Yeesaya 26

Kitiŋ kin bi máń digundi ki māntìi túee laŋŋu

1 Ŋwiin gbantee, bi làá dāá gāā nlan nee Juuda tiŋkin:

«Ti cáá kitiŋ kin pɔ̄ɔ̄yee.

Kí ŋmā kí wúń ti-puee,

ti-Dindaan dū agun ali ní ki māntìi tú-kì.

2 Pìitīmaan mpunyɔmu kí wàan̄

ditimbundi din nib sá ibaamɔn dambi,

ki yú nì Unimbɔti deedeeyee ń jītí kí kɔ́^a.

3 Un di yaa nóó-si nì dipɔbil dibee,

sii ti-Dindaan tìì udaan ŋgbansɔŋfi,

kun puee sii baba pu ní u máká.

4 Nín̄ mákámaan ti-Dindaan pu kí nīn cá jaanjaan,

ti-Dindaan un di sá talku taŋkpalee.

5 U téé bin nìn kóò ajoon yilpuee ki lúkú,

ki nāaǹ kitiŋ kin báà ubɔ kaa nìn ŋūǹ kí já kí fōōyee.

U téé-kì ki lúkú,

ki dū-kì ki tɔ́ ntampukumin.

6 Binib bin kaa bí tibanee, bin sá biwɔfibee,

bíǹ di kíǹ ki tà ki-pu ki còom̄ bi nín là puee.»

Iyuntijoolkaa wimmeem

7 Deedeedaan saŋŋu tèen̄ ní,

ti-Dindaan, a tàntī u-saŋŋu ní an kaa cáá disampɔl.

8 Ti tàkā nsan ŋun a tīī-ti mara yii tí nóóyee pu,

ti-Dindaan, sii pu ní ti máká.

Tin ti lèe di sá tí yíiń a-yindi, kí dàkafì a-pu.

9 Kunyeeuee, m-naŋki fèefī ki nyàab̀-si ní,

m nyàab̀-si nì m-pɔbil kɔkɔ.

Di sá yii a yaa bíi sòoǹ kitiŋ pu nib bɔtee,

ní duulinya nib béetí tin di sá deedee bɔtee.

10 Ama unil yaa súń binikpitib saayee,

baa béetí tin bi máaǹ kí ŋá án fáatíǹ-see.

Báà gba kitiŋ kin poon binib ŋáań tiŋanee,

bíǹ ŋáań tin kaa ŋān̄ee ní,

kaa wāĺ sii ti-Dindaan nín sá ukpaan puee.

11 Ti-Dindaan, a dúkutì a-ŋal kí dáaĺ bi-tafal,

ama bíǹ kaa wāĺ-ŋu.

Bi làá dāá ká a nín mɔ́tí a-nibul pu nì dineendee,

ní icoo ń dāá cúú-bi.

Ŋŋmi ŋun a bɔ́ntì ki síiǹ a-nannanliibee

di làá dāá wà-bi^b.

12 Ti-Dindaan, a tìì-ti dipɔɔsɔŋkil,

ní tin kɔkɔ ti bɔ́ntì kí ŋée,

sii di fōō ki ŋá ki tīī-ti.

13 Ti-Dindaan ti-Nimbɔtiu,

bikpilib bin kaa sá siiyee di nìn kpōotì-ti,

ama sii baba yindi ní ti yíì.

14 Bin kpíìyee kaa ti làá gítiń.

Bin kaa ti bée kpántì kii mboonee ní,

baa ti làá yīkì.

Sii di dáaĺ bi-tafal ki nāaǹ-bi pílpil,

ubɔ ń taa ti téetí bi-pu dalba dalba.

15 Ti-Dindaan, a yāntì ti-timbundi wíiǹ,

a yāntì ti-timbundi wíiǹ ki dàkā a-nyooti,

a yāntì ti-tiŋki wāaǹ.

16 Ti-Dindaan, dinimbinaamandi poonee,

sii watil pú ní ti fàtī ti-nimbikpeeŋu kí túĺ.

A yaa dáaĺ ti-tafalee ní ti kíǹ ki bí ki mèé-si.

17 Ti-Dindaan, ti nìn bí a-nimbiin

kii upɔdaan di làá màal̀ee.

U yáliŋkí imatiŋween ní ki gbáà ibiil.

18 Ti mun nìn cáá dipool,

ki yáliŋkì imatiŋween,

ama ní ki dāa dūu màl̄ kubuŋu.

Taa nìn ŋúń ki cáań difiil kitiŋ pu,

kaa tí ŋúń ki cáań binib duulinyan.

Bitaŋkpiibi fìkititam nì ikpiti tafadaaldi

19 A-yab bin kpíìyee làá fàtīí ká dimaŋfal,

a-taŋkpiibi làá fìkitī.

Binib bin dɔ̄ ntampukuminee

làá fìntī ní kí nīn tátí nì dipɔɔpindi.

Ti-Dindaan làá dāá tīiń-si ŋwalifi malindi,

di-puee, kitiŋ ń dāá yàntī bitaŋkpiibi ń fìkitī.

20 M-nibul, yīkì kí kɔ́ a-dumpu,

kí dáaĺ a-kampiiŋi liitil kí pìin̄ a-ba pu.

Kɔ́ kí báĺ ŋyunti ŋubɔ poon

kí nīn cí ti-Dindaan ŋuul ń sɔ̀ŋkì.

21 Kpèè, ti-Dindaan di nyánní u-kɔŋkooŋŋunee.

U làá cùú dáaĺ kitiŋ pu nib tafal bi-kpitii pu.

Kitiŋ làá nyāntí fatiku un bi yāaǹee mpaampiin pu,

kàa ti làá báĺ binib bin bi nìn kūū kūūyee pu.