Yeesaya 36

Asuur bɔtiu tāā ki bíikì Jeerusaleem tiŋki pu

(Kpèè 2 Bib 18.13,17-37)

1 Ubɔti Eeseekiyaasi nín jíń dibeel dibindi diba kpá saalku poonee ní Asuur bɔtiu Seenakeeriibi dɔ́miń ki jáń nì Juuda yab timmu mun bi máń agun ki māntìi túee kɔkɔ ní ki fōō-mu. 2 Asuur bɔtiu nìn bí Lakiisi tiŋkin ní ki dū u-janjakpiliu ki tú ubɔti Eeseekiyaasi cee Jeerusaleem tiŋkin, u nì dijanjakitikpaandi diba nóó. Ujanjakpilee bàn̄ee ní ki síl̀ kunyiŋfuŋu kun bi cátì nnyim dì ki kóò dinyimbɔbil din bí yilpu púee. Dinyimbɔbil gbanti nìn dɔ̄ didandi din cá biwaŋfintiliibi kpaabunee watil pú ní^a. 3 Ní Yiilkiyaawuu jipɔɔn Eeliyaakiim un kpèé ubɔti cindee, nì ubɔti gbaŋŋmaliu Seebina nì Asaafi jipɔɔn Yoowa un kpáafí ubɔti gbɔntee nyáń ki túŋkì ujanjakpilee. 4 Bi bàn̄ee ní ujanjakpilee bí-bi yii:

«Ní cùú tùkù Eeseekiyaasi yii tibɔti tin ní Ubɔtikpaan, Asuur bɔtiu sòon̄ee sèé: <Ba pu ní a máká ní? 5 A dàkafī yii anyɔɔbun fám ŋūǹ kí fōō kujaau bɔ́ntitam nì dibaatandi paaŋŋu kí já kujaauaaa? Ŋma pu ní a baasii máká ní ki yíkì kaa kíí aba pu man cee na? 6 Eejipiti tiŋki kin sá kii kukaluu kun gíìyee pu ní a mákáaa^b? Saa nyí yii unil un yaa dū u-ŋal ki nyīī ku-puee, ku gífí udaan níii! Too, míǹ ní Eejipiti bɔtiu Faaroo sá ki tīī bin kɔkɔ dū bi-mákal ki páaǹ u-puee.> 7 An yaa yíì a làá lì yii: <Ti-Dindaan ti-Nimbɔtiu pu ní timbi máká.> An kaa sá sii di kúntì ipaan in bí ŋgbantamu pu bi jáaḿ Unimbɔtee nì u-saraafaŋyaaa? M nyí sii di bí Juuda nì Jeerusaleem yab yii: <An sá nsaraafan ŋun bí Jeerusaleem tinkin doo nee baba nimbiin ní ní nīn gbàantí ki jáaḿ ti-Dindaanaa!> 8 A yaa là sii nì m-kpiliu Asuur bɔtiu ń kpáká kí kpèè. A yaa ŋúń ki ká bitanjakaliibi, man làá tīī-si itaamu kutukub bili. 9 Aa kpáàa ŋūǹ kí já kí pɔ̄ɔkiǹ m-kpiliu tɔntɔnliibi kiwaai gba. Kin ba pu ní a nín máká Eejipiti pu ú tīī-si janjatɔrɔkub nì itaamu na! 10 A dàkafī yii ti-Dindaan kaa là ní m dɔ́miń kí já nì kitiŋ nee kí nàan̄-kàaa? Ti-Dindaan u-ba di bí-mi yii: <Cùú já nì kitiŋ nee kí nàan̄-kì!>»

11 Niinee ní Eeliyaakiim nì Seebina nì Yoowa bí Asuur janjakpiliuee yii: «Ti gbāam̀-si ní, sòoǹ nì timbi a-tɔntɔnliibi Aram yab sooŋyi poon^c, di sá yii ti gbìl̀-i. Taa ti sòoǹ nì ti eebru sooŋyi poon, kun puee binib tɔ́kɔ́ digundi pu ki pílifí.» 12 Ama ní ujanjakpilee kíí yii: «A dàkafī yii a-kpiliu nì sii baba ní m-kpiliu túnní-mi yii ḿ cáań tibɔti nee kí sòoǹaaa? Tibɔti gbanti sá ki tīī binib bin kɔkɔ bí agun pu nee mun ní. An kaa làá ti yúntí, ni nì bi làá ŋmɔ́ ni-binti kí nyɔ̀ ni-nyeem^d.»

13 Míǹ boonee ní Asuur yab janjakpiliuee yíkìi síl̀ ní ki téeń mpɔn Juuda yab sooŋyin yii: «Ní pīlifìmaan tibɔti tin ubɔtikpaan, Asuur bɔtiu cáá kí sòoǹee! 14 Ubɔti nín lī puee sèé. Ní taa yàntī Eeseekiyaasi ń mɔ̄ntì-ni, di sá yii waa làá ŋmā kí fīī-ni! 15 Ní taa yàntī Eeseekiyaasi ń kīil̀-ni ní dū ni-mákal kí páań ti-Dindaan pu. U bí ki lì yii: <Báà án ŋá pu, ti-Dindaan làá fīī-ti, kitiŋ nee kpá ki kɔ́ Asuur bɔtiu ŋaan!> 16 Ní taa pīlifì Eeseekiyaasi, ama ní pīlifì tin Asuur bɔtiu bí ki sòoǹ-ni nee. Píímaan-mi kubɔɔtiiu, ní sāǹ kí kɔ́maan-mi! Ni yaa ŋá míǹ, báà ŋma làá ŋmɔ́ u-fiinyi nì u-fiigi subiliŋ, ní kí nyɔ̀ u-lɔkɔu nyim, 17 kí nīn cí ŋyunti ŋun m làá dāan̄ kí yòon̄-ni kí cùnnì kitiŋ kin bí kii ni-yaka nee poonee. Kitiŋ gbanti poonee, bilee nì ndamam bí, ní tikpaajin nì fiinyi sufii sati bí. 18 Míǹ puee ní taa yàntī Eeseekiyaasi ń mɔ̄ntì-ni. U bí ki lì yii: <Ti-Dindaan làá fīī-ti!> Atimbun ŋin kíǹee waaŋi ŋúń ki fīī ŋi-timmu ki nyántì Asuur bɔtiu ŋaanaaa? 19 Amaati nì Aripaadi yab waaŋi bí la? Seefarfayiim yab waaŋi bí la? Ŋi ŋúń ki fīī Samaarii tiŋki ki nyántì m-ŋaanaaa? 20 Ntimu gbanti kɔkɔ waaŋi poonee, dilal di ŋúń ki fīī di-tiŋki ki nyántì m-ŋaan? Kin án làá dī mana ní ti-Dindaan ń fīī Jeerusaleem tiŋki kí nyāntí m-ŋaan?»

21 Binib bin kɔkɔ nìn pée bí niinee, báà ubɔ kaa nìn wāaǹ kinyɔkɔ ní kaa nín gātì-u, di sá yii ubɔti nìn kpáafì-bi yii: «Ní taa pée kíí-u tiba!» 22 Míǹ boonee ní Yiilkiyaawuu jipɔɔn Eeliyaakiim un kpèé ubɔti cindee, nì ubɔti gbaŋŋmaliu Seebina nì Asaafi jipɔɔn Yoowa un kpáafí ubɔti gbɔntee nín gítí ubɔti Eeseekiyaasi cee. Bi nìn dáaĺ ki cátì tiwan tin bi pēēyee, ní ki dū tibɔti tin ujanjakpilee sòon̄ee ki máafì-u.