Yeesaya 32

Ubɔti un sá deedeedaanee

1 Ubɔti ubɔ làá dāá jī dibeel nì deedee,

ní abɔtibil ń dāá ŋúb́ kitiŋ ibaamɔn saŋŋun.

2 Bi-kansikin báà ŋma làá dāá nīn sá

kii laakin kubuŋu yaa bíi jītí binib sáń kí báĺee,

kii laakin utaaja yaa bíi nì binib sáń ki kóòyee,

kii mbun ŋun di pùub̀ kitiŋkuliŋŋi puee,

kii ditaŋkpal din tìì mboon kitiŋ kin tùm̀ee poonee.

3 Bin nimbiliŋ wāĺee kaa dāa gíti jɔ̀b̀,

bin tafaliŋ gbìl̀ee dāa ŋátí bi-tafaliŋ kí pīlifì.

4 Nnaatuumu làá dāá dàkafì kí gbìl̄ tibɔti taapu,

binib bin sòoǹ dibeebeelee

dāa kíǹ ki sòoǹ cábcab.

5 Baa dāa gíti tìì ugbaan jilma,

kaa dāa gíti yíì ukiildi yii unimɔnti.

6 Ugbaan sòoǹ tigbaambɔti ŋma ní,

ní u-pɔbilinee, u dàkafī tikpitil ŋma.

U tūǹ ntimbiil tuuŋŋi,

ní ki sòoǹ ki bíiĺ ti-Dindaan.

Waa pūǹ un ŋkùm cááyee ú jī,

kaa pūǹ un nnyinnyoo cááyee ú nyɔ̀.

7 Ukiildi úǹ tūǹ atuŋkpiti ŋma ní.

U bɔ́ntí atuŋkpiti ki mɔ́ntí inyimɔn

kí nàan̄ uwɔfi.

Ama kun uwɔfi gbanti pée nyàab̀ee

di sá bí pɔ̀-u.

8 Ama unimɔnti úǹ cáá ilandɔkɔmɔnti ní,

ní atuun ŋin u tūǹee sá atummɔnti.

Bi kpáafì Jeerusaleem nimpoobi

9 Nimbi binimpoobi bin kaa dàkafī tiba puee,

yīkìmaan kí pīlifìmaan-mi.

Nimbi bisapɔmbi bin máká ni-ba puee,

kpòom̄maan ni-tafaliŋ kí pīlifì.

10 Nì dibindi diba boonee,

nimbi bin máká ni-ba puee,

ni-wunti làá dāá jìkì.

Di sá yii bi dāa kìtī fiinyi biliŋ kí dóó,

ní tiba kaa dāa gíti bí bí kìtī.

11 Nín̄ jìkìmaan, nimbi binimpoobi

bin kaa dàkafī tiba puee,

nín̄ yáliŋkímaan, nimbi bisapɔmbi

bin máká ni-ba puee.

Pèetīmaan ni-wampeeŋkaati,

lòotīmaan dicancaŋgbeel

kí dū kpɔsatab kí cúú ni-cammu.

12 Nín̄ fátímaan ni-biŋŋi nì kunimbaau

kí nīn yáliŋkí tisati tin ŋān̄ee

nì fiinyi kpaaŋŋi ŋin lòoǹ sàka sakee pu.

13 Nín̄ sūm̀maan m-nibul tiŋki

kin pu ikuŋkum nyáńee pu,

nín̄ sūm̀maan adiin ŋin kɔkɔ poon dipɔɔpindi bí,

ní kitiŋ bí jiŋaal poonee pu.

14 Bi dū dibeecindi ki fá,

ubɔ kaa ti bí kitiŋ kin poon an nìn tùm̀ee.

Oofeel tincaliiki^a nì sintil difɔkɔku

làá dòon̄ kikuliŋŋi kí nīn cáa cá jaanjaan.

Niin ní kumooun mammu dāa bí ki léelikí,

ní tipicaŋkpun dāa ŋmóò timool.

Dikpántikpaandi bí ki dòoń

15 Ŋwindalee, ŋfam làá dāá kpákatiń ti-pu.

Niinee ní kuteeu làá dāá kpántí

asubiŋmɔkaa kpaabu,

ní asubiŋmɔkaa kpaabu ń dāá kpántí kubambaŋŋu.

16 Bi làá dāá nīn tɔ́ ibaamɔn kuteeu pu,

ní kí dāá ká deedee asubiŋmɔkaa kpaabun.

17 Dibil din deedee làá dāá lòoǹee di sá ŋgbansɔŋfi.

Dì làá dāá cáań dipɔɔsɔŋkil nì diwundi kí nīn cá jaanjaan.

18 M-nibul làá dāá nīn kóò laakin ŋgbansɔŋfi bée,

ikɔŋkoon in poon unil bí kaa fàŋkí tibee,

laakin diŋuŋfil nì dipɔɔsɔŋkil bée.

19 Ama ataanyiŋkumbil làá dāá lítí kubambaŋŋuee pu,

ní kitiŋee ń dāá sìntī taapu taapu.

20 Án dāa sá-ni mmɔn

ní dāá ŋmā kí bɔ̄l̀ ni-wamboolii

laakin kamaa nnyim bée caŋin,

ní kí dāá gbìntī unaa nì kimaŋ kí líí.