Yeesaya 41

Unimbɔtibaamɔn nì awaa bɔti

1 Ntimu mun nnyim māntìi túee,

ŋmīĺmaan kí pīlifiǹ-mi.

Anibul kɔkɔ nib, fàtīí kámaan kunyannyaau.

Ní sútiḿmaan kí dāá sòoǹ.

Ti-kɔkɔ ń cùú kpāfì ibɔsoon laŋki.

2 Ŋwìiń nyalaŋki púee, ubɔ dòoń.

Laakin kamaa u yaa jítèe,

u jáà ki jīǹ ŋma ní.

Ŋma di yāntì u kíĺ nsan ní?

Ŋma di dū anibul ki ŋá u-ŋaan ní?

Ŋma di dū bibɔtiibi ki ŋá u-taaŋi taapu ní?

U-tàataajiki càkà-bi músi musi

ní u-tɔbu jì-bi kii kubuŋu nín yòontí tifeel puee.

3 U jì-bi ki jītí bi-kansikin báà tiba kaa ŋáań-u,

ní u-taaŋi kaa kpáàa gbèetī kitiŋ gba.

4 Ŋma di ŋá tíǹ gbanti kɔkɔ?

Úǹ di bɔ́ntì tibɔti nín dòoń ki jītí puee

ki síiǹ doooo ŋkilkaamin.

Man di sá ni-Dindaan.

M sá upeepeekaa,

ki làá nīn pée sá míǹ

áli duulinya kúntitam.

5 Ntimu mun nnyim māntìi túee yab

ká-u ní ki fāŋkì.

Kitiŋ gbeennyɔkɔ yab ká-u ní bi-wunti bíi jìkì.

Bi sútí ki pìlìń, bi kāń nsan pu ki dòoń.

6 Bi bíi tútúǹ tɔb,

ní báà ŋma lì u-nabiki yii: «Ká dipɔbil!»

7 Ukpiŋkpiiti tìì goosimiiti kunyannyaau.

Ucaa un cáá dinantaŋkul ki gbáà ki jɔ̀lifī tikútee

tìì un gbáà ki tàntī-tèe kunyannyaau.

U tùkù ukúduntil yii: «An ŋān̄.»

Ní bí dū ipiin kí kpáá kí cúú diwaalee

án taa nín̄ cìŋkī.

8 Ama sii Isirayeel, a sá m-tɔntɔnliu ní,

Jaakɔb, a sá dinibul din ní m lēēyee ní,

a sá m-bɔɔ Abraam naantiiu ní^a.

9 M cūtì ki nyàabìń-si doooo kitiŋ gbeennyɔkɔ ní.

M yíiń-si doooo ntindandatimun ní,

ní ki lī yii: <M-tɔntɔnliu di sá-si,

m lēē-si ní, maa dū-si ki fá.>

10 Taa fàŋkì, kun puee m bí a-cee.

Taa nín̄ kā ki yáliŋkí,

kun puee m sá a-Nimbɔtiu.

M dòoń kí tīī-si mpɔn, kí tūtuǹ-si,

kí dū m-ŋaŋgiil ŋun pɔ̄ɔ̄ ki tìì dijajilee

kí wúń a-pu.

11 Tiŋman, bin nyàab̀-si tikpitilee,

icoo làá cúú-bi gbòooo bí fá bi-jilimau.

Bin jáà nì see,

án làá nàan̄-bi bí kpú kí céetí.

12 Bin tákà-si tibɔtee,

a làá dāá nyàab̀-bi kaa làá ti ká-bi.

Bin jáà nì see,

án làá nàan̄-bi ní bí wāŋkì.

13 Di sá yii man a-Dindaanee,

m sá a-Nimbɔtiu ní.

Man di ŋúb́ a-ŋal

ní ki bí-si yii: «Taa fàŋkì,

m làá jòoń-si.»

M dòoń kí jòoń-si

14 Jaakɔb nibul, sii un kpántì kii ujiliŋkpaamee,

sii un kpántì kii utaŋkpiilee, taa fàŋkì.

M dòoń kí jòoń-si.

Man a-Dindaan di sòon̄ míǹ.

Un di làá dā-si kí lííyee

di sá Isirayeel Circir Nimbɔtiu.

15 Kpèè, m dū-si ki kpántì kii tɔrɔku un

bi fù tijimpin pu an gbátée upɔmpɔɔn ní.

