Yeesaya 5

Ti-Dindaan fiinyi sufii kpaabu bɔti

1 M làá gāā m-bɔɔ nlan ŋubɔ.

Nlanee sòoǹ m-bɔɔ

nì u-fiinyi kpaabu bɔti ní.

M-bɔɔ nìn cáá fiinyi kpaabu,

ní bu nìn tɔ́kɔ́ kigbantaŋ kin cáá ntiŋkpamee pu.

2 M-bɔɔ yɔ̄kɔtì kitiŋ gbanti,

ki lēē ataŋkpee kɔkɔ ki fá,

ní ki cóoǹ ifiinyisumɔnti.

U gāā isupaa bukpaayee kansikin,

ki gbìn̄ mbòó ŋun ni u làá nīn ŋmāam̀ isufee biliŋee^a.

U bàà nìn cɔ́tí yii bukpaayee làá lòoǹ asubimɔnti,

ama ní bu dūu lòon̄ asubikpiti.

3 Niinee ní m-bɔɔ bí yii:

«Kɔŋkɔnnee, nimbi bin kóò Jeerusaleem tiŋkinee

nì nimbi bin sá Juuda tiŋkin yabee,

ní sòom̀maan man nì m-fiinyi kpaabu bɔti kí tīī-mi!

4 Ba ní m bàà máaǹ kí ŋá

m-kpaabu gbanti ní maa ŋá?

M bàà cɔ́tí yii bú lòoǹ asubimɔnti,

ba di ŋá ní bu lòon̄ asubikpiti ní?

5 «Too, m làá tùkù-ni

m nín làá ŋá m-kpaabu gbanti puee.

M làá bàkatī bu-naabakaku

ní tiwaŋkuti ń kɔ́ kí ŋmɔ́ fiinyee faati.

M làá téé digundi din māntìi tú-buee kí lúkú

ní bisanjitiliibi ń tāā tāā kí bīil̀-i.

6 M làá yàntī bú kpántí kupɔɔu,

maa ti làá ŋāŋkì fiinyi sufii gbanti ní kaa nín kɔ̄tì-i.

Ikuŋkuŋfi nì abɔjanaakun di làá nyā i-ni,

ní ḿ yàntī utaa ń taa ti nì i-pu.»

7 «Ti-Dindaan Mpɔŋkɔdaan fiinyi kpaabuee

di sá Isirayeel tiŋki,

isufi in u nìn néeń tikpilee

di sá Juuda yab.

Ti-Dindaan bàà nìn cɔ́tí yii

bi làá nīn nóó deedee saŋŋu,

ama ní bi bí ki ŋáań ikpiti.

U bàà nìn cɔ́tí yii

bi làá nīn sá ibaamɔn dambi,

ama ní bi yāntì biwɔfib bí ki gbòoǹ pɔ̀ɔɔɔ.»

Binib bin gbítí ti-Dindaan ŋuulee

(B. 8-24: kpèè 10.1-4)

8 Mbusu dɔ̄ ki cí binib bin di

māā adiin ki kútí adiin pu,

ki fòol̄ tisati ki kútí tisati puee.

Án dāa pée kúntíǹ yii

bíǹ di jíń mpaan kɔkɔ,

ki kíǹ ki kóò kitiŋ nee pu bi-baba.

9 M gbìl̄ ti-Dindaan Mpɔŋkɔdaan pōoǹ yii:

«M pūtì yii adiin nee kɔkɔ làá dāá wìil̀,

báà uniseen kaa làá dāá nīn gíti

kóò adikpaan ŋin ŋān̄ nee poon.

10 Unil yaa cóoǹ fiinyi sufii iŋmii itee,

u làá dāá ká ndamam kii liitirib imuŋku ili ja ní,

ní unil yaa kùn̄ bilee asambil saalaayee,

ú dāá cā disambibaantiil.»

11 Mbusu dɔ̄ ki cí

binib bin fìntī kutaafaau pɔ̀lpɔl

kí dūú gùl̄ ndaam min pɔ̄ɔ̄yee pu dinyɔlee,

nì bin yìiǹ kunyeeu ki nyù ndamam an nyàatī-bee!

12 Bi kpáfí ki nyù idafi

ní bi bɔ̀ɔ́-bi tibati nì saŋgub,

ki cákafí-bi cancakantib ní ki búǹ-bi awul.

Ama baa wāĺ tin ti-Dindaan bíi ŋáańee,

kaa kpèé gba tin ní u ŋée.

13 Míǹ pu ní bi làá cúú m-nibul kí cùnnì kuyuŋu

bi nín kaa là kí nīn nyí tibee pu.

Bi-kpilib làá kpú ŋkùm,

ní samaa ń kpú nnyinnyoo.

14 An puee ditaŋkpiil wāaǹ kinyɔkɔ bàaa,

di wāaǹ di-nyɔɔkpaaŋku.

Jeerusaleem kpilib nì samaa kɔkɔ

làá kɔ́ poon, bi nì bi-jiŋaalib wooku kɔkɔ.

