Yeesaya 19

Unimbɔti làá dáaĺ Eejipiti yab tafal

1 Tibɔti tin Unimbɔti sòon̄ Eejipiti tiŋki puee sèé.

Kpèè, ti-Dindaan di kāń ditagbandi din yáb̀ee pu

ki jàkà ki dòoń Eejipiti tiŋkinee.

Tifaandi kɔ́ Eejipiti waaŋi u-nimbiin,

ní Eejipiti yab bi-ba pɔbil bíil̀ tikpil^a.

2 Ti-Dindaan bí yii:

«M làá jáaǹ Eejipiti yab,

unil nì u-nabiki làá nīn jáà,

ní unil nì u-juti ń nīn jáà.

Kitiŋ kiba làá nīn jáà nì kin kíǹ,

ní dibeel diba ń nīn jáà nì din kíǹ.

3 M làá yàntī Eejipiti yab wunti ń yɔ̀tī,

kí yàntī tin bi bɔ́ntì kí ŋée ń gbíntí fám.

Niinee bi làá cù bi-waaŋi

nì bin yíì bitaŋkpiibee nì bi-bɔɔbi cee dibalifil.

4 M làá dū Eejipiti yab kí ŋá

bikpilib bin bɔti pɔ̄ɔ̄yee ŋaan.

Ubɔti un cáá mpɔnee di làá jī dibeel bi-pu.»

Ti-Dindaan Mpɔŋkɔdaan di lī míǹ.

5 Niil mɔɔl làá fóotí,

dimɔɔl gbanti làá kpā.

6 Ibun làá dāá nūukì,

Niil buntaaŋi poonee,

nnyim làá dāá fóotí ní ŋí kpā,

ní tikati nì dikal ń dāá yɔ́ĺ.

7 Timool tin nyēē Niil mɔɔgbandi

nì laakin ní di-nyim dì ki kóò tiŋkunee,

tikpaajin tin bi kùn̄ dimɔɔgbandee làá kpā.

Kubuŋu làá yòon̄ kí fá,

ní báà tiba kaa ti làá kíń ki yú.

8 Bijɔncuuliibi làá dāá yāliŋkì.

Bin kɔkɔ tòó ijɔmpiin Niil mɔɔlinee,

làá nīn bí kunimbaaun

ní bin tòó tilaandi di-nyiminee

wunti ń yɔ̀tī ní án wà-bi tikpil.

9 Icoo cúú bin bɔ́ntí gulfapiin un bí fálfalee,

nì bin cáa lùee.

10 Bisataluliibi naŋki làá nyā nì bi-ba,

ní bitɔntɔnliibi kɔkɔ wunti ń yɔ̀tī.

11 Soowan bɔtibiliŋ sá bigbaambi ŋma ní.

Biciŋfitiibi bin sáŋkí Faarooyee kaa nyí tiba.

Mana ní ni ŋūǹ kí tùkù Faaroo yii:

«Ti sá biciŋfitiibi naantiibi,

ti sá dooooyee bɔtiibi naantiibi ní?»

12 Faaroo, a-ciŋfitiibee bí la sɔ̀?

Bí lēē kí dàkà-si á béé

tin ní ti-Dindaan Mpɔŋkɔdaan

bɔ́ntì kí ŋá Eejipiti tiŋkee!

13 Soowan yab bɔtibiliŋ kpántì bigbaambi,

ní Nɔfi yab kpilib bíi kíiĺ bi-ba.

Bíǹ bin bàà sá yii bí kpòotī Eejipiti tiŋkee,

bíǹ di bíi gáatí-kì.

14 Ti-Dindaan dū kunyiŋfuŋfuŋu fam ki tɔ́ bi-pu,

ki yāntì Eejipiti yab kaa bá ki pɔ̄ɔ̄,

kii udanyɔgbil nín kpìntī ki wùliŋkī puee.

15 Diyileeee, dijuuleeee, kukpakpaliueeee, kukaluueeee, ubɔ kaa dāa ŋūǹ kí ŋá tiba kí tīī Eejipiti.

Kun làá dāá jītí Eejipiti tiŋki puee

16 Ŋwindalee, Eejipiti yab làá dāá nīn bí kii binimpoobee ní. Dinyoondi làá dāá kɔ́-bi ní bi-wunti jìkì ŋyunti ŋun bi yaa láa ká ti-Dindaan Mpɔŋkɔdaan tāntì u-ŋal kí dáaĺ bi-tafalee. 17 Juuda tiŋki làá dāá yàntī dinyoondi ń kɔ́ Eejipiti yab. Bi yaa láa pée pútì Juuda tiŋki yindi bi-ceeyee, ní bí kíĺ ki bíi jìkì tin ti-Dindaan Mpɔŋkɔdaan sòon̄ ki yóoǹ kí ŋá-bee pu.

18 Ŋwindalee, binib làá dāá sòoǹ eebru sooŋyi Eejipiti timmu muŋmoo poon ní, kí dāá pùtī kí pòon̄ yii bi làá nīn kíǹ ki jáaḿ ti-Dindaan Mpɔŋkɔdaan baba. Ntimu gbanti kiba ní bi dāa yíì yii Iir-Ayeereesi, taapu di sá yii «ŋwìiń tiŋki»^b.

19 Ŋwindalee, bi làá dāá mā ti-Dindaan nsaraafan Eejipiti tiŋki pɔ̀ti pu, ní kí dāá cóoń ditaŋkpal Eejipiti tiŋki kpaanyɔkɔki kí nīn téetí ti-Dindaan pu. 20 Án di dāa sá kudaaŋŋu yii ti-Dindaan Mpɔŋkɔdaan bí Eejipiti tiŋkin. Eejipiti yab yaa láa kúuǹ ki yíiń ti-Dindaan bin bíi wɔ́b̀-bee puee, u làá dāá tɔ̄ ufiil ubɔ ú cùú mɔ̄tì bi-pu ní kí fīī-bi kí líí. 21 Niinee, ti-Dindaan làá dāá lēē u-ba kí dàkà Eejipiti yab, ní bíǹ ń dāá béé-u. Bi làá dāá ŋá saraabi kí cáań tiwampɔkaal kí jāam̀ ti-Dindaan. Bi làá dāá pòon̄ ti-Dindaan ipoon ní kí dāá ŋá tin ní bi pōoǹee. 22 Ti-Dindaan làá dāá dáaĺ Eejipiti yab tafal. U làá dāá fáá-bi, ama ní kí cáaǹ-bi. Bi làá dāá fàtīí gítí ti-Dindaan cee, ní ú fōō bi-wimmeem kí cáaǹ-bi.

23 Ŋwindalee, didandi làá dāá nyā Eejipiti tiŋkin kí cù Asuur tiŋkin. Asuur yab làá dāá dāan̄ Eejipiti yab tiŋkin, ní Eejipiti yab mun ń cù Asuur yab tiŋkin. Eejipiti yab nì Asuur yab làá dāá kpāfì kí jāam̀ Unimbɔti.

24 Ŋwindalee, ti-Dindaan làá dāá bìin̄ duulinya pu: Isirayeel tiŋki làá dāá nīn sá kitintataatii kin pu u làá bìin̄ee, kí kūtì Eejipiti nì Asuur timmu pu. 25 Ti-Dindaan Mpɔŋkɔdaan làá dāá bìin̄ duulinya pu kí lì yii: «M bīiǹ Eejipiti yab m-nibul pu, ki bīiǹ Asuur yab bin m náań nì m-ŋaliiyee pu, ní ki bīiǹ Isirayeel yab bin ní m gāntì ki yóoǹ m-bee pu^c.»