Yeesaya 20

Yeesaya kaa pēē tiba kaa táká anaataka

1 An nìn sá dibindi din ní Asuur bɔtiu Saargɔn nìn tú u-janjakpiliu u cūtì ki jáń nì Asidoodi tiŋki ki fōō-kèe ní.

2 Ŋyunti gbanti ní ti-Dindaan nìn tùkū Amɔtisi jipɔɔn Yeesaya yii: «Nín̄ cá, á gbìntī kutuku un a gbìn̄ a-caŋee, kí cúú a-naatakaŋ mun kí tákatí.»

Ní Yeesaya ŋá míǹ, ki kíǹ ki còom̄ kaa lōō tiba, kaa táká anaataka mun. 3 Ní ti-Dindaan bí yii: «M-tɔntɔnliu Yeesaya nín cōom̀ kaa lōō tiba, kaa táká anaataka mun abin ata nee, an sá kudaaŋŋu nì tibɔkpaafikaal ní kí tīī Eejipiti nì Kuusi timmu yab. 4 Míǹ ní Asuur bɔtiu làá dāá cúú Eejipiti yab sarka ní kí cúú Kuusi yab, binipɔmbi nì bitikpilib kí cùnnì kuyuŋu. Bi làá dāá nīn còom̄ kaa lōō tiba, kaa táká anaataka ní bi-kpiliŋ ń nīn dɔ̄ fám. Án dāa sá icoo ní ki tīī Eejipiti yab. 5 Binib bin nìn máká Kuusi yab pu, ki nìn fàal̀ Eejipiti yab puee wunti làá dāá yɔ̀tī ní icoo ń dāá cúú-bi.»

6 Ŋwiin gbantee, binib bin kóò ditiŋkugbandee làá dāá lì yii: «Kpèèmaan tin bāań bin pu timbi mákée! Ti bàà nìn cɔ́tí yii ti làá sāǹ kí kɔ́-bi ní bí jòoń-ti kí fīī-ti Asuur bɔtiu ŋaan. Mimmee ti làá nín ŋá mana ní kí ŋmátí dee?»