Yeesaya 21

Babiloon tiŋki làá lítí

1 Tibɔti tin ní Unimbɔti sòon̄ <tiŋku caŋin teeku> puee sèé.

Kii kunaakpaabuŋŋu nín jītí Neegeeb tiŋki pu puee,

míǹ ní unannanli nyánní kuteeu pú tiŋki,

kitiŋ kin báà ŋma fàŋkée poon.

2 Tibɔti tin m ká dileedakal poonee pɔ̄ɔ̄ tikpil.

U nì un nìn pēē kinyɔkɔee nyáń u-boon,

ní un nàantée bíi nàantí.

Ti-Dindaan lī yii: «Eelam yab, cùú já nì kì!

Meedii yab, cùú màntīí tū-kì!

M làá kúntí iyaliŋki kɔkɔ.»

3 M nín ká mimmee ní tiwool kɔ́-mi.

M gbìl̄ iwàlfi pu kii imatiŋweenee.

Kunimbaau kɔ́-mi ki yāntì m-tafaliŋ kpáá,

dinyoondi kɔ́-mi ki yāntì maa ti wāĺ.

4 M-pɔbil bíil̀ ní tifaandi kɔ́-mi m-wunti kíǹ ki jìkì.

M nín bàà kā ki cí yii án sɔ̀ŋkì m-pu kujoouee,

ní an dūu kpántì-mi dinyoondi.

5 Bi síiǹ teebilib ki kpátì iŋaabu ki bīiǹ,

ní binib kíĺ ki bíi jīǹ ki nyù.

Kpalaayee ní ubɔ téeń yii:

«Bijanjakpilib, yīkìmaan,

ŋmìtī ni-gbampɔɔŋi ŋkpam!»

6 Ti-Dindaan nín sòon̄-mi puee sèé:

«Cùú yóoń un làá nīn cí sintilee,

tin ní u làá kée, ú dūú bāakì.

7 U yaa láa ká janjatɔrɔku páaǹní

itaamu ili dátée,

ki ká binib kā mmamu pu

àá binib kā igutaamu puee,

ú dāá kpèè tiŋan, kí gíti kpèè tiŋan!»

8 Ní un bí ki kpèéyee téeń ki lī yii:

«Ukpil, ŋwiimpu kɔkɔee, m yú laakin ní m cée,

kunyeeu mun kɔkɔee m yú

laakin sá ḿ nīn yú ki cée ní.

9 Kpèè, unil ubɔ di dòońee.

U kāń janjatɔrɔku pu itaamu ili dátí-u.

U bí ki sòoǹ ki lì yii:

<Kitiŋee lítì ní, Babiloon tiŋki lítì.

Awaa ŋin ki-nib jáaḿee kɔkɔ

dɔ̄ kitiŋ ki wīil̀.>

10 «M-nibul, sii un ní ti-Dindaan gbáń

kii bi nín gbáà bilee dinaapaal pu puee,

ti-Dindaan Mpɔŋkɔdaan, Isirayeel Nimbɔtiu

cee ní m gbìl̄ an bɔti, ní ki cáa bíi nàatī-si.

Kunyeeu dáá dátàaa?

11 Unimbɔti sòon̄ Duuma tiŋki pu.

Ubɔ sòon̄ní-mi doooo Seeyiir tiŋkin ki lī yii:

«Uciitil, kunyeeu dáá dátàaa?

Uciitil, kunyeeu dáá dátàaa?»

12 Ní uciitil kíí yii:

«Kutaa bíi wúntí, ama kunyeeu làá gíti mɔ́.

Ni yaa là bí kíí-nee, ní fàtīí gítiń kí bàlifì.»

Deedan nì Keedaar timmu yab bíi sáń

13 Tibɔti tin Unimbɔti sòon̄ Bilaalibub tiŋki puee sèé.

Nimbi Deedan yab bin kā igutaamu ki jītée,

bilaalibub tiŋki bambaŋkun ní ni làá dòon̄ díǹ nyeeku!

14 Nimbi bin kóò Teema tiŋkinee,

tīīmaan bin nnyinnyoo cááyee nnyim bí nyɔ̀,

kí tīī bin sáń kí ŋmátée tijin bí jī.

15 Kun puee bi bíi sáń ntàataajimu mun

bi dáaĺ ki fúutì kujitoounee,

ki bíi sáń itɔfi in bi dáaĺ ki làá tɔ̄ee,

ki bíi sáń kujaau nín yíkìi pɔ́ɔkì puee.

16 Di sá yii ti-Dindaan nín lī-mi puee sèé: «Kí yòon̄ díǹ kí cáá sāā dibindi deedeeyee, Keedaar yab nyooti kɔkɔ làá kúntí. 17 Keedaar yab kansikin bibaatandambi bin tòó ipiinee kaa làá dāá kíń ki náaǹ.» Ti-Dindaan, Isirayeel Nimbɔtiu di lī míǹ.