15 An pu ní binib kɔkɔ làá nīn dɔ̄ kitiŋ ki fìlim̀,

ní bilambidambi ń tìntī bi-yiliŋ.

16 Ti-Dindaan Mpɔŋkɔdaan

làá sòoǹ tibɔti ibaamɔn kí dàkà u-kpaanti.

Circir Nimbɔtiu làá sòoǹ tibɔti deedee

kí dàkà yii u sá circirdaan.

17 Ipii làá dāá ŋmɔ́ timool niin

kii kupikpaapɔɔunee,

ní ŋŋɔbiyaamu mun bi là

mú gbìfiǹee ń dāá jī niin.

18 Mbusu dɔ̄ ki cí binib bin

nyimɔŋyi sá kii iŋmii

ki bóob́-bi ki nákáǹ bi-kpitiiyee!

Bi còom̄ ikpiti pá bi-boon

kii tɔrɔku ní bi dàtēe.

19 Bi bí ki lì yii:

«Ti-Dindaan ń yáb́,

ú ŋá tin u là kí ŋée malaa

timbi ń ká.

Tin ní Isirayeel Circir Nimbɔtiu

bɔ́ntì ki yóoǹ yii u làá ŋée,

ú ŋá, timbi là kí béé.»

20 Mbusu dɔ̄ ki cí binib bin

yíì tiŋan yii tikpitil, ki yíì tikpitil yii tiŋanee.

Bi dù dibɔmbɔndi kí kpántí ŋwalifi,

ní kí dū ŋwalifi kí kpántí dibɔmbɔndi.

Bi dù mmɔn kí kpántí ntuntun,

ní kí dū ntuntun kí kpántí mmɔn.

21 Mbusu dɔ̄ ki cí binib bin

yíì bi-ba biciŋfitiibi,

ki gà bi-biŋŋi yii bi sá binyiliibee.

22 Mbusu dɔ̄ ki cí bin dàkà dibaatandi ki nyù ndaam,

ki cáá tininjati kí dū idafi in pɔ̄ɔ̄yee

kí ŋmàlim̀ kí nyɔ̀ee.

23 Bi fòol̄ dinyɔɔŋeebil jim kí pɔ̀ dibɔkpil daan,

ama baa kíikí kí pɔ̀ ibaamɔndaan.

24 An pu ní kii ŋŋmi nín wù timool pu,

timɔkulindi ń wà búkú buku puee,

míǹ ní bi-nyaaŋyi làá sūū

ní bi-pumpukum ń kpántí

kii ŋkpɔŋkpɔmee kubuŋu ń yòon̄,

kun puee bi fá ti-Dindaan Mpɔŋkɔdaan marau,

kaa fātìi tɔ́ Isirayeel Circir Nimbɔtiu bɔti.

Ti-Dindaan gíí diŋuul u-nibul pu

(B. 25: kpèè 9.7-20)

25 An pu ní ti-Dindaan fōō u-nibul pu mbum

ki tāntì u-ŋal ki fáá-dì.

Ajoon cīŋkì

ní anikpil dɔ̄ adan pu fìlfilfil

kii timool tin bi ŋātì ki fée.

Ama nì míǹ kɔkɔee

u-ŋuul kaa sɔ̄ŋkì,

ní u-ŋal dáá pée gbíntìi tèen̄.

26 U cóoǹ kudaaŋŋu kubɔ

ki dàkā ndandati nibul diba,

ki búń ŋfoon ki yíiń-dì

doooo kitiŋ gbeennyɔkɔ

ní di yáb́ malaa ki bāań.

27 Di-nib kansikinee,

báà ubɔ kaa gīī,

báà ubɔ kaa gbéetì,

báà ubɔ kaa gèen̄ ki yīntì,

báà ubɔ kaa dōoǹ ki gèen̄,

báà ubɔ kaa gbīntì u-dambalau

ní kaa nín kútì u-naataaŋmiii.

28 Bi lōoǹ bi-piiŋyi,

ki píĺ bi-tɔfii ki páaǹ ipiin ki cí.

Bi-taamui tafuŋfukuti pɔ̄ɔ̄ kii ataŋkpacancalee,

ní bi-tɔrɔkub taaŋi màntī kii kunaakpaabuŋŋuee.

29 Bi mùuǹ kii ugbikintinaatee,

ki gà kuwoou kii ŋgbikintibiyaamu nín sūǹ puee.

Bi mùuǹ kí cúú bi-jinti kí kpáàá cáá búntí,

ní báà ubɔ kpá ki làá cúú-tì kí fōō bi-ŋaan.

30 Ama ŋwindalee,

bi làá dāá téeń ditimbundi gbanti pu

kii kubuŋkpaaŋŋu nín yàntī tiŋku wòoǹ puee.

A yaa láa gbóoń ki kpēē kitiŋee,

dibɔmbɔndi nì dinimbinaamandi

ní a dāa pée kíǹ ki wāĺ,

ní atagban ń dāá dūú bìin̄ ŋwalifi pu.