Yeesaya 9

1 Dinibul din nìn còom̄ dibɔmbɔndinee

ká ŋwalifikpaan.

Binib bin nìn kóò dibɔmbɔndi tiŋkinee,

ŋwalifi ŋmíntì bi-pu.

2 A yāntì bi ká dipɔɔpiŋkpaandi,

ki yāntì an mɔ́ɔkiǹ-bi tikpil.

Bi bí ki fàal̀ a-nimbiin

kii bi nín yaa bíi cēē bi-kpaajinti bi fàal̀ puee,

ní ki kūuntí nì ifaal

kii bi bíi yàkatī tin bi jáń ki fōō kujaaunee.

3 Di sá yii a túutì-bi diwaŋgul

din nyìm̀ bi nìn túee,

ki kɔ́fì ndɔ ŋun nìn pá bi-gbigbipati puee

nì ditambɔndi din utɔntɔŋkpil nìn ŋúb́ bi-puee,

kii a nín nìn ŋá pu ŋwiin ŋun

a nìn jáń ki pɔ́ɔkiǹ Madiyan yabee.

4 Anaataka ŋin bi nìn táká ki tà kitiŋ cìŋkēe,

nì bi-bɔkutikpaaŋŋi ŋin nìn máǹ fatikuee

kɔkɔ làá fōō ŋŋmi kí wà.

5 Di sá yii bi màl̄-ti kibiki kiba!

Bi cáań-ti kibininjabiki kiba!

Unimbɔti dū dibeel pɔŋŋu ki ŋúbiǹ-kì.

Bi dāa yíì-kì yii:

«Maamaaci saŋkiliu,

Unimbɔti Mpɔŋkpaandaan,

Ubaati un bí jaanjaanee,

Ŋgbansɔŋfi bɔtibil.

6 U-beel pɔŋŋu làá wàan̄,

ní ú yàntī ŋgbansɔŋfi ń nīn bí kaa kúntí.

U làá kàl̄ u-naanja Daafiidi beejal pu

kí jī dibeel u-tiŋki kɔkɔ pu.

U-beel làá báań kí nīn pɔ̄ɔ̄,

kun puee dì làá nīn tɔ́kɔ́ ibaamɔn nì deedee pu ní

kí yòon̄ kɔŋkɔnnee kí nīn cá jaanjaan^a.

Ti-Dindaan Mpɔŋkɔdaan

neeŋkpaandi puee

u nín làá ŋá puee dee.»

Ti-Dindaan gíí diŋuul Isirayeel beel pu

(Kpèè 5.25)

7 Ti-Dindaan sòon̄ tibɔti tiba

ki tɔ́ Jaakɔb naantiibi pu,

tibɔtee cūtìi túutì Isirayeel beel pu.

8 Binib bin bí Eefiraayiim beelinee kɔkɔ gbìl̄-tì,

binib bin kóò Samaarii tiŋkinee gbìl̄-tì.

Ama dilambil gbí bi-pɔbiliŋ ní bi bí ki lì yii:

9 «Ti-diiŋŋi ŋin ti máń nì brikisibee lítì,

ama timbi làá dū ataŋkpee ŋin bi kpítèe ní kí fàtīí mā-ŋi.

Bi gāatì ti-siikoomɔɔr sufii,

ama timbi làá cóoń seedir sufii kí téeǹ.»

10 An pu ní ti-Dindaan dū Reesiin

nannanliibi ki tɔ́ Isirayeel yab pu^b.

U tīī bi-nannanliibi kunyannyaau.

11 Aram yab nyánní ŋwìiń nyalaŋki pú,

ní Fiiliistii yab nyánní ŋu-jeetilaŋki pú.

Bi dɔ́miń ki cátikì Isirayeel yab.

Ama nì mimmee, ti-Dindaan ŋuul kaa sɔ̄ŋkì,

u-ŋuul dáá gbíntìi dàn̄ bi-pu.

12 Nì míǹ kɔkɔee, Isirayeel nibul

kaa fātìi gítì

un di bíi dátí bi-tafalee cee,

baa nyàab̄ ti-Dindaan Mpɔŋkɔdaan.

13 Míǹ puee, ŋwimbaanti ní ti-Dindaan

làá gāā kí tìl̄ Isirayeel tiŋki yil nì ki-juul,

kukpakpaliu nì kukaluu.

14 Bitindaŋkpilib nì akpambal di sá diyil,

ní inyimɔn bɔnaatiliibi sá dijuul.

15 Dinibul nee kpootiliibi yāntì bi wáŋkì,

ní binib bin bi kpòotēe yīntì nsan.

16 An pu ní ti-Dindaan kaa làá tàan̄ bi-nipɔmbi,

waa làá sɔ̄ bi-taŋkpiibiliŋ nì bi-kpiipoobi saai.

Di sá yii bi-kɔkɔ sá binikpitib,

ki ŋáań tin kaa ŋān̄ee.

Tin kaa máaǹ bí sòoǹee di nyēē bi-nyɔmmun.

Ama nì mimmee, ti-Dindaan ŋuul kaa sɔ̄ŋkì,

u-ŋuul dáá gbíntìi dàn̄ bi-pu.

17 Di sá yii ntoom fòol̄ kii ŋŋmee,

ki wù ikuŋkum nì abɔjanaakun,

ki wù nsugboomu kubambaŋŋun,

ní ŋu-nyiim yíkí ki jɔ́ḿ kutaa.

18 Ti-Dindaan Mpɔŋkɔdaan ŋuukpaandi puee,

kitiŋ nee fōō ŋŋmi.

An bí kii ŋŋmi bíi wù dinibulee.

Ubɔ kaa ti sūǹ u-nabiki saai.

19 Unil fàtī ŋgiil pú kí gíí kí jī

ama ní ŋkùm dáá gbíntìi cáá-u,

ní kí fàtī ŋgan pú kí gíí kí ŋmɔ́

ama ní kaa díkì.

Báà ŋma gífí u-ba ŋal nanti ki ŋmóò.

20 Manasee naakookun yab

làá cātikì Eefiraayiim naakookun yab,

ní Eefiraayiim naakookun yab

ń cātikì Manasee naakookun yab,

ní bi-liitil ń kpāfì kinyɔkɔ

kí nyā Juuda naakookun yab pu.

Ama nì míǹ kɔkɔee, ti-Dindaan ŋuul kaa làá sɔ̄ŋkì,

u-ŋuul làá nīn gbíntìi dàn̄ bi-pu.