Yeesaya 23

Feenisii tiŋki làá kpántí adigbun

1 Tin ti-Dindaan sòon̄ Tiir tiŋki puee sɔ̀^a.

«Nín̄ yáliŋkímaan, Taarsiisi meelab!

Bi nāaǹ Tiir tiŋki kɔkɔ,

báà kudii kaa kíǹ.»

Bi bàn̄ Kiitiim tiŋkinee

ní ki gbìl̄ an bɔti gbanti.

2 Ní ŋmīĺmaan fɔ́ŋfɔŋ

nimbi bin kóò ditiŋkugbandee,

nimbi Siidɔn nyampoobi

bin tūǹ binib bi dùtī tiŋkuee.

3 Tin bi būul̀ Niil mɔɔl puee,

nì tin bi cēē di-gbándee di sá Siidɔn gaajati.

Kíǹ di nìn kpántì atimbun kɔkɔ nyɔŋki.

4 Siidɔn tiŋki, icoo ń cúú-si,

sii un di sá tiŋku balilaŋkee.

Di sá yii tiŋku sòon̄ yii:

«Maa làá yāliŋkì imatiŋween

ní kaa nín màl̄ kibiki.

Maa làá kpàà binaacimpɔmbi,

ní kaa nín kpēē bisapɔmbi bi cíkitì.»

5 Eejipiti yab yaa gbìl̄ tibɔti nee,

dinyoondi làá cúú-bi kii

bi nín gbìl̄ Tiir yati an cúú-bi puee.

6 Ní dùtīmaan tiŋku kí cù Taarsiisi tiŋkin,

yāliŋkìmaan, nimbi bin kóò ditiŋkugbandee!

7 Ni-tiŋki kin nìn nyìm̀

ki sá kitiŋkpiŋkpikiiyee sɔ̀ɔɔ?

Kitiŋ kin nìn cūtì ndandati

ki jáń ki fōō ntimu ki kāl̀ee sɔ̀ɔɔ?

8 Tiir tiŋki nìn yàkatī mbeefuulimu ní.

Ki-nyampoobi sá kii abɔtibilee,

ní ki-wannyafiliibi sá binikpaambi kitiŋ pu.

Ŋma di lēē ki síiǹ yii bí bīil̀ kitiŋ gbanti ní?

9 Ti-Dindaan Mpɔŋkɔdaan di sòon̄ ki yóoǹ míǹ,

kí bīil̀ bin bi tìì jilmee lambil,

kí sìntī kitiŋ nee pu nikpaambi taapu.

10 Tiir yab, cùú nīn kùmaan ni-kpaatanti,

kii bi nín kù Niil mɔɔgbandi puee,

di sá yii naa ti cáá laakin meelab sīlifée.

11 Ti-Dindaan tāntì u-ŋal tiŋku pu

ki yāntì abee cīŋkì.

U tīī mara yii bí kpìtī Kanaan tiŋki

laakin bi wúń tiŋanee.

12 U bí yii: «Siidɔn yab,

ni kpá kí gíti jī jiŋaal,

ni bí kii usapɔɔn un bi bíil̀ee ní!

Báà ni yaa kíĺ nsan ki cūtìi póotì Kiitiim tiŋki,

naa làá ŋmā kí ká niin mun diŋuŋfil.

13 Kpèèmaan Kaldee yab tiŋki,

dinibul gbanti kaa ti bí kitiŋ pu.

Asuur yab dū-kì ki kpántì

laakin ní ilambunti kóòyee.

Bi máń adifɔkɔ ŋin pu bi yūlifí sintilee,

ki wīil̀ ki-dinyaaŋŋi

ní ki yāntì kì kpántì adigbun ŋma.

14 Nín̄ yáliŋkímaan, Taarsiisi meelab,

di sá yii bi wīī ni-balilaŋki.»

15 Ŋwiin gbantee, bi làá dāá súntí Tiir tiŋki pu abin imuŋku ita nì saalaa, an dàkà yii ubɔti maŋfal wiiŋyi nín sá puee. Abin imuŋku ita nì saalaa gbanti boonee, án làá dāá ŋá Tiir tiŋki kii bi nín gà kinimpulaakpaai nlan puee yii:

16 Sii kinimpulaakpaai kin pu bi súntèe,

yòon̄ kubeeu^b kí yìiǹ kí màntī kitiŋ nee kɔkɔ!

Bɔ̀ɔ̀ kubeeu tiŋan, gāā a-laŋyi kí fàtīí gāā,

án nín làá ŋá pu binib ń téetí a-puee.

17 Abin imuŋku ita nì saalaa gbanti boonee, ti-Dindaan làá dāá sɔ̄ Tiir tiŋki saai. Kì làá dāá fàtīí ká animbil. Kì làá dāá kíĺ kí nīn ŋáań tilaakpaal kitiŋ pu doo beeŋi kɔkɔ poon. 18 Ama bi làá dū ki-paatii nì ki-paati kɔkɔee kí sú ti-Dindaan ní. Baa làá dāá kóoǹ-tì kí kpāfì, kaa làá dāá kpāafì-tì mun. Bi-paati ní bi làá dāá nīn cáa dāā tijin ki kpīintí binib bin bí ti-Dindaan nimbiin ki tūǹ u-tundee bí jī kí díkí, ní kí kíń kí dā tiwannyaandi kí pèen̄-bi.