́ ki bīiǹ anibul pu.

Ama sii puee, ti-Dindaan làá nyā kii ŋwìińee

ní u-nyooti ń ŋmíntí-si.

3 Atimbun làá còom̀

kí dāan̄ a-walfiŋu cee,

ní bibɔtiibi ń dāá dāan̄

ŋwalifi ŋun nyáń a-puee cee.

4 Yáatí a-yil kí kpèè kí màntīí tū,

bi-kɔkɔ kóoǹ ki kpáfì ki dòoń a-cee.

A-jipɔmbi nyánní ndandati ki dòoń,

binib ŋúbiń a-bisalib ki cāabìń.

5 A làá dāá ká míǹ ní án mɔ̄ɔkiǹ-si tikpil,

a-pɔbil làá dāá pīil̀ ní kí sɔ̀ŋkì.

Di sá yii tiŋkub gaajati

làá dāá kpìntìń kí dāan̄ a-cee,

ní atimbun gaajawanti

ń dāá kóoǹ kí dāan̄ a-cee.

6 Igutaamu tikpil làá dāá kóoǹní kí léeń a-pu,

án dāa sá Madiyan nì Eeyifa timmu gutaamui.

I-kɔkɔ làá dāá nyānní Sabaa tiŋkin ní kí dāan̄.

I làá dāá nīn tú sindaariya nì talaalutuukaa,

ní kí dāá nīn gà ilan ki nyɔ́ŋkí ti-Dindaan.

7 Keedaar tiŋki piii nì ki-ŋoobui

làá dāá kóoǹní kí kpāfì a-nimbiin.

A dāa ŋūǹ kí dū Neebayɔti tiŋki pijaai

kí ŋá a nín là puee.

Bi làá dāá cáá-i kí jɔ̄m̀ m-saraafaŋŋu pu,

ní ḿ dāá fōō saraabi bin a làá dū-i kí ŋée.

M làá dāá nyāantì m-diiku ní kí tīī-ku tinyool.

8 Bilab di bínní lapu nee ní?

Bi ŋàaǹ kii atagbanee,

a lì kii abeenanjil di ŋàaǹ

ki cá ŋi-diiŋŋi watil púee.

9 Ntimu mun nnyim māntìi túee máká m-pu.

Taarsiisi tiŋki meelab di līiń nyɔkɔpu

ki cāabìń a-jipɔmbi bin bíń ndandatee,

nì bi-nimbiliŋ nì bi-sindaariyau.

Bi dòoń kí tīī ti-Dindaan a-Nimbɔtiu tinyool,

kí tīī Isirayeel Circir Nimbɔtiu tinyool,

di sá yii úǹ di tīī-si jilma gbanti.

10 Binicambi di làá fàtīí mā a-guŋŋi

ní bi-bɔtiibi ń dāá nīn bí a-tundin.

Di sá yii m-ŋuul poonee m nìn dáaĺ a-tafal,

ama m-niti poonee, m làá dàkà-si m-saasɔl.

11 A-punyɔmmu dāa pée wāā ní.

Mu làá dāá nīn pée wāā ní ŋwiimpu nì kunyeeu.

Niinee ní bí dāá cáań atimbun ŋin kíǹee

gaajati kí kɔ́ǹní^a,

ŋi-bɔtiibi dāa pá tɔb pu kí kɔ́nní.

12 Atimbun nì abee ŋin làá dāá yíí

kí taa nín̄ bí a-tundinee làá dāá wāŋkì.

Atimbun gbanti làá dāá nàan̄ ní pílpil.

13 Leebanɔn tiŋki nyooti làá dāá dāan̄ a-cee,

ki kpáaǹ idɔpiŋkaa kɔkɔ dicilpu.

I làá yàntī m-circir kɔŋkooŋŋu ń nīn ŋān̄.

Míǹ ní m làá ŋá kí tīī

laakin m-taaŋi yūlifée tinyool.

14 Binib bin nìn ŋúb́-si ki sàantée jipɔmbi

làá dāá dāan̄ kí sìntīǹ bi-ba taapu kí tīī-si.

Bin kɔkɔ nìn kpèé-si fámee

làá dāá gbàan̄ a-taaŋi taapu.

Bi làá dāá yíiń-si yii

<Ti-Dindaan tiŋki>,

15 Bi nìn dū-si ki fá,

kaa nìn là a-bɔti,

ní báà ubɔ kaa nìn gíti dòoń a-cee.

Kɔŋkɔnnee m làá nyāantì-si

ní binib ń nīn fàal̀ a-pu

kí nīn cá abin abin.

16 Atimbun ŋin kíǹee di làá dāá kpíiǹ-si

ní á dāá jī bibɔtiibi gaajawanti.

Niin ní a làá dāá béé yii

man a-Dindaan di sá a-Fiiliu,

un dá-si ki líìyee di sá

Jaakɔb Nimbɔtiu Mpɔŋkɔdaan.

17 An nín bàà sá ḿ cáań tasa kútee,

sindaariya ní m làá cáań.

An nín bàà sá ḿ cáań tikútee,

animbil kúti ní m làá cáań.

An nín bàà sá ḿ cáań idɔee,

tasa kúti ní m làá cáań.

An nín bàà sá ḿ cáań ataŋkpeeyee,

tikúti ní m làá cáań.

Man puee, ŋgbansɔŋfi

di làá nīn kpòotī-ni

ní deedee ń nīn sá ni-kpiliu.

18 Baa làá ti gbìl̄ bi sòoǹ

tipɔmbɔti pu a-tiŋkin,

kaa làá ti gbìl̄ bi sòoǹ

dinàandi àá dibiildi pu

a-tiŋki kpaanyɔmmu poon.

A làá dāá nīn yíì a-guŋŋi yii <Difiil>,

kí dāá nīn yíì a-punyɔmmu yii <Inyɔŋki>.

19 An kaa ti làá nīn sá ŋwìiń

di làá nīn ŋmíntí-si ŋwiimpu,

àá uŋmal kunyeeu.

Man ni-Dindaan a-Nimbɔtiu

di làá nīn sá-si ŋwalifi kí nīn cá jaanjaan,

ní kí nīn ŋmíntí-si nì m-walifiŋu kɔkɔ.

20 Kí yòon̄ kí nīn cée,

a-wìiŋ́ŋu kaa làá ti jēetí,

ní a-ŋmaliu kaa làá ti wāŋkì.

Di sá yii man a-Dindaan

di làá nīn kíǹ ki sá-si

ŋwalifi kí nīn cá jaanjaan^b.

Iwiin in a dūu kāl̀ dikpoolee làá kúntí.

21 A-nibul kɔkɔ làá dāá nīn sá deedeedambi,

bi làá dāá fōō kitiŋ difakal kí nīn cá jaanjaan.

M dū m-ŋalii ki máń-bi bí lēē m-nyooti kí dàkà.

Bi sá kii busubu bun man m-ba cóoǹee ní.

22 Ni-kansikin un pée sá kiwaayee

làá dāá màal̀ binib kutuku,

ní un kaa bí tibanee ń dāá kpántí ditimbundi din pɔ̄ɔ̄yee baa.

Ŋyunti yaa láa bāańee, man ni-Dindaan

làá dāá yàntī tibɔti gbanti ń jītí malaa malaa.