Yeesaya 42

Ti-Dindaan tɔntɔnliu (nlampeepeekaa)

1 Ti-Dindaan bí yii:

«Kpèè, m-tɔntɔnliu^a,

m ŋúb́ u-ŋal,

m lēē-u ní m-pɔbil sɔ̀m̀ u-pu.

M dū m-Fam ki ŋá u-pu

ú dāá sòoǹ deedee bɔti

kí tùkù atimbun kɔkɔ.

2 Waa làá dāá nīn tátí

kaa làá dāá sòoǹ mpɔn,

baa làá dāá gbìl̄ u-nyɔkɔ pu adan pu.

3 Waa làá dāá púntí mmɔ́ɔn ŋun gíì ki gbàkēe,

waa làá dāá gbíntí fitila un bíi fòol̄ bílbilee.

Ama u làá dāá lēē tibɔti nín dɔ̄ nsan puee kí dàkà.

4 Waa làá dāá wɔ̀b̄, u-wunti mun kaa làá dāá yɔ̀tī

kí cáá sāā ŋyunti ŋun ní

u làá dāá yóoń kitiŋ pu tibɔti nín dɔ̄ nsan puee.

Ntimu mun nnyim māntìi túee

dāa kā ki cí kí fōō u-marab.»

Ŋwalifi làá ŋmíntí atimbun pu

5 Ti-Dindaan Unimbɔti

di náań kutagbɔŋu ní ki kpátì-ku ki dāntì.

Úǹ di kpátì kitiŋ nì tin kɔkɔ nyēē ki-puee.

Úǹ di tīī binib bin kóò ki-puee dimaŋfal,

ki tīī bin bí ki-puee kufoou^b.

U nín tùkū u-tɔntɔnliu puee sèé:

6 «An sá man ni-Dindaan

di yíiń-si deedee yíintam.

M ŋúb́ a-ŋal,

man di máń-si.

M làá dī a-pu ní kí ŋá mpèé nì dinibul,

sii di sá atimbun walifiŋu.

7 A làá ŋúbití bijɔfub nimbiliŋ,

kí nyāntí bisarkadambi bi-sarkadiiŋŋin,

kí yàntī bin pīī dibɔmbɔndinee ń nyā.»

8 Man di sá ni-Dindaan, m-yindi dee.

Maa làá dū m-nyooti kí tīī ubɔ fám,

kaa làá dū m-jilmau kí tīī awaa.

9 Tibɔpeekaal tíǹ jítì ki dóò dee.

M bíi báakí ki tùkù-ni tipɔn ní nee.

M bíi tùkù-ni tibɔpɔn gbanti

ní gbìl̄ kí wàatī ní tí nín bàń.

Ti-Dindaan làá tɔ̄ u-tundi

10 Ní gāāmaan nlampɔɔn kí nyɔ̄ŋkì ti-Dindaan.

Ní gāā ilan kí nyɔ̄ŋkì-u doooo kitiŋ kúntilaŋki,

nimbi bin bí ki còom̄ tiŋku puee

nì tin kɔkɔ di pée bí u-poonee,

nì nimbi bin kóò ntimu mun nnyim māntìi túee.

11 Kuteeu nì ntimu mun bí ku-poonee nib

ń tóoń ilan kí nīn gà mpɔn,

ki kpáaǹ ntimbilimu mun Keedaar yab kóòyee.

Binib bin kóò ditaŋkpal puee ń nīn gà ipampakalan,

bí nīn kāń doooo ajoon yilpu kúntí kunti ki fàal̀.

12 Bin kóò ntimu mun nnyim māntìi túee

ń tīī ti-Dindaan tinyool,

bí gāā ilan mpɔn kí nyɔ̄ŋkì-u.

13 Ti-Dindaan làá nyā kii ubaatandaanee

án lùkutī-u ú já kujaau kii ujanjalee.

U fáá njanjakuŋkuunti mpɔn

ki bɔ́ntì kí já nì u-nannanliibi.

