Yeesaya 38

Ubɔti Eeseekiyaasi weeŋyi nì u-cáaǹtam

(Kpèè 2 Bib 20.1-11)

1 Ŋyunti gbantee Eeseekiyaasi nìn búŋkì ki làá kpú. Ní Unimbɔti bɔnaatiliu Yeesaya, Amɔtisi jipɔɔn cūtìi māntì u-pu ní ki bí-u yii: «Ti-Dindaan bí yii á bɔ́ntí a-dicaŋku, di sá yii a làá kpú ní, saa làá ŋmátí.» 2 Niinee ní Eeseekiyaasi fātì u-nimbiin ki túĺ digundi ní ki mēē ti-Dindaan yii: 3 «M-Dindaan, m gbāam̀-si ní. Téetí yii m nóó-si nì ibaamɔn nì dipɔbil diba ní ki ŋá tin fáatiǹ-see.» U mēē mimmee ní ki súń tikpil.

4 Ní ti-Dindaan sòon̄ nì Yeesaya ki bí-u yii 5 ú gítí kí tùkù Eeseekiyaasi yii: «Ti-Dindaan, a-naanja Nimbɔtiu di lī yii: <M gbìl̄ a-wimmeem, ki ká a-nyinnyim. M làá fɔ̀kɔǹ a-maŋfal wiiŋyi abin saalku kí kūtì. 6 M làá fīī sii nì kitiŋ nee kí nyāntí Asuur bɔtiu ŋaan. M làá wúń kitiŋ nee pu>.»

21 Ní Yeesaya bí yii: «Nàmaan fiigi subiliŋ kí cáań kí nákań ubɔti naliŋ pu, u làá pɔ̄ɔkì!»

22 Ní Eeseekiyaasi bí yii: «Ba daaŋku ní m làá dūú béé yii m làá gíti ŋmā kí cù ti-Dindaan diikun?»

7 Ní Yeesaya bí Eeseekiyaasi yii: «Kpèè, kudaaŋŋu kun ti-Dindaan tīī-si kí dàkà yii u nín pōoǹ puee, u làá ŋá mimmee sɔ̀. 8 Too, ti-Dindaan làá yàntī mboon ŋun lítì Akaasi kɔliŋ puee ń fàtīí sútí kí jɔ̄m̀ akɔl saalaa pu.» Ní mboon lafun fātìi sútì ki jɔ́m̀ Akaasi kɔliŋ pu, akɔl saalaa ŋin pu ŋu bàà lítèe pu.

Eeseekiyaasi mēē ŋwimmeem u nín ká dicáaǹdee

9 Inyɔŋki laŋŋu ŋun Juuda bɔtiu Eeseekiyaasi gāā u nín nìn búŋkì ki dāa ká dicáaǹdee sèé:

10 M nìn lī m-ban yii

m-maŋfal wiiŋyi dijandi

ní m dūu kāl̀ kitiŋ nee pu ní

ki làá kpáàa fàtīí nīn gítí nee.

Ditaŋkpiilin ní m làá púntí

m-maŋfal wiiŋyi in kíǹee.

11 M nìn gíti lī m-ban yii:

maa làá ti ká ti-Dindaan

binifoobi tiŋki pu doo deeyaa!

Maa làá ti wāl̀ báà uniseen nimbiin

duulinya nee poon deeyaa!

12 Bi dáaĺ ki fōō m-maŋfal,

ki cáá-dì ki búntì ndandati ki wāatì-mi,

kii bi nín cóotí upikpaal tantiu puee.

Kii usatalul nín kpáb̀ sata un u lùn̄ee puee,

míǹ ní bi kpáb́ ma mun maŋfal ki dóò.

Bi gíí ki tīl̀ iŋmii.

Kí yòon̄ ŋwiimpu kí cáá sāā kunyeeuee,

mimmee a dóò m-bɔti dee!

13 Áli kutaa ń dāá wúntée, maa ti bí tiban.

U wīil̀ m-kpabiŋ kɔkɔ, a lì kii gbikintee.

Kí yòon̄ ŋwiimpu kí cáá sāā kunyeeuee,

mimmee a dóò m-bɔti dee!

14 M súń kii kikoosiyaakpaai àá udiyaalee,

ki súń ki yáliŋkì kii dibeenanjilee.

M-nimbiliŋ kpēē a-watil pú yilpu ki tin gīī.

Ti-Dindaan, an bàn̄-mi, dāá jòoń-mi.

15 Tilati ní m gíti cáá kí sòoǹ

ní ú kíí-mi ní,

di sá yii úǹ di ŋá tin bí nee kɔkɔ.

Kunimbaakpaaŋŋu kun kɔ́-mee puee,

ŋgeem gíti kpá-mi.

16 Ti-Dindaan, a béè tin bāań-mee,

ní ki fātìi tīī-mi dimaŋfal.

A fātìi tīī-mi mpɔn,

ki yāntì ḿ bí dimaŋfalin.

17 Kpèè, m-nimbaaku kpántì dipɔɔpindi.

Tiŋman, a-neendi puee,

a nyántì-mi ŋkúm ŋaan,

ki dū m-kpitii kɔkɔ ki ŋá a-kpaŋkpamboon.

18 Ubɔ kaa nyɔ́ŋkí-si ditaŋkpiilin,

bitaŋkpiibi kaa ti ŋūǹ kí jāam̀-si.

Binib bin gíti dáá sīntì dikaakulinee

kaa ti máká a-ŋanti pu.

19 See unifoo baba di ŋūǹ kí nyɔ̄ŋkì-si,

a lì kii man nín bíi nyɔ́ŋkí-si pu díǹ nee.

Bibaatiibi di làá yàntī bi-biyaamu ń béé a-ŋanti.

20 Ti-Dindaan sii di fīī-mi.

An puee ti làá nīn bɔ̀ɔ́ tiwan

ki nyɔ́ŋkí-si a-diikun

ti-maŋfal wiiŋyi kɔkɔ poon.