Yeesaya 31

Ní taa nín̄ mákámaan Eejipiti yab pu

1 Mbusu dɔ̄ ki cí binib bin sìntī

Eejipiti tiŋkin ki nyàab̀ dijòońdee!

Bi máká itaamu pu,

ki máká janjatɔrɔkub pu,

kun puee bi wīikí tikpil,

ki máká bitanjakaliibi pu,

bi nín cáá mpɔŋkpaanee pu.

Ama baa fātì bi-nimbikpeeŋu

Isirayeel circir Nimbɔtiu watil pú,

kaa nyàab̄ ti-Dindaan.

2 Ama u mun cáá iciin

ki ŋūǹ kí cáań nnaabu.

U yaa lī puee, míǹ ní u ŋáań.

U jáà nì binikpitib kitil,

ki jáà nì dijòońdi din nyánní binikpitib ceeyee.

3 Eejipiti yab sá binib ní,

baa sá inimbɔti.

Bi-taamui cáá tiwunnan ní,

iaa sá ŋfam.

Ti-Dindaan yaa tāntì u-ŋalee,

un bàà sá kí jòòyee lítí ní,

ní un bālifì dijòońdee ń lítí,

ní bi-liitil ń kpāfì kí kpú.

Ti-Dindaan un mɔ́tí Jeerusaleem puee

4 Ti-Dindaan nín tùkū-mi puee sèé:

«Gbikinti àá kigbikintibiki

yaa cúú kuwaŋkuluu

ki mùuǹ ki mɔ́tí ku-puee,

bi yíì bipikpaaliibi kupaau ní kí kpāfì.

Ama ní úǹ kaa fàŋkí bi-tantatii,

ní bi-kuŋkuuntii kaa tùkù-u tiba.

Míǹ ní man ni-Dindaan Mpɔŋkɔdaan

yaa láa sīntìń Siiyɔn jool pu

kí já kujaauee, án làá dāá nīn bí.»

5 Kii unoon nín kpátí u-feeŋyi

kí bìin̄ u-biyaamu pu puee,

míǹ ní ti-Dindaan Mpɔŋkɔdaan

làá dāá wúń Jeerusaleem tiŋki pu.

U làá dāá wúń ki-pu kí fīī-kì,

u làá dāá mɔ̄tì ki-pu kí fōō-kì kí líí.

6 Isirayeel yab, ni fātì ni-boon ki tīī ti-Dindaan tikpil. Fàtīí gítiḿmaan u-cee. 7 Di sá yii yaadalee, báà ŋma làá dāá fá animbil kúti nì sindaariya waaŋi ŋin ni dū ni-ŋalii in sá ikpiti ŋaliiyee ki mɔ́ɔ́yee.

8 Kitàataajiki ní bi làá dūú kpɔ̀ Asuur yab,

ama an kaa làá nīn sá unil yaka.

Kitàataajiki di làá nàan̄-bi,

ama án kaa dāa sá nisaal tàataajiki.

Asuur yab làá dāá sāǹ kitàataajiki gbanti,

ní bí dāá cúú bi-janjaliibi bin pɔ̀ɔǹee

kí dāá yàntī bí nīn tūǹ atuun ŋin pɔ̄ɔ̄yee.

9 Dinyoondi làá dāá kɔ́ bin pɔ̄ɔ̄ kii ditaŋkpalee bí sāǹ,

ní kufaaŋŋu ń kɔ́ bi-janjakpilib ní bí sāǹ kí fá bi-ŋaabiki.

Ti-Dindaan di lī míǹ,

úǹ un ŋmilimbil bí Siiyɔn jool pu,

ní u-ŋmiŋu fòol̄ lìblib Jeerusaleem tiŋkinee.