Yeesaya 25

Ti-Dindaan di sá deedeedambi balilaŋki

1 Ti-Dindaan, sii di sá m-Nimbɔtiu.

M làá yòon̄-si yilpu ní kí nyɔ̄ŋkì a-yindi.

Di sá yii a ŋáaǹ maamaaci tuuŋŋi

ŋin a bɔ́ntì ki yóoǹ dooooyee,

ŋi pée bá ki pɔ̄ɔ̄ kaa kpántí.

2 A dū kitiŋee ki kpántì ditaŋkpakpukul.

Kitiŋ kin bi nìn máń digundi ki túee kpántì adigbun.

Binicambi tiŋki kin nìn pɔ̄ɔ̄yee kaa ti sá kitiŋ,

bi kpá ki làá gíti náań-kì dalba dalba.

3 An pu ní dinibul din cáá mpɔnee tìì-si tinyool,

bin néeń tipɔmbɔti tiŋkinee, binib fàŋkí-si.

4 Di sá yii sii ní binandambi nìn sáń ki kóò,

bifalaadambi nìn sáń ki kóò-si ní dinimbinaamandi yuntiŋu.

Utaa yaa bíi nèe, sii di sá kibalilaŋ,

ŋwìiń yaa tùm̀ee, sii di sá mboon.

Di sá yii bin néeń tipɔmbɔtee bum sá kii

utaakpaan nín gbáà digundi puee ní,

5 a lì kii ŋwìiń nín gbáà kitiŋkuliŋŋi puee ní.

A yāntì binicambi wooku ŋmíl̀,

kii ditagbandi nín lìkintí ŋwìiń pu án sɔ̀ŋkèe ní.

A yàntī bin néeń tipɔmbɔtee laŋyi ŋmīlifí.

Ti-Dindaan làá bɔ́ntí jiŋaal kí tīī anibul kɔkɔ

6 Ti-Dindaan Mpɔŋkɔdaan làá bɔ́ntí jiŋaal ubɔ

dijool nee pu kí tīī anibul kɔkɔ.

An dāa sá tijimmɔntiil nì ndamɔntiim ní jiŋaal gbantin,

jiŋaal un poon bi dāa ŋmóò tinan tin mèeǹ,

ki nyù ndaam min dōoǹ ki wāĺ kílkilee.

7 Dijool gbanti puee,

u làá cúú kpɔsata un

anibul kɔkɔ lōōyee kí lēē,

ŋŋaabu ŋun bīī atimbun kɔkɔ puee.

8 U làá kúntí ŋkúm kí nīn cáa cá jaanjaan.

Ti-Dindaan Unimbɔti làá pítí báà ŋma nyinnyim^a

kí nyāntí u-nibul icoo in cúú-bi kitiŋ nee poonee.

Úǹ ti-Dindaan di lī míǹ.

Isirayeel bí dipɔɔpindin ní Moowaab kɔ́ nnaabun

9 Ŋwiin gbantee, báà ŋma làá dāá lì yii:

«Úǹ di sá ti-Nimbɔtiu!

Ti nìn máká u-pu ní u fīī-ti.

Úǹ ti-Dindaan pu ní ti nìn máká.

Án nīn mɔ̄ǹ-ti tí nīn fàal̀

u nín fīī-tee pu.

10 Ti-Dindaan ŋal

làá nīn bīī dijool nee pu!»

Ama u làá tāā tāā Moowaab tiŋki

kii bi nín tà timool kí ŋmàlim̀ tinaabin poon puee ní.

11 Niinee, kì làá kpátí ki-ŋalii

kii unyiŋwaŋkil nín kpátí u-ŋalii puee.

Ama nì min kɔkɔ u bíi pɔ̄ɔntée,

ti-Dindaan làá sìntī u-lambil taapu.

12 Ti-Dindaan làá téé a-guŋŋi kí lúkú,

aguŋfɔkɔ ŋin bi máń ki māntìi tú-see,

u làá téé-ŋi ní ŋí lítí ntampukumin.