Yeesaya 18

Unimbɔti làá dáaĺ Kuusi yab tafal

1 Mbusu dɔ̄ ki cí sii kitiŋ kin ŋaliŋfii

cáá ifeen ili,

ki dɔ̄ ki nóó Kuusi buŋyee.

2 A tūǹ ituun i kàal̀ tikati ŋaliŋfii poon

ki còom̄ Niil mɔɔl pu.

Nimbi ituun in yáb̀ee, nín̄ gítímaan.

Ní gítímaan ni-nibul din nib fɔ̀kɔ̀

bi-wunti jɔ̀m̀ee cee,

dinibul din bi fàŋkí duulinyanee cee,

dinibul din pɔ̄ɔ̄ ki tà ki mátí di-nannanliibee cee.

Ní fàtīí gítí ni-tiŋki kin ní ibun yākatèe cee.

3 Nimbi bin kɔkɔ kóò duulinyanee,

nimbi bin kɔkɔ kpátìi gbí kitiŋ puee,

bi yaa láa cóoǹ kiŋaabiki ajoon puee,

ní dāá kpèèmaan,

bi yaa láa búń ŋyinee,

ní dāá pīlifìmaan!

4 Di sá yii ti-Dindaan di tùkū-mi yii:

«M làá nīn kā m-kɔŋkooŋŋun yilpu

ní ki kpèeń tin bíi jītí taapuee soooo,

kii ŋwìiń nín ŋmíntí ŋu-walifiŋu tùm̀ puee,

kii dimalindi nín tòó kudiceeu yuntiŋu puee.»

5 Di sá yii, kí wàatī bí kìtī fiinyi biliŋee,

ŋyunti ŋun fiinyi sufii púkuḿ ki dóòyee,

ŋyunti ŋun mpumpukum kpántì asubil ki bīńee,

bi dùŋfī kijiki ní kí gāā mpambiyaamu mun kaa lòoǹee,

ní kí páká asupɔmbil nì tifaal.

6 Bi làá dāá dū Asuur yab

kí tīī kaajiikub bin bí ajoon puee,

nì ipeecuncuti in bíń kupɔɔunee.

- Kaajiikub làá dāá nīn jīǹ niin dipeel pu,

ní ipeecuncuti ń dāá nīn jīǹ niin kuseeun -.

7 Ŋyunti gbantee, bi làá dāá cáań tiwampɔkaal kí tīī ti-Dindaan Mpɔŋkɔdaan. Án dāa sá dinibul din yab fɔ̀kɔ̀ ní bi-wunti jɔ̀m̀ pɔ́lpɔlee ní. Kitiŋ pu nib kɔkɔ fàŋkí-bi ní yɔ́kɔ́ yɔkɔ. Dinibul gbanti nib cáá mpɔn ní ki tà ki mátí bi-nannanliibi, ní ibun cúú bi-tiŋki ki yākatì. Bi làá dāá cáań an wampɔkaatee Siiyɔn jool pu, laakin ní bi jáaḿ ti-Dindaan Mpɔŋkɔdaanee ní.