Yeesaya 27

Ti-Dindaan làá pɔ̄ɔkiǹ kupeebiliŋŋu Leefiyatan

1 Yaadalee, ti-Dindaan làá dāá yòon̄ u-tàataajiki kin jītí, ki sá kikpaŋkpaaŋŋi, ki cáá mpɔnee kí dáaĺ Leefiyatan, ukoobu un sáńee, Leefiyatan, ukoobu un nyí diŋmatindee tafal. U làá dāá kpɔ̀ tiŋkun peebilinti gbanti^a.

Ti-Dindaan nì u-fiinyi sufii kpaabu bɔti

2 Ŋwiin gbantee, ní dāá gāā fiinyi sufii

kpaabu bun damam mɔ̄ee nlan.

3 «Man ni-Dindaan di sá bukpaa gbanti ciitiliu.

M yàantí-bu nnyim ní ŋyunti sá kamaa.

Ŋwiimpu nì kunyeeuee, m cí-bu

ubɔ ń taa pée ŋá-bu ikpiti iba.

4 Maa ti gíí diŋuul bu-pu.

M yaa ká abɔjanaakun nì ikuŋkum bu-poonee,

m làá gāā-i kí dū-i kí tɔ̄ ŋŋmin í wà.

5 Ama un yaa sáǹ ki kɔ́-mee,

man nì udaan làá sòoǹ kí gbìlīǹ tɔb

ŋgbansɔŋfi ń nīn bí ti-kansikin.»

Ti-Dindaan làá dū Isirayeel yab kpitii kí pɔ̄-bi

6 Iyunti in bí ki dòoń nee poonee,

Jaakɔb nibul làá dāá báań inyaan,

Isirayeel làá dāá tɔ̄ mpamu kí púkuḿ,

ní kí lòoǹ abil kí gbéeǹ duulinya kɔkɔ.

7 Ni ká ti-Dindaan dáaĺ u-nibul yab tafal

kii u nín nìn dáaĺ bin sàantí-bee tafal pueeee?

Ni ká u kūū-bi kii u nín nìn kūū

bin nìn kù-bee pueeee?

8 Aayee, u dáaĺ bi-tafal

ní ki jìn̄-bi ki tɔ́ kuyuŋun ntincamun.

Kii ŋwìiń nyalaŋki pú buŋku nín jītí puee,

míǹ ní u yāntì u-buŋkpaaŋku yōoǹ-bi ki cáa búntì.

9 Jaakɔb nibul kpitii nín làá pítí puee sèé,

dikpántil din ní bi-kpitii pɔ̄tam làá cáańee sèé:

Bi làá nà isaraafan taŋkpeeŋi dúsi dusi,

kii bi nín nà kaluu taŋkpeeŋi ŋí kpántí ŋyim puee.

Iwindɔ nì talaalutuukaa saraafaŋyi kaa ti làá nīn cɔ́.

10 Báà uniseen kaa ti kóò kitiŋ kin

ní bi máń digundi ki māntìi túee.

Kì kíǹ ki bí fám ní kii kuteeuee.

Anabil làá nīn dòoń niin ní ki jīǹ,

ki dɔ̀ niin ki ŋùŋfī,

ní ki ŋmóò tifaapibiti.

11 Tikpaŋkpaal yaa kūń ki kɔ́fì kɔ́fèe,

ní binimpoobi ń dāan̄ kí dū ŋŋmi kí sēē.

Tiŋman ní, dinibul nee kaa gbìl̀ tibɔti taapu.

An pu ní Unimbɔti un náań-bee kaa làá sɔ̄ bi-pu,

un di máń-bee kaa làá sɔ̄ bi-saai.

Bin kɔkɔ cūtì kuyuŋuee làá fàtīí gítiń

12 Ŋwiin gbantee, ti-Dindaan làá dāá gbá u-jimpinti,

kí yòon̄ Eefiraati mɔɔl kí tin cáá sāā Eejipiti buŋŋu^b.

U làá dāá kóoǹ nimbi Isirayeel yab ubɔ ubɔ kii idifinee.

13 Ŋwiin gbantee, bi làá dāá búń ŋyiŋkpaan.

Niinee, bin nìn wáŋkì ki bíń Asuur tiŋkinee,

bin bi nìn jìn̄ ki tɔ́ Eejipiti tiŋkinee ń dāá tíntiń.

Bi-kɔkɔ làá dāá dāan̄ kí gbàan̄ ti-Dindaan nimbiin

kí jāam̀-u u-circir jool pu, Jeerusaleem tiŋkin.