Yeesaya 40

DIJANLILIITIIL

ISIRAYEEL YAB PƆƆSƆŊKIL

(40–55)

Ní sɔ̀ŋkì m-nibul pɔbil

1 Sɔ̀ŋkìmaan m-nibul pɔbil,

sɔ̀ŋkìmaan bi-pɔbil,

ni-Nimbɔtiu di lī míǹ.

2 Sòom̀maan kí sɔ̀ŋkì Jeerusaleem pɔbil,

ní bāakì kí tùkù-kì yii ki-tumpɔɔŋi dóò,

kì pàn̄ ki-kpitii kɔkɔ pu,

ti-Dindaan yāntì kì pàn̄^a

ki-yìntitam kɔkɔ pɔndi mili pu.

3 Nneel ŋubɔ bíi báakí ki lì yii:

«Ní bɔ́ntímaan nsan kuteeun kí tīī ti-Dindaan,

ní tàntīmaan nsanjaa kitiŋkuliŋŋin kí tīī ti-Nimbɔtiu^b.

4 Ní gbīŋkìmaan atantaka kɔkɔ,

kí bìtī ajoon nì ŋgbantamu kɔkɔ!

Ní tàntīmaan ipaan in bí kpábiti kpabitee,

kí yàntī ŋgbantamu ń kpántí atantaka.

5 Niinee ti-Dindaan nyooti làá nyā mpaampiin pu,

ní inifunaan kɔkɔ ń dāá wāl̀-tì.

Ti-Dindaan di sòon̄ míǹ^c.»

6 Nneel ŋubɔ bí yii: «Bāakìm̄!»

Ní m bālifì yii: «Ḿ bāakì yii ba?»

Ní ŋu kíí-mi yii: «Bāakì yii binib kɔkɔ sá kii kumoouee ní,

ní bi-nyaaŋku sá kii tisatin pumpukumee.

7 Ti-Dindaan yaa púfì kumoou nì nsupumpukumee puee,

kumoou kōō ní nsupumpukum ń yɔ́ĺ.

- Tiŋman, binib kaa pée pɔ̄ɔ̄ kii kumoouee ní.

8 Kumoou kōō ní nsupumpukum ń yɔ́ĺ,

ama ti-Nimbɔtiu úǹ bɔti pée bí ní kí cá jaanjaan^d!»

Tibɔmɔntiil tin sá bí dūú bāakèe

9 Sii Siiyɔn un ŋúbiń tibɔmɔntiil kí nàatēe,

jɔ̄m̀ dijool din fɔ̀kɔ̀ee yilpu kí téeń mpɔn.

Sii Jeerusaleem un ŋúbiń tibɔmɔntiil kí nàatēe,

téeń mpɔn mpɔn, á taa fàŋkì báà tiba.

Tùkù Juuda timmu yii: «Kpèèmaan ni-Nimbɔtiu!

10 Kpèèmaan ti-Dindaan Unimbɔti!

U dòoń nì mpɔn.

U cáá mpɔn kí jī dibeel.

Kpèèmaan, u cāabìń u-paati,

u ŋúbiń u-gìńdi paatii^e.

11 U sá kii upikpaal un

kpàá u-picaŋkpuŋkuee ní,

u cáá u-ŋal ki kōontí u-pibiliŋ ki kpáfí.

U yòontí u-pibiyaamu ki bìb̀,

ní ki kpòotī ipinaati in cáá

mbiyaamu ŋáaḿee ki cáǹ nsɔŋfin^f.»

Duulinya Dindaan di sá ukpaan ki sá uciŋfiti

12 Ŋma di ŋmāntì tiŋku nyim u-ŋantilin?

Ŋma di yātì u-ŋambiyaamu ki dūu ŋmāntì kutagbɔŋu?

Ŋma di dū gbakiti ki ŋmāntì kitiŋ kɔkɔ tam?

Ŋma di ŋmāntì ajoon saniyaluntikaa pu,

àá ŋgbantamu saniyapaaŋkaa pu?

13 Ŋma di ŋmāntì ti-Dindaan Fam ki ká?

Ulanil di sáŋkì-u dalba u ŋá tiba ki ká?

14 Ŋma ní Unimbɔti pée bālifì isaŋki

kí ŋmā kí sòoǹ tibɔti tiŋan,

àá udaan dàkā-u dinyil àá iciin?

15 Kpèè, atimbun sá kii nnyim nín nyēeń

gbakiti nyɔɔgbandi kí jōō kitiŋ puee ní,

a lì kii dibul kibilii di pá saniya puee.

