Yeesaya 37

Eeseekiyaasi cūtì dibalifil Yeesaya cee

(Kpèè 2 Bib 19.1-7)

1 Ubɔti Eeseekiyaasi nín gbìl̄ tin bi máafì-uee ní u cúú tiwan tin u pēēyee ki dáaĺ ki cátì, ki dū kutuku ki pēeǹ ní ki nín cá ti-Dindaan diikun. 2 U nìn dū Eeliyaakiim un kpèé ubɔti cindee, nì ubɔti gbaŋŋmaliu Seebina nì bisaaraaŋaliibi bin yúntèe ki tú Unimbɔti bɔnaatiliu Yeesaya, Amɔtisi jipɔɔn cee. Binib gbanti kɔkɔ nìn pēē kutukub ní ki cūtì. 3 Bi bàn̄ Yeesaya ceeyee ní ki bí-u yii: «Eeseekiyaasi nín sòon̄ puee sèé: <Díǹ wiiŋŋu nee sá-ti dinimbinaamandi nì ditafadaaldi nì icoo wiiŋŋu ní. A lì kii kibiki di bīń ki-na poon ki ŋmāntì bí bàà màal̀-kì, ama ní unaati kaa cáá ŋfam kí núuĺ kibiki ń nyānnée. 4 An yaa yíì ti-Dindaan a-Nimbɔtiu tin máaǹ ki gbìl̄ tibɔti tin Asuur bɔtiu janjakpiliu sòon̄ee. U-kpiliu túnní-u u dɔ́miń ki sīī Unimbɔti un bí dimaŋfalinee. An yaa yíì ti-Dindaan a-Nimbɔtiu tin gbìl̄ tibɔti tin u sòon̄ee, ki làá dáaĺ u-tafal. An puee mèè kí tīī u-nibul din kíǹee.>»

5 Niinee ní ubɔti Eeseekiyaasi tɔntɔnliibi bin u túee nín cá Yeesaya cee. 6 Bi bàn̄ee ní Yeesaya tùkū-bi yii: «Ní gítí kí tùkù ni-kpiliu yii ti-Dindaan nín lī puee sèé: <Taa fàŋkì anyɔɔbun ŋin a gbìl̄ Asuur bɔtiu janjakpiliu sòon̄ee, u nín sòon̄ ki bíil̀-mi puee. 7 Bi làá cáań tibɔti tiba kí tùkù ubɔti ní ḿ yàntī ú nīn gítí u-tiŋkin. U-tiŋkin niin ní m làá yàntī bí dū kitàataajiki kí kpɔ̀-u.>»

Seenakeeriibi fātìi kpìl̄ Jeerusaleem tiŋki

(Kpèè 2 Bib 19.8-13)

8 Ujanjakpilee nín gbìl̄ yii u-kpiliu Asuur bɔtiu yíkì Laakiisi tiŋki ki cūtìi bíi jáà nì Liibina tiŋkee^a, ní u mun nín cá niin ki cūtìi ká-u. 9 Asuur bɔtiu nìn gbìl̄ yii Eejipiti bɔtiu Tiiraka un sá Kuusi tiŋkinee dòoń kí já nì u. Niinee ní u tí tú binib Eeseekiyaasi cee ki bí yii: 10 «Ní cùú tùkù Juuda bɔtiu Eeseekiyaasi yii: <A-Nimbɔtiu un pu ní a dū a-mákal ki páaǹee ń taa kīil̀-si kí lì yii Jeerusaleem tiŋki kaa làá kɔ́ Asuur bɔtiu ŋaan. 11 Sisi a-ba gbìl̄ Asuur bɔtiibi nín ŋáaǹ ntimu mun kíǹee kɔkɔ pu ki nāaǹ-muee, ní sii dàkafī yii a làá ŋmátáa! 12 Goosan nì Karan nì Reeseefi timbuŋŋi nì Eedeen yab bin nìn kóò Teelasaar tiŋkin ní m-naanjab nìn nāaǹ bi-kɔkɔee, bi-waaŋi nìn ŋúń ki fīī-baaa? 13 Amaati bɔtiu nì Aripaadi bɔtiu nì Layiir nì Seefarfayiim nì Eena nì Iwa bɔtiibi bí la díǹ pu na?»

