Yeesaya 63

Ti-Dindaan làá sòoǹ anibul bɔti

1 Ŋma di nyánní Eedoom tiŋkin,

Bɔsiraa, ki-tiŋyilin ní?

Udaan wampeeŋkaati jōotì mmam.

U pēē tiwampeeŋkaal tinyaandi

ki còom̄ diyil gáań

ki máká u-pɔŋŋu pu.

Ti-Dindaan bí yii:

«An sá man di sòoǹ

binib bɔti nì deedee,

m cáá mpɔn kí fīī-ni.»

2 «Ba pu ní a-bɔkutil jōotì mmam,

ní a-wampeeŋkaati náań nì

unil un tà ki fɔ́bití

fiinyi subiliŋ kubɔbikunee?»

3 «Man baba di tāā ki fɔ́bitì

fiinyi subilŋ kubɔbikun.

Anibul kansikin,

báà uniseen kaa nìn kútì m-pu.

M tàn̄ ki mátì-bi m-ŋuul poon,

ní ki nàn̄-bi m-bum poon.

Bi-fatikuu yāaǹ m-bɔkutiŋ pu,

ní m-wampeeŋkaati kɔkɔ mántì^a.

4 Di sá yii m lēē m-pɔbilin

kí tɔ̀ ipɔntoon ní.

Ŋyunti bāań ḿ fīī m-nibul kí líí.

5 M nìn kpēē

ama kaa ká ubɔ ń tūtuǹ-mi.

An nìn ŋá-mi bitii.

Ubɔ kaa nìn bí kí tíkiń-mi.

Niinee ní m-ŋal pɔŋŋu tútuǹ-mi,

ní m-ŋuukpaandi tīī-mi mpɔn.

6 M-ŋuul poonee

m nàn̄ anibul kunaau,

m nyūntì-bi m-bum

kii ndaamee bi gbí,

ní ki yāntì bi-fatikuu pùub̄ kitiŋ.»

Ti-Dindaan nín ŋáań u-nibul tiŋan tiŋyee

7 M làá téetí ti-Dindaan ŋanti

nì tin pu ti máaǹ kí nyɔ̄ŋkì-uee pu:

tin kɔkɔ ti-Dindaan ŋá ki tīī-tee,

tiŋaŋkpaandi tin u ŋá ki tīī Isirayeel nibulee,

tin kɔkɔ u ŋá u-neendin,

nì u-laŋŋaŋfitiikuee pu.

8 U nìn lī yii:

«Bi lafun sá m-nibul ní,

bi sá m-jipɔmbi bin

kaa làá mɔ̄ntì-mee ní.»

U nìn kpántì bi-fiiliu.

9 Bi-nimbinaamandi kamaa poonee,

an kaa nìn sá ntuun ŋubɔ di fīī-bi,

ama ti-Dindaan u-ba di nìn fīī-bi.

U-neendi nì u-saasɔl poonee,

u nìn fīī-bi ki líì.

U nìn yōoǹ-bi ki túǹ

kii iyunti in nìn jítèe poonee.

10 Ama bíǹ nìn jáń nì u,

ní ki nìn kɔ́ǹ u-Circir Fam kunimbaau.

Niinee ní ti-Dindaan dūu kpántì bi-nannanliu,

ní ki kíĺ ki bíi jáà nì bi.

11 Niinee ní u-nibul téetì iyunti in jítèe pu,

iyunti in Mooyiisi nìn bí^b di-ceeyee pu ki lī yii:

«Un di nìn nyántì u-picaŋkpuŋku nì u-pikpaaliu

dimɔɔlinee bí la?

Un di nìn yāntì u-Circir Fam

bí bi-kansikinee bí la ní?

12 Úǹ di nìn tāntì u-ŋampɔfiŋu

ki cúú Mooyiisi ŋaŋgiil ki tíkiǹ-u.

Úǹ di nìn cúú nnyim

ki yākatì mili bi-nimbiin,

ní ki nyáń diyindi kí nīn cá jaanjaan.

13 U nìn yāntì bi cōom̀

tiŋku un nyóòyee poon ki dūtì

kii utaamu un sáń kuteeunee,

kaa nìn gbéetì ki lítì.

14 Bi nìn náań nì tiwaŋkuti

tin sìntī ditantakalinee ní.

Ti-Dindaan Fam nìn kpòotī-bi

ki cáǹ diŋuŋfil laŋki ní.»

Míǹ ní ti-Dindaan,

a nìn kpōotì a-nibul

ki nyáń diyiŋkpaandi.

Isirayeel yab mēē ki gbāam̀ bi-Dindaan

15 Kpèeń doooo yilpu, circir paaŋŋu

nì laakin cáá kunyaaŋŋu a kóòyee.

Kpèè tin bíi jītí ti-puee.

A-neendi din nìn fòol̄ ti-pu lìblibee bí la?

A-pɔŋŋuee bí la?

A-poommɔŋŋu nì a-laŋŋaŋfitiikuee bí la?

16 Di sá yii sii di sá ti-Baa.

Abraam kaa nyí timbi,

Jaakɔb mun kaa nyí-ti.

Sii ti-Dindaan di sá ti-Baa,

sii ní bi yíì doooo jaanjaan

yii <Ti-Fiiliu>.

17 Ti-Dindaan, ba ŋá ní

a yāntì ti wáŋkì ki fá a-saŋyi,

ki yāntì ti-pɔbiliŋ tīlifì taa ti fàŋkí-si míǹ?

Dineendi din a cáá timbi a-tɔntɔnliibi

bin sá a-nibulee puee, fàtīí gítiń.

18 Timbi a-circir nibul,

taa kpáàa kāl̀ kitiŋ kin a tīī-tee ni ki yúntì.

Ti-nannanliibi nàn̄ a-circir paaŋŋu dúsi dusi.

19 An yúntì tikpil,

a nín kaa ti jíń ti-pu dibeel,

ní baa ti yíì-ti nì a-yindee.

Áà! A yaa bàà cúú kutagbɔŋu

ki dáaĺ ki cátì ki kpákatìń,

ajoon bàà làá cìŋkì a-nimbiin ní!