Yeesaya 6

Yeesaya kpántì ti-Dindaan bɔnaatiliu

1 Dibindi din ubɔti Oosiyasi kpíìyee, an nìn lēē ki dàkā-mi. M nìn ká ti-Dindaan kā dibeejafɔŋfɔkɔl diba pu. U-bɔkutil gbeeŋgbeeŋyi nìn gbí kunimbɔtidii kɔkɔ. 2 Seerafiimbi nìn yú u-yilpu ki cáá ifeen iluu iluu. Seerafiim kamaa feeŋyi ili nìn bīī u-nimbiin, ní ili bīī u-wunti pu ní u cáá ili in kíǹee ki ŋàaǹ. 3 Bi nìn bí ki kūuntí ki lì tɔb yii:

«Circir, circir, circir!

Ti-Dindaan Mpɔŋkɔdaan sá circirdaan!

U-nyooti gbí kitiŋ kɔkɔ^a!»

4 Bi bíi kūuntí mimmee ní kunimbɔtidii punyɔmmu cīŋkì doooo mu-nyeel, ní nnyiim yíkì ki gbí kunimbɔtidiin^b. 5 Niinee ní m lī yii: «Mbusu kɔ́-mi! M-bɔti dóò ní nee, kun puee tijɔkɔndi nyɔɔbuŋŋi ŋma di nyēē m-nyɔkɔn, ní m kóò binib bin nyɔmmun tijɔkɔndi nyɔɔbuŋŋi nyēēyee kansikin. Nì míǹ kɔkɔee, m-nimbiliŋ baasii ká Ubɔti, ti-Dindaan Mpɔŋkɔdaan.»

6 Niinee ní seerafiimbee ubɔ dū kubabiku ki bábiń dimɔsiŋkɔndi diba nsaraafan pu ní ki ŋàan̄ ki nín dòoń m-cee. 7 U bāań ki dū dimɔsiŋkɔndee ki gbēē m-nyunculiŋ ní ki bí-mi yii:

«Dimɔsiŋkɔndi nín gbēē a-nyunculiŋ nee,

bi pítì a-yìntitam,

ki dū a-kpitii ki pú-si.»

8 Míǹ boonee ní m gbìl̄ ti-Dindaan bālifì yii: «Ŋma ní m làá tɔ̄ ní? Ŋma làá nīn sá ti-bɔnaatiliu?» Ní m kíí yii: «M sèé, tɔ̄-mi!»

9 Ní u bí yii: «Cù kí tùkù dinibul nee yii:

<Ni làá pīlifì kí pīlifì,

ama naa làá gbìl̄ taapu.

Ni làá kpèè kí kpèè,

ama naa làá wāl̀ tiba.>

10 Yàntī binib gbanti pɔbiliŋ ń tìlifì,

bi-tafaliŋ ń kpáá ní bi-nimbiliŋ ń ŋúb́.

Yàntī bí taa ti wāl̀,

kí taa ti gbìl̄,

kí taa ti béé tibɔti taapu.

Án nín làá ŋá pu bí taa kpántí bi-bimbim

kí fàtīí gítiń m-cee ḿ cáaǹ-bee^c.»

11 Niinee ní m bālifì yii: «Ti-Dindaan, án làá nīn bí míǹ kí tin sāā ŋyunti ŋulɔŋu?» Ní u kíí-mi yii: «Kí tin sāā ŋyunti ŋun ní bi làá nàan̄ ntimu, binib ń taa ti nín̄ kóò mu-poon, adiin ń nīn kíǹ ki yú fám ní tikpaatan ń kpántí kii kuteeuee.»

12 Iiin, ti-Dindaan làá jà binib

kí nyāntí kitiŋ nee poon kí cùnnì ndan,

ní tikpaatan dāa kíǹ

ki dɔ̄ fám.

13 Báà binib saalaa poon

ubaanti di yaa kíǹ kitiŋ nee ni,

ŋŋmi làá wà-u kii busubu

bun bi gāā ki lúkúee ní.

Kun làá dāá pée kíńee di sá disuyil,

ama disuyil gbanti di làá dāá nīn sá

circir wambooliŋu.