A làá nà kí mátí ajoon ní dúsi dusi,

kí yàntī ŋgbantamu ń kpántí kii tifeelee.

16 A làá dāá càatī-bi kubuŋu ń yòon̄-bi,

ní kunaakpaabuŋŋu ń yàaǹ-bi an kɔkɔ pu.

Ama siiyee, a làá dāá nīn tátí ki fàal̀ ti-Dindaan pu,

kí dāá nīn làntī Isirayeel Circir Nimbɔtiu pu.

Kuteeu làá kpántí dinyimbɔbil

17 Bifalaadambi nì binandambi

bí ki nyàab̀ nnyim kaa bíi kāntí,

nnyinnyoo cúú-bi ní bi-neeŋyi kūń.

Man ni-Dindaan làá fōō bi-wimmeem,

man Isirayeel Nimbɔtiu kaa làá dū-bi kí fá.

18 M làá yàntī ibun ń pùub̀ ajoon

ŋin yilpu kaa cáá isufee pu,

kí yàntī inyimbul ń cɔ́tí atantaka poon.

M làá yàntī kuteeu ń kpántí anyimbɔbil

ní kí yàntī kitiŋkuliŋŋi ń kpántí inyimbul.

19 Kuteeunee, m làá dāá cóoń

seedir nì akasiya nì miirti nì ɔliifi sufii,

ní kí dāá cóoń kitiŋkuliŋŋi pu

siipreesi nì piini nì buwii sufii dicilpu.

20 Mimmee báà ŋma làá dāá ká,

báà ŋma làá dāá béé,

báà ŋma làá dāá dáań kí ká kí gbìl̄ taapu

yii ti-Dindaan di túń atuun nee,

Isirayeel Circir Nimbɔtiu di náań-tì.

Awaa kaa bí tiban

21 Ti-Dindaan bí yii:

«Ní cáaḿmaan ni-bɔti kí bíĺ bí sòoǹ kí tīī-ni»,

Jaakɔb nibul bɔtiu bí yii:

«Ní dāá lìmaan tin ní ni cááyee kí mɔ̄tì ni-ba pu.

22 Sútiḿmaan kí dāá tùkù-ti tin bí ki dòońee.

Tibɔti tilati di dɔ́miń ki jítì ní?

Ní dàkà-ti-tì ní timbi ń dàkafì ti-pu,

àá ní tùkù-ti tin di bí ki dòoń foolboonee,

ní tí béé tin bí ki dòońee.

23 Ní tùkùmaan-ti tin làá fu dāan̄ foolboonee

ní tí béé yii ni lafun sá inimbɔti.

Ní ŋámaan tiŋan àá tikpitil tiba

tí ká án ŋá-ti bitii ní kufaaŋŋu ń kɔ́-ti.

24 Ama nimbi ni-ba kaa bí tiban,

tin ni ŋáańee mun kaa pée sá tiba.

An sá ntimbiil ní unil ń lēē kí nīn nóó-ni.

25 M lūkutìń unil ubɔ u yíkìń ŋgan pú ki dòoń.

Doooo ŋwìiń nyalaŋki pú ní m yíiń-u.

U bí ki tàń biyidambi pu kii bi nín tà tikpati puee,

a lì kii uyɔɔmaati nín tà kuyɔkɔu puee.

26 Ŋma nìn sòon̄ tin bí nee doooo ŋkilkaamin

tí bàà nín̄ nyí-tì ki yóoǹ?

Ŋma nìn sòon̄-tì doooo cannaaku

tí bàà lì yii: <A sá míǹ ní?>

Báà ubɔ kaa nìn sòon̄ ti-pu,

báà ubɔ kaa nìn wāaǹ kinyɔkɔ,

báà ubɔ kaa nìn gbìl̄ ni sòon̄ ti-pu.

27 Man di péé péé ki tùkū Siiyɔn yii:

<Kpèè, bi sèé!>

M tú ntuun ŋu cūnnì

tibɔmɔntiil Jeerusaleem tiŋkin.

28 «M kpēē ki māntìi tú kaa ká báà uniseen.

Anibul ŋin kíǹee nimbɔtii kansikinee, usaŋkil kpá!

M bàà làá bàlifì-i ní í bàà tùkù-mi.

29 Ama binibee kaa bí tiban.

Tin bi ŋáańee kɔkɔ sá fám ní.

Bi-waaŋi kɔkɔ sá kubuŋu ní ki sá fám!»