Yeesaya 29

Jeerusaleem tiŋki làá dāá ká difiil

1 «Ariyeel, Ariyeel, mbusu dɔ̄ ki cí-si,

sii Jeerusaleem tiŋki ní Daafiidi nìn jáń ki fōō.

A ŋūǹ kí nīn jīǹ jiŋaalib kɔkɔ dibintil kamaa,

2 ama m làá nàan̄ sii Ariyeel tiŋki.

A-nib làá nīn sūǹ ki yáliŋkí,

a làá nīn sá-mi nsaraafan ní.

3 M làá gāā m-janjanaapaal

kí màntīí tū-si ní kí jáǹ-si.

M làá mā aguŋfɔkɔ kí màntīí tū-si,

m làá bɔ́ntí tin máaǹee kí já nì si.

4 A dāa lítí taapu taapu

ní a-neel dāa bí kii a dɔ̄ kitiŋ taapuee.

A-nyɔɔbuŋŋi dāa nyēē ntamin ní baa gbìl̀.

A-neel dāa náań nì ufaŋfanti yɔŋu,

ní ki nyēeń doooo kitiŋ taapu taapu,

ní a-nyɔɔbuŋŋi dāa nyēeń ntamin

ki náań nì ŋfoon.

5 A-nannanliibi bin wīikí tikpilee

làá dāá kpátí kí gbí kii ŋkpɔŋkpɔmee.

Binib bin wɔ́b̀-see kitil

làá dāá nīn bí kii tifeel tin kubuŋu yòontée ní.»

Ama ní dicilpu kpalaayee,

6 ti-Dindaan Mpɔŋkɔdaan làá dāá dī

ditaadundi pu,

nì kuwookpaaŋŋu pu,

nì kubuŋkpaaŋŋu nì utaaja pu,

nì aŋmilimbil ŋin wùee pu kí já kí tīī-si.

7 Kii kudamintiiu àá kunyeeu leedakal nín wáŋkí puee,

míǹ ní atimbun dikitil din jáà nì sii Ariyeel tiŋkee,

bin kɔkɔ bíi tákà-si,

ki māntìi tú-si ki wɔ́b́-see làá nīn bí.

8 Án làá dāá nīn bí kii unil un ŋkùm cáá

ní u dɔ̄ ki dámintí yii u bíi jīǹ

ki dāa fīntì ŋkùm gbíntìi cááyee,

àá kii unil un nnyinnyoo cáá,

ní u dɔ̄ ki dámintí yii u bíi nyù nnyim,

ki fīntì nnyinnyoo gbíntìi cáá-uee ní.

Míǹ ní án dāa sá ki tīī

atimbun kupaau ŋin nìn bí

ki jáà nì Siiyɔn joolee.

Dinibul din jɔ̀b̄ ki gbí ndaamee

9 Ní bàkatī sèeee án ŋá-ni bitii.

Kpántímaan bijɔfub kí taa ti nín̄ wāĺ.

Ní gbímaan, ama an taa nín̄ sá yii ndamam ní ni nyùn̄.

Nín̄ kpìntīmaan, ama an taa nín̄ sá yii

ndaam min pɔ̄ɔ̄yee ní ni nyùn̄.

10 Di sá yii ti-Dindaan di dū

ŋgeembiim miba ki tɔ́ ni-pu^a.

- U bɔ̄ntì nimbi bibɔnaatiliibi nimbiliŋ -,

- ki dū iŋaabu ki bīiǹ nimbi bibɔɔbi nimbiin -.

11 Dileedakal nee kɔkɔ bí ni-cee kii tibɔti tin bi ŋmàn̄ ki ŋá kugbɔŋu kun bi kpáb́ ki nyīī ŋŋalee ní. Bi dū-ku ki tīī un ŋūǹ kí kàaǹee, ki bí-u yii: «Fōō kí kàaǹ», ní udaan kíí yii: «Maa ŋūǹ kí kàaǹ, di sá yii bi kpáb́ kugbɔŋuee ki nyīī ŋŋal». 12 Bi tí dū-ku ki tīī unil un kaa ŋūǹ kí kàaǹee ki bí-u yii: «Fōō kí kàaǹ», ama ní udaan kíí yii: «Maa nyí bi nín kàaǹ puee».

