Yeesaya 28

Utaaja làá nì kí bīil̀ Samaarii tiŋki

1 Mbusu dɔ̄ ki cí Samaarii tiŋki,

kitiŋ kin di náań nì kibeefuulii

ní Eefiraayiim danyɔgbiliibi cáá ki-pu dilambilee!

Kì tɔ́kɔ́ digbantandi pu,

ditantakal din kpaatanti cáá ntiŋkpamee yilpu,

ní bi nyɔ̄kɔntì-kì ní kì ŋān̄.

Ama kì náań nì mpumpukum min yɔ́ĺ,

ki pá bidanyɔgbiliibi bin gbí ki dɔ̄ ki gèeǹee yil puee ní.

2 Kpèè, ubaatandaan un pɔ̄ɔ̄yee di dòońee,

ti-Dindaan di túnní-u.

U náań nì utaa un nì ataanyiŋkumbil lítée ní,

kubuŋkpaaŋŋu kun jītí ki bíiĺ tikɔkɔee,

utaakpaan un nì ibun gbéèyee.

U kpéelikí tikɔkɔ nì mpɔn ní.

3 U làá dāá téé kitiŋ kin di náań nì kibeefuulii

ní Eefiraayiim danyɔgbiliibi cáá ki-pu dilambilee

kí lúkú binib ń nīn tà.

4 Mpumpukum min yɔ́ĺ

bi dūu nyáantì-kì

kì tɔ́kɔ́ digbantandi pu

ditantakal din kpaatanti cáá ntiŋkpamee yilpuee,

làá dāá nīn náań nì fiigi subil

din péé ki mántèe ní.

Unil tin lì yii u wālifí-dèe

u kìtī-dì ní kí kpáàa dūú pɔ̀kɔ̄.

5 Ŋwiin gbantee, ti-Dindaan Mpɔŋkɔdaan u-ba di làá dāá nīn sá u-nibul din kíǹee beefuuliiki kin ŋān̄ ki jìl̀ee. 6 U làá dāá tīī bibɔsoonliibi deedee Fam, ní kí dāá tīī bin yú kitiŋ punyɔkɔpu ki jì binannanliibee mpɔn.

Bidanyɔgbiliibi bèel̄ Unimbɔti bɔnaatiliu

7 Ki kpáaǹ gba ndaam yāntì

bisaraaŋaliibi nì Unimbɔti bɔnaatiliibi gáatì.

Ndaam min pɔ̄ɔ̄yee yāntì bi còom̄ ki kpìntī.

Ndaam yāntì bi gáatì kaa ti nyí tin poon bi bée.

Ndaam min pɔ̄ɔ̄yee yāntì bi còom̄ ki kpìntī,

kaa ŋūǹ kí nàatī tin bi wál̀ee.

Baa ti wāĺ kí sòoǹ ibɔsoon tiŋan.

8 Bi wūliŋkì ki gbéeǹ bi-teebilib kɔkɔ,

laaba kaa ti kíǹ ki ŋān̄.

9 Bi bí ki lì yii:

«Ŋma ní u kalin là kí dàkà dinyil ní?

Ŋma ní u là kí lēē tin u wāĺee taapu kí dàkà ní?

Mbiyaawaamu mun ní bi dáá bābitì

dibiilee ní u làá dàkàaa,

campɔntib bin bi dáá gíí dibiilee ní?

10 U lì ki bùsī yii:

b+a = ba, b+oo = boo

d+a = da, d+oo = doo.»

11 Too, kɔŋkɔnnee,

ti-Dindaan làá sòoǹ nì dinibulee isooncaan ní,

isoon in ní baa gbìl̀ee.

12 U nìn pée tùkū-bi yii:

«Diŋuŋfil laŋki sèé,

yàntīmaan un kamaa gīīyee ń ŋùŋfì.

Doo di sá laakin ní diŋuŋfil bée.»

Ama ní baa pílifiǹ-u^a.

13 An pu ní ti-Dindaan mun làá sòoǹ nì bi yii: b+a = ba, b+oo = boo, d+a = da, d+oo = doo, án nín làá ŋá pu bi yaa bíi còom̄ee, bí lítí tiwantampin kí kɔ̄fì bi-cammuee. Kutaliŋŋu làá sàl̄-bi ní bí cúú-bi kuyuŋu.

Ditaŋkpal din ŋúb́ kudii pɔŋŋuee

14 Nimbi bibeeliliibi bin kpòotī

dinibul nee Jeerusaleem tiŋkinee,

pīlifìmaan ti-Dindaan nín lī puee.

15 Di sá ni bí ki lì yii:

«Ti nì ŋkúm pūtì ki pōoǹ tɔb,

ti nì ditaŋkpiilin yab ŋá mpèé.

