Yeesaya 2

1 Tibɔti tin an lēē ki dàkā Amɔtisi jipɔɔn Yeesaya Juuda beel nì Jeerusaleem tiŋki puee sèé.

Anibul kɔkɔ làá dāá kpāfì Jeerusaleem tiŋkin

(B. 2-4: kpèè Miika 4.1-3)

2 Ŋwiin bí ki dòoń, dijool din pu ti-Dindaan diiku tɔ́kɔ́ee

làá dāá lìbitī ajoon kɔkɔ pu.

Di làá dāá nīn fɔ̀kɔǹ ŋgbantamu kɔkɔ^a.

Anibul kɔkɔ làá dāá nīn bìtifī ki dòoń di-cee.

3 Anibul tikpil làá dāá tàkan̄ nsan

ki cá ki lì yii: «Dāam̄maan!

Tí jɔ̄m̀maan ti-Dindaan jool pu,

tí jɔ̄m̀maan Jaakɔb Nimbɔtiu diikun.

U làá tin dàkà-ti tin ní u là tí ŋée,

ní tí nóó u-sàmbiyaamu pu.»

Tiŋman, Siiyɔn ní Mara làá nyānní,

u-nyɔɔbundi làá nyānní Jeerusaleem ní.

4 U làá dāá sòoǹ kí ŋāŋkì atimbun kansikin bɔti,

kí dāá pàtī anibul tikpil bí taa ti já.

Bi làá dāá dū bi-tàataajimmu kí mɔ́ɔ́ akoo,

ní kí dāá dū bi-kpammu kí mɔ́ɔ́ igɔti^b.

Ditimbundi diba kaa dāa gíti jáà nì di-juti,

ní binib kaa dāa gíti bífí bi nín jáà kujaau puee.

5 Jaakɔb naantiibi, dāam̄maan

tí còom̀ ti-Dindaan walifiŋun.

Ti-Dindaan bɔsooŋyi wiiŋŋu

6 Ti-Dindaan, a dū a-nibul

Jaakɔb naantiibi ki fá.

Kun puee ŋwìiń nyalaŋki pú

bɔɔbi di kíǹ ki gbí bi-tiŋkin.

Bin kpèé iŋmalbijaa ki cáa būū tibɔɔlee

gbóotì kii Fiiliistii yab ceeyee.

A-nibul nì binicambi di kíǹ ki sòoǹ ki ŋàatī tɔb pu.

7 Animbil kúti nì sindaariya gbí bi-tiŋkin,

ní ki-gaajawanti wīikí tikpil an kaa cáá bí lì.

Itaamu gbí bi-tiŋkin,

ní bi-janjatɔrɔkub wīikí tikpil.

8 Awaa gbí bi-tiŋkin,

bi gbàantí ki jáaḿ awaa,

tiwan tin bi dū bi-ŋalii ki mɔ́ɔ́yee.

9 An pu ní binib kɔkɔ làá nīn dɔ̄ kitiŋ ki fìlim̀,

ama ti-Dindaan, á taa yòon̄-bi kí síiń.

10 Kɔ́maan kí báĺ itaŋkpalɔkɔ poon,

ní kɔ́ kitiŋ taapu kí báĺ

kí sāǹ ti-Dindaan ŋuukpaandi,

kí sāǹ u-kpaanti nín ŋmóò pu nyàlibuee nimbiin^c.

11 Unil un yòontí u-ba yilpuee làá dāá tìntī u-yil,

bilambidambi làá dāá sìntī bi-ba taapu.

Ŋwiin gbantee, ti-Dindaan baba ní bi làá dāá tīī tinyool.

12 Di sá yii ti-Dindaan Mpɔŋkɔdaan

lēē ŋwiin ŋun ní u làá dāá sòoǹ

bilambidambi nì bin dàkà bi-bee

nì binib bin yòontí bi-ba yilpuee bɔti,

ní kí dāá sìntī-bi taapu.

13 U làá dāá sòoǹ Leebanɔn tiŋki sufii

in bi yíì seedir i fɔ̀kɔ̀ tikpilee bɔti,

kí dāá sòoǹ Baasan tiŋki waasufii in bi yíì seenee bɔti,

14 kí dāá sòoǹ ajoon ŋin fɔ̀kɔ̀ee kɔkɔ bɔti,

kí dāá sòoǹ ŋgbantamu mun dúkutèe kɔkɔ bɔti,

15 kí dāá sòoǹ adiin ŋin fɔ̀kɔ̀ líkí likee kɔkɔ bɔti,

nì agun ŋin baa ŋūǹ kí dàb̄ee kɔkɔ bɔti,

16 kí dāá sòoǹ Taarsiisi tiŋkin meelab kɔkɔ bɔti,

ní kí dāá sòoǹ meelanyaambi kɔkɔ bɔti.

17 Unil un yòontí u-ba yilpuee làá dāá tìntī u-yil,

bilambidambi làá dāá sìntī bi-ba taapu.

Ŋwiin gbantee, ti-Dindaan baba ní bi làá dāá tīī tinyool.

18 Awaa kɔkɔ làá dāá wāŋkì.

19 Kɔ́maan kí báĺ itaŋkpalɔkɔ poon,

ní kɔ́maan kí báĺ afaginni

kí sāǹ ti-Dindaan ŋuukpaandi,

kí sāǹ u-kpaanti nín ŋmóò pu nyàlibuee nimbiin,

u yaa láa yíkì ki bíi kɔ̄ntí kitiŋ kɔkɔ dinyoondee.

20 Yaadalee, binib làá dāá dū awaa ŋin bi dū animbil kúti nì sindaariya ki mɔ́ɔ́ ki gbàantí ŋi-nimbiin ki jáaḿee kí lúkú isiiboo nì tinanjin. 21 Binib làá kɔ́ kí báĺ itaŋkpalɔkɔ poon, kí kɔ́ kí báĺ ntaŋkpafaŋfakamin kí sāǹ ti-Dindaan ŋuukpaandi, kí sāǹ u-kpaanti nín ŋmóò pu nyàlibuee nimbiin, u yaa láa yíkì ki bíi kɔ̄ntí kitiŋ kɔkɔ dinyoondee.

22 Ní taa nín̄ máká nisaaleen pu,

kufoou kun u cááyee pu ní u bí.

An yaa sá fám, unil sá ba?