Yeesaya 35

Ti-Dindaan nibul kɔkɔ làá fàtīí gítiń

1 Án nīn mɔ̄ǹ kuteeu nì kitiŋkuliŋŋi,

kitiŋ kin pu nnyim kpée ń nīn fàal̀ kí púkuḿ.

2 Tisatin pumpukum ń bìin̄ ki-pu.

Nín̄ fàal̀, nín̄ fàal̀ kí nīn fátí iwiliili.

Ti-Dindaan làá tīī-si

Leebanɔn jooŋŋi nyooti juti,

kí tīī-si Kaarmeel jool nì Saarɔn timpiliŋki nyaaŋku.

Niinee báà ŋma làá dāá ká ti-Dindaan nyooti,

ti-Nimbɔtiu nyaaŋku.

3 Ní pɔ̄ɔkìmaan iŋal in gīīyee,

kí pɔ̄ɔkì atabiŋyil ŋin yɔ̄tèe^a.

4 Tùkùmaan bin pɔbiliŋ bíil̀ee yii:

<Ní kámaan dipɔbil, ní taa fàŋkìmaan.

Kpèèmaan ni-Nimbɔtiu.

U dòoń kí tɔ̀-ni ipɔntoon

kí téeǹ ni-nannanliibi tikpitil tin bi ŋá-nee.

Ni-Nimbɔtiu u-ba di dòoń kí fīī-ni nee.>

5 Niinee, bijɔfub nimbiliŋ làá ŋúbití,

ní bitafakpaafub tafaliŋ ń ŋátí.

6 Niinee, udeen làá dāá nīn yùkufī kii upeemanee^b,

ní umuun ń dāá nīn kíǹ ki tátí mpɔn ki fàal̀.

Nnyim làá dāá cɔ́tí kuteeu pu,

ní ibun pùub̀ kitiŋkuliŋŋi pu.

7 Kitiŋ kin tùm̀ kpaŋkpamee làá kpántí mbúun,

inyimbul làá cɔ́tí nnyinnyoo tiŋki poon.

Laakin ní sinsiŋkub nìn dɔ̀ee,

niin làá kpántí kupuu ní tikati ń nyā.

8 Bi làá dāá tɔ̄ didandi diba niin,

kí dāá nīn yíì-dì yii <circir saŋŋu>.

Unil un kaa bí circiree kaa dāa dì-ŋu,

ŋu dāa sá ki tīī ti-Dindaan nibul ní.

Báà ugbaan ubɔ kaa dāa yìntī kí dī-ŋu.

9 Gbikinti ubɔ dāa kpá niin,

upeecuncuti ubɔ kaa dāa jītí niin.

Baa dāa kāntí tíǹ gbanti báà tiba niin.

Binib bin ti-Dindaan fōō ki líìyee baba

di dāa dì nsan gbanti.

10 Niin ní bin ti-Dindaan dá ki líìyee

làá dī kí fàtīí gítiń.

Bi làá bàń Siiyɔn jool pu ki gà ilan ki fàal̀.

Bi làá dāá gbí mmɔn ŋun kaa kúntée.

Mmɔn nì dipɔɔpindi làá dāá céeǹ-bi

ní kunimbaau nì iyaliŋki ń gbèen̄.