Unimbɔti bíi kpáafí Jeerusaleem yab
22
1 Tin Unimbɔti lī Dileedakal Tantakal puee sèé.Jeerusaleem,
ba ŋá ní a-nib kɔkɔ jɔ́m̀ adiin yilpu ní?
2 Ba pu ní a sá kitiŋ kin poon kuwoou bí,
an tùm̀ dàii, ki bí jiŋaal poonee ní?
Kitàataajiki ní baa dūu kūū a-nib bin kpíìyee,
an kaa sá kujaau poon ní bi kūū-bi.
3 A-janjakpilib kɔkɔ sáǹ ki kátì pílpil,
bijanjaliibi bin tòó ipiinee dū-bi ki kpántì bisarkadambi.
Bi nìn cúú bin kɔkɔ bi nìn pée kée dicilpu,
ŋyunti ŋun bi nìn bíi sáńee.
4 An pu ní m bí-ni yii:
«Ní yàntīmaan ḿ sɔ̄ lɔ̀lɔ.
Bi nāaǹ m-nibul,
ama ní taa màkan̄ kí sɔ̀ŋkì m-pɔbil.
5 Di sá yii díǹ wiiŋŋu nee,
ti-Dindaan Unimbɔti Mpɔŋkɔdaan
dū fìkil fikil nì dilitil nì dinyoondi ki tɔ́ń ti-pu.»
Dileedakal Tantakal poonee,
bi wīī digundi din māntìi tú kitiŋee,
ní ibiil fōō ki píĺ bin bí ajoon puee ń jòoń-bi.
6 Eelaam yab yōoǹ abaatan ki bàl̄.
Bijanjaliibi bin nìn kā janjatɔrɔkub puee nìn bí
ní bitanjakaliibi mun bí.
Kiiri janjaliibi bɔ́ntì bi-gbampɔɔŋi.
7 Jeerusaleem, janjatɔrɔkub gbí a-tantakaŋ ŋin ŋān̄ee poon,
ní bitanjakaliibi yú a-punyɔkɔpu kí já nì si.
8 Juuda beel kaa ti cáá diwundi.
Yaadalee, ni fātì ni-nimbikpeeŋu ki túĺ
tijanjawan tin bí <Kubambaŋŋu diikunee>a.
9 Digundi din māntìi tú Daafiidi Tiŋkee,
ni ká laakin bátì bátì ki lítèe nín wīikí puee.
Ni kpáafì nnyim dinyimbɔbil din bí taapu púee poon.
10 Ni kàan̄ Jeerusaleem diiŋŋi,
ni wīil̀ aba kí mɔ̀tīí tīī kitiŋ gundi mpɔn.
11 Ni gbìn̄ dinyimbɔbil agun ali kansikin
kí ŋmā kí dáaliń dikpikilee nyim.
Ama naa fātì ni-nimbikpeeŋu ki túĺ un ŋá tíǹ kɔkɔee,
kaa béè un di túń an tundi ki síiǹ dooooyee.
12 Yaadalee, ti-Dindaan Unimbɔti Mpɔŋkɔdaan
nìn yíiń-ni ní sɔ̄ kí yāliŋkì,
kí kòol̀ ni-yiliŋ ní kí dū kpɔsatab kí pèen̄.
13 Ama kpèèmaan, ni bí ifaal nì mmɔnni!
Ni bí ki kù inaa, ki làntī ipii,
ki ŋmóò tinan ní ki nyù ndamam
ki lì yii: «Tí jī kí nyɔ̀maan,
kun puee fool ti làá fu kpú.»
14 Ama ní ti-Dindaan Mpɔŋkɔdaan
sòon̄ tibɔti nee an kɔ́ m-tafalin yii:
«M pée kpá kí dū ikpiti nee kí pɔ̄-ni
kí tin sāā ni-kúm dal.»
Ti-Dindaan Unimbɔti Mpɔŋkɔdaan
nín lī puee dee.
Ubɔti tɔntɔŋkpiliu Seebina làá fá u-paaŋŋu
15 Ti-Dindaan Unimbɔti Mpɔŋkɔdaan bí-mi yii: «Cù kí tùkù ubɔti tɔntɔŋkpiliu Seebina un kpèé dibeecindi tuuŋŋee yii:
16 <Ba ní a cáá doo nee ní?
A-yaaja ulɔu di bí doo
ní a yāntì bi gbìn̄-si dikaakul doo?
Bi gbìn̄-si dikaakul kigbantaŋ yilpu,
ki lùkū ditaŋkpal ki bɔ́ntì-si ŋkɔŋkoon.
17 Kpèè, ti-Dindaan làá tɔ̄-si kí fá ndan,
u làá gúĺ-si kí bíĺ.
18 U làá kúntí-si á kpántí kii dinantaŋkulee,
kí dū-si kí tɔ̄ á tin lítí kitiŋ kin wāāyee poon.
Niin ní a làá tin kpú, niin mun ní
a-janjatɔrɔkub bin yì a-nyootee làá tin gbíntí,
sii un sá icoo ki tīī a-kpiliu dicaŋkuee!>
19 M làá dāá jà-si mpaan ŋun pu a kēe,
m làá dāá fōō tikpiti paaŋŋu ŋun pu a bée.
20 Yaadal gbantee, m làá dāá yíiń
m-tɔntɔnliu Eeliyaakiim, Ilikiyawuu jipɔɔn.
21 M làá dāá dū a-bɔkutil poon yal kí pèen̄-u,
kí dāá dū ŋŋaabu dambalau un a gbìǹee kí gbìn̄-u,
ní kí dū mpɔn ŋun ní a cááyee kí tīī-u.
U làá dāá nīn sá ubaati ní ki tīī Jeerusaleem yab
nì Juuda beel kɔkɔ yab.
22 M làá dāá dū Daafiidi beel saafiiu kí ŋúbiǹ-u.
U yaa láa pīitì kipunyɔkɔee, ubɔ dāa kpá kí pìin̄,
u yaa láa tí dūu pīiǹee, ubɔ dāa kpá kí pìitī.
23 M làá dāá cóoń-u kii dikpakpaalee,
mpaan ŋun pu u làá nīn cɔ́ ki pɔ̄ɔ̄ tiŋanee.
U-pu ní u-baa dicaŋku kɔkɔ làá dāá ká tinyool.»
24 U-baa dicaŋkun nyooti kɔkɔ làá nīn lúń úǹ baba pu ní, kii bi nín dù tisamɔŋwan kí yòon̄ asambil kí cáá sāā aboon kí lúntí dikpakpaal pu puee ní.
25 «Ŋwiin ŋubɔee, dikpakpaal din bi cóoǹ laakin pɔ̄ɔ̄ tiŋanee làá gíí kí kɔ̄fì ní kí lítí kitiŋ, ní diwaŋgul din nìn lúń di-puee kɔkɔ ń bīil̀.» Ti-Dindaan nín sòon̄ puee dee.