Tin ní ti-Dindaan bɔ́ntì ki làá ŋée

14 Ti-Dindaan bí yii:

«An yúntì tikpil m kā ki ŋmí,

m cúú m-ba kaa lī tiba.

M bíi dùǹ kii unimpu di yáliŋkí imatiŋweenee,

m-fam bíi tìfī, m fòotī kaa bà.

15 «M làá kpēelikì ajoon nì ŋgbantamu,

kí yàntī kumɔsɔŋu kɔkɔ ń kpā.

M làá yàntī ibun ń kpántí kitiŋkuliŋŋi

ní kí yàntī anyimbɔbil ń fóotí.

16 M làá kpòotī bijɔfub kí tàkan̄

didandi din baa nyée pu.

M làá kpòotī-bi bí còom̀ nsan ŋun pu baa nìn nyée pu.

M làá yàntī bi-nimbiinee

dibɔmbɔndi ń kpántí ŋwalifi,

ní laakin kamaa aganlaka bée ń cúú tàntī.

Tin bí nee kɔkɔee, see m ŋá-tì,

an kaa cáá yii m làá yíí kí taa ŋá.

17 «Binib bin dū bi-mákal ki páaǹ awaa pu,

ki lì tiwan tin bi dū tikúti ki mɔ́ɔ́yee yii:

<Nimbi di sá timbi nimbɔtiiyee>,

làá tūlifì kí gítí boon,

ní icoo ń cúú-bi.

Dinibul din sá bijɔfub nì bitafakpaafubee

18 Nimbi bin sá bitafakpaafubee,

ní pīlifìmaan tiŋan!

Nimbi bin di sá bijɔfubee,

ní ŋúbitímaan kí kpèè!

19 Ŋma di sá ujɔfu,

án yaa kaa sá m-Tɔntɔnliu?

Ŋma di sá utafakpaafu

kii Ntuun ŋun m làá tɔ̄ee?

Tiŋman, ŋma sá ujɔfu

kii man ni-Dindaan nibulee?

Ŋma sá ujɔfu

kii man ni-Dindaan Tɔntɔnliu?

20 «Sii Isirayeel nibul,

a kántì tiwan tikpil,

ama aa cúú báà tiba ki síiǹ.

A cáá a-tafamɔnti,

ama aa gbìl̄ báà tiba.

21 Ti-Dindaan nín sá deedeedaanee puee,

an mɔ́ɔkiǹ-u ú dàkà yii

u-marau sá ukpaan ki ŋān̄.

22 Ama ni sá dinibul din ní

bi fúkúl̀ ki nāaǹee ní.

Bi cúú ni-wanti kɔkɔ ki fōō.

Bi dū ni-kɔkɔ ki tɔ́ mbòó poon sarka,

ki dū-ni ki bál̀ asarkadiinni.

Bi fúkúl̀-ni pílpil

ní ubɔ kaa bí kí jòoń-ni.

Bi cúú-ni ki cūnnì kuyuŋu,

ní báà ubɔ kaa lī yii:

<Gíiǹnímaan-bi!>

23 «Ni-kansikin ŋma làá pīlifì tibɔti nee tiŋan?

Ŋma di làá gíiǹ nlandɔkɔ

kí pīlifì-tì kɔŋkɔnnee?

24 «Ŋma di dū Isirayeel yab

ki tīī bi nāaǹ?

Ŋma di dū Jaakɔb yab

ki tīī bi fúkúl̀?

An kaa sá ti-Dindaanaaa?

Di sá yii ti yīntiǹ-u,

ki yíì kaa nóó u-saŋŋu

ní kaa ŋúb́ u-marab.

25 An pu ní ti-Dindaan kpáatì u-ŋuukpaandi

nì kujaau bilisii ki sītì Isirayeel yab pu.

Ku-poonee, bi sēē Isirayeel tiŋki ki māntìi tú,

ama ní ki-nib kaa pée gbìl̄ taapu.

Ŋŋmi fōō ki wùn̄ dinibul,

ama ní baa kpáàa fōotìi yīkiǹ!»