Ubɔti Eeseekiyaasi wimmeem

(Kpèè 2 Bib 19.14-19)

14 Eeseekiyaasi nìn fōō kugbɔŋu kun Asuur bɔtiu túnní bí cáań kí tīī-uee ki kàan̄. U kàan̄ ki dóòyee ní ki nín jɔ́ḿ ti-Dindaan diikun, ní ki kpátì kugbɔŋuee ki bíl̀ ti-Dindaan nimbiin. 15 U ŋá míǹ ki dóòyee ní ki mēē ŋwimmeem nee yii: 16 «Ti-Dindaan Mpɔŋkɔdaan, Isirayeel Nimbɔtiu un beejal tɔ́kɔ́ Keerubimbi^b puee. Sii baba di sá kitiŋ nee kɔkɔ pu beeŋi Nimbɔtiu. Sii di náań kutagbɔŋu nì kitiŋ. 17 Ti-Dindaan, kpòon̄ a-tafal kí pīlifì! Ti-Dindaan, ŋúbití a-nimbiliŋ kí kpèè! Pīlifì asiibil ŋin kɔkɔ ní Seenakeeriibi tuuŋyi sīī sii Unimbɔti un bí dimaŋfalinee! 18 Ti-Dindaan, an lafun sá tiŋman ní yii Asuur bɔtiibi kūū ki céetì atimbun ŋin kíǹee nib ki nāaǹ bi-timmu. 19 Bi nìn dū atimbun gbanti waaŋi ki tɔ́ ŋŋmin ki kúntì-ŋi, di sá yii bi-waaŋi gbanti kaa nìn sá Unimbɔti, idɔ nì ataŋkpee ní binib nìn dūu mɔ́ɔ́-ŋi. 20 Ama sii ti-Dindaan ti-Nimbɔtiu, fīī-ti kí nyāntí Seenakeeriibi ŋaan ní kitiŋ pu beeŋi kɔkɔ ń béé yii sii, ti-Dindaan baba di sá Unimbɔti.»

Yeesaya nāatì ti-Dindaan nín kíí puee

(Kpèè 2 Bib 19.20-34)

21 Niinee ní Amɔtisi jipɔɔn Yeesaya tú bi cūtìi tùkū Eeseekiyaasi yii: «A nín mēē Seenakeeriibi pu puee, ti-Dindaan nín kíiń a-wimmeem puee sɔ̀. 22 Tibɔti tin ní ti-Dindaan sòon̄ Seenakeeriibi puee sèé:

<Siiyɔn tiŋki bíi kpèé-si fám,

kì bíi bèel̄-si.

Jeerusaleem tiŋki kinyannyaaŋŋi

bí ki lāā-si ki gbákafí diyil.

23 Ŋma ní a sīī ní?

Ŋma ní a sòon̄ ki bíil̀ ní?

Ŋma pu ní a téeń ní?

Ŋma ní a yáatì ki kpēē nì dilambil ní?

An sá man Isirayeel Circir Nimbɔtiu.

24 A dī a-tuuŋyi pu ki sīī man ni-Dindaan.

«A lī yii: <Man Seenakeeriibi,

m cáá janjatɔrɔkub náaǹ,

an pu ní m ŋúń ki jɔ́m̀ ki tin bàn̄ ajoon yilpu,

m jɔ́m̀ ki tin bàn̄ Leebanɔn jool yilpu.

M gāatì ki-seedir sufii in pée fɔ̀kɔ̀ee,

ki gāatì ki-siipreesi sufii in pée ŋān̄ee.

M jɔ́m̀ ki bàn̄ ki-jooŋŋi ŋin fɔ̀kɔ̀ee yilpu,

ki kɔ́ ki-bambaŋku kun múkúee poon.

25 M gbìn̄ lɔkɔb ntincamun

ki nyùn̄ bi-nyim niin.

M dū m-taaŋi ki tāā Eejipiti tiŋki,

ní ki-buŋyi kɔkɔ fóotì.>»

26 Mimmee Seenakeeriibi,

saa nyí yii an sá man di bɔ́ntì

tin bíi jītí nee kɔkɔ ki yóoǹ doooodooooyeeee?

Saa nyí yii an yúntì tikpil m nín bɔ́ntì-tèeee?