Kpèè, ntimu mun nnyim māntìi túee

nyiŋfiŋu bí kii ŋkpɔŋkpɔmee ní.

16 Leebanɔn tiŋki dɔi kɔkɔ kaa bà

bí kpāā ŋŋmi nsaraafan pu,

ní ki-waŋkuti kɔkɔ kaa bà bí ŋá ti-Dindaan saraawɔkaa.

17 Atimbun kɔkɔ kaa pée bí tiban u-nimbiin,

ŋi-kɔkɔ sá fám ní u-cee,

ŋi bí kii kubuŋuee ní.

Baa ŋūǹ kí dū tiba nì tiba kí ŋmàntīǹ Unimbɔti

18 Ŋma ní ni cáá Unimbɔti ki ŋmàntīǹ ní?

Kunaŋu kulɔkɔ ní ni làá dū-u kí nántíǹ?

19 Diwaalaaa?

Ukúduntil di dūntì tikúti ki dūu mɔ́ɔ́-dì,

ní goosimiiti dū sindaariya ki nyūntì-dì

ní ki mɔ́ɔ́ animbil kúti léeŋkaati ki léeǹ-dì^g.

20 Un di yaa kaa cáá ŋŋmam kí ŋá an saraauee,

nyàab̀ ndɔ ŋun kaa bùkùee

ní kí tīī ukpiŋkpiiti un ŋūǹ u-tundi tiŋanee,

ni úǹ ń dūú kpítí diwaal kí síiń-u.

21 Mimmee naa nyáaa?

Baa sòon̄ ni gbìl̄aaa?

Baa nìn báakì ki tùkū-ni doooo ŋkilkaaminaaa?

Mimmee naa nyàab̄ ki béè kitiŋ náanliuaaa?

22 Ti-Dindaan kóò kutagbɔŋu

kun dàn̄ kitiŋ yilpuee,

ní binib bin kóò kitiŋ puee

bí u-cee kii icatee.

U kpátì kutagbɔŋu kii ŋŋaalikiŋkaayee,

ní ki dū-ku ki cóoǹ kii tantee ki kóò.

23 U nāaǹ duulinya yidambi,

ní ki yāntì kitiŋ pu bɔsoonliibi kaa ti pée bí tiban.

24 Bi tin lì yii bi lèekī-bi,

kí kàan̄-bi,

bí kàl̄ kí báań inyaanee

ní ti-Dindaan fooku

ń ŋàtī-bi kí fá ní bí kpā,

ní kunaakpaabuŋŋu ń yòon̄-bi kii tifeelee.

25 Unimbɔti Circirdaan di bālifì yii:

«Ŋma ní ni ŋūǹ kí dū-mi kí ŋmàntīǹ ní?

Ŋma di ŋūǹ kí nīn sá man juti ní?»

26 Wáam̀maan kí kpèè kutaa.

Ŋma di náań iŋmalbijaa ní?

Ŋma di yàntī i-kɔkɔ nyēē

ki kpáfí kii dijanjakitilee ní?

Úǹ di yíì uŋmalbija kamaa nì u-yindi.

U cáá dibaatandi nì mpɔŋkpaan,

an puee u yaa yíiń-iee,

i-kansikin báà ubɔ kaa fɔ́tí.

Bin wunti bíi wɔ̀b̀ee làá fàtīí ká mpɔn

27 Isirayeel, Jaakɔb nibul,

ba pu ní a sòoǹ yii:

«M-Dindaan kaa wāĺ tin bāań-mee,

m-Nimbɔtiu kaa pée wāĺ man baamɔŋyi.»

28 Mimmee saa nyáaa?

Baa sòon̄ a gbìl̄aaa?

Ti-Dindaan di sá Unimbɔti kí nīn cá jaanjaan.

Úǹ di náań kitiŋ kí yòon̄ ki-gbeennyɔkɔ kiba

kí cáá tin sāā kin kíǹee.

Waa wɔ̀b̀ dalba dalba, kaa tí gì mun.

U-nyil kaa cáá kigbeennyɔkɔ.

29 U tìì un kaa ti cáá mpɔnee mpɔn,

ki tìì un gīīyee kunyannyaau.

30 Binipɔmbi gba gì kí wɔ̀b̄,

bibaatandambi mun gbéetí ki lítí.

31 Ama bin máká ti-Dindaan puee

fàtīi pɔ̀ntī bi-pɔŋŋu ní.

Bi yíkí ki ŋàaǹ kii ikaabuee ní.

Bi sáń ama ní kaa gì,

bi còom̄ ama ní bi-wunti kaa yɔ̀tī.