Báà nnaabu yaa bāań, ŋuaa làá ká-ti,

kun puee inyimɔn di sá-ti ŋkɔŋkoon,

ní mili mili sá-ti kibalilaŋ.»

16 An puee ti-Dindaan Mpɔŋkɔdaan nín lī puee sèé:

«Kpèè, m bíl̀ Siiyɔn jool pu

ditaŋkpal din sá ditampinjal m cɔ́ŋkèe,

ditaŋkpal din ŋúb́ kudii pɔŋŋu,

ki bá ki pɔ̄ɔ̄yee dí nīn sá dinyeel^b.

Un kamaa yaa dū u-ba ki dīntì di-puee

pée kpá kí lítí.

17 Ibaamɔn di làá nīn sá ŋŋmii ŋun m cáa ŋmàntēe,

ní deedee sá ŋŋmii ŋun m dūu béè yii an tèen̄ee.»

Ataanyiŋkumbil làá dāá nàan̄ ni-nyimɔŋkɔŋkooŋyi

ní nnyim ń dāá kùntī ni-balilaŋki.

18 Ni nì ŋkúm nín pūtì ki pōoǹ tɔb puee làá kpìtī,

mpèé ŋun ni nì ditaŋkpiilin yab ŋée kaa làá kàl̄.

Nnaabu yaa láa bāańee,

ŋu làá dāá nà-ni.

19 Ŋu làá nīn pée jītí ní ŋwiin kamaa, ŋwiimpu nì kunyeeu. Ŋyunti ŋun kamaa ŋu yaa jítèee, see ŋú kpáaǹ-ni. Binib yaa láa gbìl̄ ŋu-nyɔɔbundi taapuee, dinyoondi làá dāá kɔ́-bi.

20 Kii dilaŋkpandi nín lī puee yii:

«Ndoo kaa làá nīn fɔ̀kɔ̀

unil ń ŋmā kí dòon̄,

sata kaa làá nīn wāā

unil ń ŋmā kí dūú bìin̄.»

21 Tiŋman, ti-Dindaan làá dāá yīkì yilpu

kii u nín nìn ŋá pu Peerasiim jool puee ní.

U làá dāá gíí diŋuul

kii u nín nìn gíí diŋuul Gabawɔn tantakalin puee,

kí tɔ̄ u-tundi, u-tundi din di sá atulimee,

kí tɔ́ u-tundi din sá maamaaci tundee.

22 Kɔŋkɔnnee, ní gbèen̄ ibeel. An yaa sá fám ikusaka in bóob́-nee làá mɔ̀tīí síkí. Di sá yii m gbìl̄ ti-Dindaan Unimbɔti Mpɔŋkɔdaan lī yii u lēē ki síiǹ kí nàan̄ kitiŋ nee kɔkɔ.

Ukpaal ciiŋyi nyánní Unimbɔti cee ní

23 Kpòom̄maan ni-tafaliŋ kí pīlifiǹ-mi!

Ní pīlifìmaan m-nyɔɔbuŋŋi tiŋan!

24 Mimmee ŋyunti kamaa ní

ukpaal kù kí bɔ̄l̀ kaa gbèentáaa?

U cátí adan, ki wìil̄ atannaapiki

kaa gbèentáaa?

25 U yaa kpátì bukpaa tāntèe,

ní ú yàaǹ aneeti boolii,

kí bɔ̄l̀ kumiini biliŋ.

Míǹ boonee ní ú bɔ̄l̀ bilee nì idi nì ɔɔji ipɔ̀n pu,

ní kí bɔ̄l̀ tijimpin tiba mun ŋkpaabuku.

26 U-Nimbɔtiu di kpōotì-u ú ŋá míǹ,

úǹ di dàkā-u min ní an máaǹ ú ŋée.

27 Baa dùŋfī tɔrɔku un inaa dátí

ki gbáà tijimpinee kí gbá aneeti,

baa tí dū tɔrɔku taaŋi kí tāā kí gbátí kumiini.

Ama ndɔ ní bi cáa gbáà aneeti,

ní ki cáá kidɔbiki ki gbáà kumiini.

28 Ukpaal yaa gbáà bileeyee,

waa gbáà kaa gbèentí.

U yàntī tɔrɔku taaŋi nì

kuwaŋkuluu kun dàtī-uee di tà bilee,

ama baa tà kí mátí abil.

29 Tíǹ gbanti kɔkɔ nyánní

ti-Dindaan Mpɔŋkɔdaan cee ní.

Úǹ di sá maamaaci saŋkiliu,

ní ki tūǹ atuŋkpaan mun.