Yeesaya 33

Mbusu dɔ̄ ki cí ubiildi

1 Mbusu dɔ̄ ki cí sii un bíiĺ,

ama ní ubɔ kaa bíil̀ siiyee,

sii un nyēē a-jutiibi boon,

ama ní ubɔ kaa nyēē a-boonee.

A yaa láa bíil̀ ki dóòyee,

bi làá dāá bīil̀ si mun.

A yaa láa nyáń a-jutiibi boon ki dóòyee,

bi làá dāá nyā sii mun boon.

2 Ti-Dindaan, dàkà-ti a-ŋanti!

Sii pu ní timbi máká.

Nín̄ sá ti-pɔŋŋu kutaafaau kamaa,

ní kí nīn sá ti-fiiliu dinimbinaamandi poon.

3 A yaa téeńee, anibul sáń kí kátí ní,

a yaa yáatì ki yúl̀ee, atimbun yàl̀ ní.

4 Niinee ní bí kíĺ ki bíi fúkuĺ-ni,

a lì kii inaakitoon nín gbáb̀ kí bìin̄ tiwan pu puee.

Bi làá gbáb́ kí bìin̄ tigaajawan pu bɔ̀mmm kii inaakee.

5 Ti-Dindaan tɔ́kɔ́ tikɔkɔ pu,

kun puee u kóòń yilpu ní.

U yāntì deedee nì ibaamɔn

kíǹ ki bí Siiyɔn jool pu.

6 Sii ti-Dindaan nibul, a làá nīn bí ŋgbansɔŋfin.

Iciin nì dinyil sá tigaajati tin fìil̄ee ní.

Á nīn fàŋkí ti-Dindaanee sá tigaajawan ní.

Ti-Dindaan làá tɔ̄ u-tundi

7 Kpèèmaan Ariyeel yab

bí ki kūuntí adan pu.

Ŋgbansɔŋfi tuuŋyi

bí ki sūǹ lɔ̀lɔlɔ.

8 Adan kíǹ ki dɔ̄ fám ní,

binib kaa ti còom̄ isan pu.

Bi kpītì mpèé, ki fá ntimu,

kaa ti pée fātìi tɔ́ báà unil.

9 Kitiŋ kɔ́ kunimbaaun ki bí ki kōō.

Leebanɔn jool sufii bíi yɔ́l̀, ní icoo kɔ́-dì.

Saarɔn tiŋki kpántì kii kuteeuee.

Baasan tiŋki nì Kaarmeel jool

kaa ti cáá isufi.

10 Ti-Dindaan bí yii:

«Kɔŋkɔnnee m làá tɔ̄ m-tundi,

kɔŋkɔnnee m làá yáatí kí yūĺ,

m làá dàkà m-pɔŋŋu.

11 Ni nín bɔ́ntí kí ŋá tiŋyee

sá kii timɔkulindee ní.

Ni-fooku di sá ŋŋmi

ŋun làá dāá wà-nee.

12 Anibul ŋin kíǹee làá dāá wà ŋŋmi,

kí kpántí kii kaluuyee.

Ŋi làá dāá wà kii ikuŋkuŋfi

in bi gāā ki fée ní.

13 Nimbi bin bíń ndandatee,

ní pīlifìmaan tin ní m ŋée.

Ní nimbi bin bí ki pìlīǹ dooyee,

ní béémaan m-pɔŋŋu nín sá ŋuŋyee.»

14 Dinyoondi kɔ́ bikpitiŋaliibi bin bí Siiyɔn jool puee,

binikpitib wunti fōō dijinjikil.

Bi kíǹ ki bàlifī yii:

«Ti-kansikin ŋma di ŋūǹ kí yūĺ

ŋŋmi ŋun wù ki céetí nee caŋin?

Ŋma di ŋūǹ kí yūĺ kí kɔ́ĺ

aŋmilimbil ŋin kaa kúù jaanjaan nee?»

15 - See unil un nóó deedee saŋŋu,

ki sòoǹ ibaamɔnee.

An niliuee kaa ŋáań tipɔmbɔti kí ká ipaati,

úǹ kaa kíikí kí fōō dinyɔɔŋeebil jim.

Bi yaa bíi sòoǹ nnikpaakoon bɔtee,

u ŋēeb̀ u-tafaliŋ ní kí taa gbìl̄.

U ŋúb̀ u-nimbiliŋ kí taa wāl̀ tikpitil.

16 Udaan làá nīn kóò ajoon yilpu.

Kutaŋkpanaakoou di làá nīn sá u-balilaŋki.

U làá nīn kāntí tijin ki jīǹ,

ní nnyinyɔkaam kpá kí lóó-u.

Jeerusaleem tiŋki làá ká difiil

17 A-nimbil làá dāá ká ubɔti u-nyaaŋku kɔkɔ poon,

ní kí dāá ká kitiŋ nín pée dɔ̄ ki wāā puee.

18 A làá dāá dàkafì tin nìn kɔ̄ntí-si dinyoondee pu

ní kí bàlifì a-ba yii:

«Bin nìn kàaǹ lampoo nimbiliŋee bí la?

Bin nìn kpèé lampoobee bí la?

Bin nìn kpèé sintil difɔkɔŋee bí la?»

19 Aa làá dāá gíti ká dinibul din cáá dilambilee,

dinibul din sooŋyi unil kaa gbìl̀ taapuee,

isooncaan in báà ubɔ kaa gbìl̀ee.

20 Kpèè Siiyɔn tiŋki kin poon ti kpáfí ki jīǹ jiŋaalibee,

a-nimbil làá dāá ká Jeerusaleem, dipɔɔsɔŋkil tiŋki.

Kì dāa sá tanti un ní baa làá ti sútée,

tanti un kpakpaaŋi baa làá ti cóotée,

tanti un ŋmiii baa làá ti kútí dalba dalbee.

21 Niin ní ti-Dindaan làá dàkà-ti u-pɔŋŋu.

Án dāa sá laakin ní amɔɔ nì ibun in wāāyee bée,

baa dāa ŋàal̀ niin iŋaliŋfi,

meelab bin sá bikpaambee kaa làá dāá dùtī niin.

22 Tiŋman pu, ti-Dindaan di sá ti-bɔsoonliu,

úǹ di sá ti-marayóonliu.

Ti-Dindaan di sá ti-bɔtiu,

úǹ di sá ti-fiiliu.

23 A-ŋmiii cúu kútì ní nee,

iaa ti ŋúb́ ndɔ ŋun pu meela ŋaabuŋu sàkantée,

baa ti ŋūǹ kí sàkan̄ meela ŋaabuŋu ndɔ pu.

An pu ní ti làá dāá yàkatī tigaajawan tikpil.

Ki kpáaǹ gba bin tà bi-taaŋi puee làá dāá kūtì ti-pu tí fūkul̀.

24 Binib bin kóò Jeerusaleem tiŋkinee,

ubɔ kaa dāa gíti lì yii: «M būǹ!»

Binib bin kóò niinee làá dāá ká bi-kpitii pɔ̄tam.