Yeesaya 8

Yeesaya jipɔɔn yindi taapu

1 Ti-Dindaan bí-mi yii: «Yòon̄ kupiliŋkpaaŋŋu kí ŋmà tibɔti nee ku-pu yii: <Makeer-Salaal-Aasi-Basi>, taapu di sá yii <Yáb́-tigaajati-malaa-difukuldi>. 2 Ní m dūu dàkā binib bin pu bi cáá dimákalee seera. Bíǹ di sá usaraaŋal Uriya nì Yeebeereekiyawuu jipɔɔn Seekariyawuu. 3 Boonee ní man nì m-nimpuu un mun sá Unimbɔti bɔnaatiliuee kpáfì. Ní u cáá dipool ki màl̄ kibininjabiki. Niinee ní ti-Dindaan bí-mi yii ḿ pɔ̄-kì diyindi yii <Makeer-Salaal-Aasi-Basi>. 4 Di sá yii, kí wàatī kibikee ń ŋmā kí lì yii m-baa àá m-nee, bi làá yòon̄ Damaasi tiŋkin gaajati nì tin kɔkɔ bi fúkúl̀ Samaarii tiŋkinee kí cùnnì kí bíĺ Asuur bɔtiu nimbiin.»

Aram yab làá kpátí kí bìin̄ Juuda tiŋki pu

5 Ti-Dindaan fātìi gíti bí-mi yii:

6 «Dinibul nee yíì

Siiloowee nyim min pùub̀ sooooyee,

ní ki fàal̄ Reesiin nì Reemaliyawuu jipɔɔn pu.

7 An puee ti-Dindaan làá yàntī

Eefiraati mɔɔkpaandi nyim

min pɔ̄ɔ̄ ki wīikí tikpilee,

an dàkà yii Asuur bɔtiu

nì u-pɔŋkpaaŋŋu kɔkɔ

ń dāá léeń bi-pu.

Eefiraati mɔɔkpaandi nyim

làá gbí kí jɔ̄m̀ kí páań.

8 Mì làá dāá bà Juuda beelin,

kí gbí kí léeń

kí jɔ̄m̀ kí tin sāā nneen.

Mi-mɔɔgbaŋŋi làá wàan̄

kí jī a-tiŋki waaŋŋu kɔkɔ,

Eemanuyeel.»

Anibul ŋin kíǹee ŋáań fám ní

9 Anibul, nín̄ jìkìmaan nì tifaandi!

Pīlifìmaan tiŋan, nimbi ndandati timmu yab.

Báà ni yaa bóob́ dikɔ̀ndi, see bí já kí pɔ̄ɔkiǹ-ni!

Tiŋman, báà ni yaa bóob́ dikɔ̀ndi, see bí já kí pɔ̄ɔkiǹ-ni!

10 Báà ní sòoǹ kí bɔ́ntí tin kamaa, an kaa làá kàl̄.

Báà ní kpāfì min kí lēē nlandɔkɔ, ŋuaa làá tɔ̄ ditundi,

kun puee Unimbɔti bí ti-cee.

Ti-Dindaan ní binib máaǹ kí nīn tɔ́

11 Ti-Dindaan cúú-mi ní ki kpáafì-mi yii ḿ taa nóó nsan ŋun ní binib nee nóóyee. U lī-mi yii:

12 «Binib nee yaa bíi bɔ́ntí kí ŋá tiŋyee,

ní taa kūtì bi-pu.

Ní taa fàŋkì tin bíǹ fàŋkée,

ní taa pée fàŋkì-bi.»

13 Ti-Dindaan Mpɔŋkɔdaan baba

ní ni máaǹ kí yíiń circirdaan.

Úǹ ní ni máaǹ kí nīn tɔ́,

úǹ baba ní ni máaǹ kí fàŋkì^a.

14 U làá nīn sá circir kɔŋkooŋŋu ní

ki tīī Isirayeel beel nì Juuda beel,

ditaŋkpal din bi làá nīn gbéetée,

ditaŋkpakpaandi din làá nīn lɔ̀kɔ̀ ki líikí-bee^b.

U làá nīn sá kii kulaaŋŋu nì kutaliŋŋuee ní

ki tīī bin kóò Jeerusaleem tiŋkinee.

15 Binib tikpil làá dāá gbéetí,

bi làá dāá lítí ní kí kɔ̄fì.

Kutaliŋŋu làá dāá sàl̄-bi kí kíkí-bi.

Yeesaya kā ki cí ki kpèé ti-Dindaan pú

16 M kpáafì tibɔti nee nì didàkal nee. M làá dū-tì kí dàkà m-boonnooliibi baba ní. 17 M kā ki cí ti-Dindaan. U dá láá fātì u-boon ki tīī Jaakɔb naantiibi, ama m máká u-pu.

18 Man nì mbiyaamu mun ti-Dindaan tīī-mee sá kudaaŋŋu ní Isirayeel tiŋki poon. Timbi pu ní ti-Dindaan Mpɔŋkɔdaan un kóò Siiyɔn jool puee dī ki kpáafì u-nibul^c.

19 Biba làá lì-ni yii: «Ní cùú ká bin kàal̀ abɔɔjal ki yíì bitaŋkpiibee, bibɔɔbi bin kpántí nneen ki sòoǹ tin bí ki dòońee. An kítì yii dinibul ń bàlifì ditaŋgbandi, kí yíiń bitaŋkpiibi binifoobi puɔɔ^d!» Bi yaa lī-ni mimmee, 20 ní kíí-bi yii: «Ti-Dindaan dàkal nì u-bɔti ní ni máaǹ kí pīlifì.» Un kamaa yaa kaa sòon̄ mimmee kaa làá ká ntaafaawalifi.

Dibɔmbɔndi poon saŋkindi

21 Binib làá dāá còom̀ kí jītí kitiŋ nee pu.

Bi làá dāá gīī ŋkùm ń bà-bi.

Ŋkùm nín làá dāá bà-bi puee,

bi làá dāá nīn kíǹ ki tòó

bi-bɔtiu nì bi-Nimbɔtiu mbusu.

Bi làá dāá wáaǹ kí kpèè kutaa,

22 kí dāá fàtīí kpèè kitiŋ.

Kun bi làá dāá pée kée di sá

dinimbinaamandi nì dibɔmbɔndi

nì nnaabu nì kunyeeu kun bɔ̀ǹ kpìmmee.

23 Bin bí dibɔmbɔndi gbantinee

kaa làá dāá ŋmátí^e.

Bi màl̄-ti kibininjabiki kiba

Iyunti in jítèee ti-Dindaan nìn kɔ́ǹ

Sabulɔn nì Neefitalii timmu icoo.

Ama iyunti in dòońee, u làá dāá tīī

didandi din kpàkaǹ tiŋkuee,

nì Jɔɔdan buŋŋu ŋwìiń nyalaŋki pú,

nì Galiilee tiŋki kin binicambi kóòyee tinyool^f.