Ti-Dindaan nìkī u-maamaaci tuuŋŋi

13 Ti-Dindaan sòon̄ dinibul nee pu yii:

«Binib nee pìlīǹ-mi kinyɔkɔn fám ní.

Bi nyɔ́ŋkí-mi nì bi-nyɔmmu fám ní.

Ama bi-pɔbiliŋ poonee, bi dátiǹ-mi ní.

Bi nín lì yii bi tɔ́-mee,

binib marab bin bi dūu dàkā-bee ní bi nóó^b.

14 An pu ní man làá mɔ̀tīí ŋá atuŋkpaan

ní án ŋá dinibul nee bitii.

Bi-ciŋfitiibi ciiŋyi làá dāá wāŋkì,

ní bi-nyiliibi nyil ń dāá kúntí^c.»

Ni yíì ti-Dindaan ŋma ní?

15 Mbusu di dɔ̄ ki cí binib bin bɔ́ntí

tin bi làá ŋée dibalin

ki cáa bāal̀ ti-Dindaanee.

Bi tūǹ bi-tuuŋŋi dibɔmbɔndin ní ki lì yii:

«Ŋma wāĺ-ti?

Ŋma nyí tin ti bíi ŋáańee?»

16 Ba ní ni líbití tibɔti mimmee?

Uyɔɔmaati nì kuyɔkɔu ŋmàaa?

Tin bi máńee ŋūǹ kí lì un máń-tèe yii:

«Úǹ di kaa máń-maaa»?

Dibool ŋūǹ kí lì uyɔɔmaati yii:

«Waa nyí dimalaaa»?

Ti-Dindaan làá kpántí u-nibul bimbim

17 An kíǹ fiii nàanyɔkɔ,

Leebanɔn bambaŋku làá kpántí

asubiŋmɔkaa kpaabu,

ní asubiŋmɔkaa kpaabu ń kpántí kubambaŋŋu.

18 Ŋwiin gbantee, bi làá dāá kàaǹ

tin kā kugbɔŋuee poonee bitafakpaafub ń gbìl̄.

Bijɔfub làá dāá nyā dibɔmbɔŋkpaandin

ní bi-nimbiliŋ ń cúú kí ŋúbití ní bí wāl̀.

19 Binib bin sīntiǹ bi-ba taapuee

làá dāá nīn fàal̀ ti-Dindaan ni,

ní biwɔfib ń dāá nīn nyàkantī

Isirayeel circir Nimbɔtiu pu.

20 Biwɔ́biliibi làá dāá kúntí,

bibeeliliibi làá dāá wāŋkì,

ní bin nyàab̀ kí ŋá bi-jutiibi tikpitilee ń dāá céetí.

21 Bin tūntí bi-jutiibi pu abɔgaan,

ki pīil̀ bibɔsoonliibi titalindi,

ní ki yàntī bi kù maanyiiba bɔtee,

bíǹ gbanti kɔkɔ làá dāá wāŋkì.

22 An puee ní ti-Dindaan

un nìn fīī Abraam ki líìyee

bí Jaakɔb dicaŋkun yab yii:

«Kí yòon̄ kɔŋkɔnnee kí nīn cée,

icoo kaa ti làá cúú Jaakɔb yab,

baa ti làá tìntī bi-yiliŋ nì icoo.

23 Di sá yii bi nì bi-biyaamu yaa láa ká

tin m làá dāá ŋá bi-kansikinee,

bi làá dāá béé yii man di sá

Jaakɔb Nimbɔtiu un bí circiree.

Bi làá dāá fàŋkì kí taa yìntīǹ man Isirayeel Nimbɔtiu.

24 Binib bin yiliŋ gáatèe

làá dāá ká dinyil,

ní bin nìn bí ki gbùkum̄ee

ń dāá kíí bí dàkà-bi iciin.»