Kɔŋkɔnnee ní m yāntì tin m bɔ́ntèe bíi jītí.

Man di lēē-si á nà ntimu mun bi máń

agun ki māntìi túee kɔkɔ dúsi dusi.

27 Binib bin kóò ntimu gbantinee

ŋalii jòon̄ fám ní,

dinyoondi kɔ́-bi ní icoo cúú-bi.

Bi bí kii timool tin bí tisatinee,

kii kumɔsɔŋu kun dáá pɔ̀fèe,

kii timool tin nyēē kudii yilpuee,

àá tin nyēē tisatin kaa láá bīńee.

28 A yaa kāaa, a yaa yúɔɔɔ,

a yaa nyēēyaaa, a yaa kóòyaaa,

a yaa tí gíí m-pu diŋuulaaa,

m nyí.

29 Tiŋman, a lafun gíí m-pu diŋuul,

ní tibɔfan tin a sòon̄-mee kɔ́ m-tafalin.

An pu ní m làá dū dibɔmbil kí túuń a-maŋfal,

kí dū tikúti kí kpàl̄ a-nyɔkɔ kí ŋmā kí kpòotī-si.

Nsan ŋun a dī ki dɔ́miń dooyee,

nsan gbanti ní a làá fàtīí dī kí kpì.

30 Eeseekiyaasi, kudaaŋŋu kun m tīī-see sèé. Dun bindi nee, ni làá jī dibindi din jítèe jinti tin sá aleenee, ní jiilee ní dāá tí jī míǹ. Ama dibintataatiil poonee, ni làá dāá kpɔ̀ kí bɔ̄l̀ kí cā ni-kpaajinti, ní kí dāá kpɔ̀ afiinyikpaan kí dāá kìtī abil kí ŋmɔ́. 31 Juuda beel nib bin làá dāá ŋmátée làá dāá nīn bí kii disupɔmbilee ní. Bi làá dāá tɔ̄ inyaampɔɔn kitiŋ poon ní kí dāá lòoǹ abil yilpu. 32 Di sá yii binib biba làá dāá kíń Jeerusaleem tiŋkin, bin ŋmátì kaa kpíìyee làá dāá yīkì kí yūĺ Siiyɔn jool pu. Ti-Dindaan Mpɔŋkɔdaan neeŋkpaandi puee, u làá dāá ŋá míǹ. 33 Ti-Dindaan nín lī Asuur bɔtiu pu puee sèé: «Waa làá kɔ́ kitiŋ nee poon. Waa làá tɔ̄ mpimbambaanti doo. Waa làá dū digbampɔɔl kí lìkin̄ u-ba kí jáǹ-kì, kaa làá tí bíĺ ataŋkpuku ki-guŋŋi pu kí jáǹ-kì. 34 Nsan ŋun u dī ki dɔ́mińee, nsan gbanti ní u làá fàtīí dī kí gítí. U-taal kpá kí tāā kitiŋ nee poon. Man ni-Dindaan di lī míǹ. 35 M làá wúń Jeerusaleem tiŋki pu kí fīī-kì. Mama m-ba nì m-tɔntɔnliu Daafiidi pu ní m làá ŋá míǹ.»

Asuur yab nín kùǹ ní Seenakeeriibi tin kpíì

(Kpèè 2 Bib 19.35-37)

36 Kunyeeu gbantee ní ti-Dindaan tuuŋŋu dɔ́miń Asuur yab janjanaapaal pu ki kūū binib kutukub dilaataal nì imuŋku inaa nì kutukub biŋmoo. Kutaa wúntì bin kaa kpíìyee fīntèe, ki ká anikpil dɔ̄ an kɔkɔ fìlfilfil. 37 Niinee ní Asuur bɔtiu Seenakeeriibi yíkì dinaapaalee pu ki nín gítí Niiniifi tiŋkin ki cūtìi gbíntì niin. 38 Dalba u gbāā u-waal Niisrooki diikun ki jáaḿ-dèe, ní u-jipɔmbi Adirameeleeki nì Sareeseer dū kitàataajiki ki gāā ki kūū-u ní ki sáǹ ki nín cá Ararati tiŋkin. U-jipɔɔn Asaradɔn di fōō u-yil ki kpántì ubɔti.