Yeesaya 34

Ti-Dindaan làá sòoǹ Eedoom bɔti

1 Atimbun, sútiḿmaan doo kí dāá pīlifì,

anibul, ní kpòom̄maan ni-tafal kí pīlifì.

Kitiŋ nì tin kɔkɔ bí ki-poonee ń pīlifì,

duulinya nì tin kɔkɔ nyáń u-nee ń pīlifì.

2 Ti-Dindaan fōō mbum atimbun kɔkɔ nib pu,

u gíí diŋuul tikpil bi-janjakitiŋi kɔkɔ pu.

U lēē ki síiǹ bí kpɔ̀ kí céetí-bi,

u dū-bi ki tīī bí bɔ̀fì kí kúntí-bi.

3 Bi-nib bin bi kūūyee dɔ̄ kitiŋ fìlfil,

bi-nikpiliŋ sūū ki núukì,

ní bi-fatikuu pùub̀ ajoon pu ki sìntī.

4 Iŋmalbijaa kitil làá dāá yàl̄.

Kutagbɔŋu làá kpáb́ kii kugbɔŋuee,

ní tin kɔkɔ pée bí ku-puee ń kìtī kí lítiń kitiŋ,

kii fiinyi subu àá fiigi subu faati

nín gbátí kí lítí puee^a.

5 Di sá yii ti-Dindaan tàataajiki

nyáń ki páaǹní kutagbɔŋu pu.

Kì lítì Eedoom tiŋki pu^b,

dinibul din ní u lēē kí kpɔ̀ kí céetée.

6 Ti-Dindaan tàataajiki nyùn̄ fatiku ki bál̀,

kì ŋmɔ́ ŋkpam ki díkí,

a lì kii apibil nì iŋɔjaa fatikuuee,

a lì kii ŋkpam min bīī ipijaa ceebiliŋ puee.

Bɔsiraa, ditiŋyilinee,

ti-Dindaan bɔ́ntì kí ŋá saraa ubɔ.

Bi làá pɔ̀fì binib tikpil Eedoom tiŋkin.

7 Bi nì ipɔɔnaa nì anabil nì inajaa

di làá kpāfì kí lítí.

Bi-tiŋki làá nyɔ̀ fatiku kí báĺ,

ní bi-tam ń nyɔ̀ ŋkpam kí díkí.

8 Án sá ŋwiin ŋun ti-Dindaan làá tɔ̀

Eedoom yab ipɔntoonee ní^c,

dibindi din ní u làá mɔ̄tì Siiyɔn pu

kí pà Eedoom yab bi-tuuŋŋi paatee ní.

9 Eedoom tiŋki buŋyi làá kpántí aŋɔ,

ní ki-tam ń kpántí farwata.

Kì làá kpántí kii aŋɔ un bí ki wùee ní.

10 An yaa sá kunyeeuaaa, ŋwiimpuɔɔɔ,

ŋu kpá ki làá kpú.

Ŋu-nyiim làá nīn jɔ́ḿ kutaa pu ní ki cá jaanjaan^d.

Kitiŋ gbanti làá kpántí kii kuteeuee ní ki cá abin abin,

báà uniseen kaa dāa gíti còom̄ ki jītí niin.

11 Ditulinjool nì kilabinsaŋ di làá dāá nīn kíǹ ki yì-kì,

kitulinjakpatibooi nì digaliŋgaal di làá dāá nīn kóò ki-ni.

Ti-Dindaan làá dāá tàntī dinàandi ŋmiiŋu Eedoom tiŋki pu,

u làá dāá kpátí-kì ní tiba nì tiba kaa dāa gíti bí ki-pu.

12 Akpambal kaa dāa gíti bí kí kàan̄ ubɔti,

abɔtibil kɔkɔ dāa kpíì ki dóò dee.

13 Ikuŋkum làá dāá nyā ki-beeciŋŋin,

sintil difɔkɔŋi dāa kpántí

abɔjanaakun nì ŋkuŋkumbɔmu ŋma ní.

Niin làá dāá kpántí sinsiŋkub kɔŋkooŋŋu,

kí dāá kpántí atulinjoo dumpu.

14 Ilambunti dāa tūŋkí isaakpan nsanni,

ní iŋɔjaa ń dāá kóoǹ kí kpāfì niin.

Niin ní Liliiti, kunyeeu faŋfantiu dāa kóò.

Niin ní u dāa kāntí diŋuŋfil.

15 Niin ní ukoobu làá dāá ŋá u-diiku,

kí tɔ̄ ajin, kí wùkun̄ ŋi-pu,

kí wúń ŋi-pu ŋí dāá kákatí.

Niin mun ní kaajiikub dāa kpáfí,

kaajiiku kamaa nì u-ŋàliŋu.

16 Ni yaa nyàab̄ ti-Dindaan gbɔŋkunee, ni làá ká bi ŋmàn̄ yii:

«Bi-kansikin báà ubɔ kaa làá fɔ́tí,

báà ubɔ kpá kí fá u-juti,

di sá ti-Dindaan nyɔkɔn ní mara nyáń,

u-Fam di kóoǹ-bi ki kpáfì.

17 Úǹ u-ba di tɔ́ kasi ki tīī báà ŋma u-tinjandi,

u dū ŋŋmii ní ki ŋmāntì kitiŋ ki tīī-bi.

Bíǹ di làá nīn yì-kì kí nīn cá jaanjaan,

bi làá nīn kóò ki-pu kí nīn cá abin abin.»