Yeesaya 3

Fikil fikil làá kɔ́ Juuda beelin

1 Ti-Dindaan Unimbɔti Mpɔŋkɔdaan

làá ŋmìntī Jeerusaleem tiŋki nì Juuda beel

tijikaal nì nnyim.

U làá ŋmìntī-bi tin máaǹ kí nīn tíkí-bee kɔkɔ:

2 an dàkà yii ubaatandaan nì ujanjal,

ubɔsoonli nì Unimbɔti bɔnaatiliu,

ubɔɔ nì utindaŋkpil,

3 ujanjakpil nì dibɔtibil,

usaŋkil nì ukpaŋkpanti nì usoopu.

4 Ti-Dindaan di lī yii:

«M làá lēē mbiyaamu kí tīī-bi

mú nīn sá bi-kpilib,

ní múǹ ń nīn kpòotī-bi kii mu nín là puee.»

5 Binib làá nīn ŋáań tɔb tipɔmbɔti,

báà ŋma làá nīn ŋáań u-juti tipɔmbɔti.

Kibiki làá jɔ̄m̀ utikpil pu,

ní unifan ń jɔ̄m̀ unikpaan pu.

6 Unil làá dāá cúú u-nabiki

kin u nì un pēē kubaabinaatoouee kí lì-u yii:

«Sii cáá dibɔkutil kí pèen̄ee,

kpántí ti-kpiliu kí nīn kpòotī-ti

fikil fikil yuntiŋu nee poon!»

7 Ní udaan ń dāá kíí yaadal gbanti yii:

«Maa ŋūǹ kí ŋá tiba kí tīī-ni.

M-dumpuee, tijikaal kaa báaa,

tiwampeeŋkaal mun kpá.

Naa ŋūǹ kí lēē-mi ḿ nīn sá ukpil!»

8 Jeerusaleem tiŋki gbéetì,

ní Juuda beel lítì.

Di sá yii bi jáà nì ti-Dindaan

bi-sòontam nì bi-ŋáaǹtam poon,

ki kpèé-u fám.

9 Bi-nimbikpeeŋu di sòoǹ ki kù bi-bɔti.

Bi sòoǹ bi-kpitii pu mpaampiin pu

kii Soodoom tiŋki yab nín nìn ŋáań puee,

baa bāal̀ i-pu binib cee.

Bíǹ bi-ba naabuŋu ní bi bíi bɔ́ntí!

10 Lìmaan yii

deedeedambi bí mmɔnneeee!

Di sá yii bi làá dāá páatí tin ní bi ŋée pu.

11 Ama mbusu dɔ̄ ki cí binikpitib,

tiba pée kpá kí nīn ŋān̄ ki tīī-bi.

Di sá yii bi-tuuŋŋi paati ní bi làá fōō.

12 Ti-Dindaan bí yii:

«M-nibul, mbiyaamu di wɔ́b́-si,

binimpoobi di ŋúb́ a-tiŋki ki kpòotī.

M-nibul, a-tindaŋkpilib kíiĺ-si ní,

bi kpòotī-si ki cáǹ nsaŋkpiti pu ní.»

Ti-Dindaan bíi sòoǹ u-nibul kpilib bɔti

13 Ti-Dindaan bɔ́ntì kí sòoǹ ibɔsoon,

u yíkìi yúl̀ kí sòoǹ anibul bɔti.

14 Ti-Dindaan bíi sòoǹ u-nibul

kpootiliibi nì bi-tindaŋkpilib bɔti yii:

«Nimbi di bíil̀ m-fiinyi sufii kpaabu.

Ni jíitì biwɔfib wanti ki gbéeǹ ni-diiŋŋi.»

15 Ti-Dindaan, duulinya kɔkɔ Nimbɔtiu bí yii:

«Ba ŋá ní ni bí ki nà m-nibul,

ki wɔ́b́ biwɔfib míǹ?»

Jeerusaleem nimpunyaambi

16 Ti-Dindaan bí yii:

«Jeerusaleem nimpoobi mɔ̀ɔǹ tikpil.

Bi còom̄ bi-silii tèen̄,

ki cáá bi-nimbikpeeŋu ki sàtī bininjab.

Bi còom̄ diba diba,

ní ki yàntī abɔmbil ŋin bi fúuń bi-taaŋee

gbáà tɔb ki sūǹ.»

17 An puee ti-Dindaan làá yàntī

digbàndi ń cúú bi-yiliŋ bi-yikpiti ń kùfì

ní bi-yigbeeŋi ń kpántí akulim.

18 Yaadalee ti-Dindaan làá dāá cúú tinyaantiwan kɔkɔ kí gbākal̀ bi-wunti pu, an dàkà yii abɔmbil ŋin bi fūuntí ataayee nì nlaamu mun bi cáa cútí tiyikpitee nì tiléeŋkaal tin gɔ́ĺ kii uŋmapɔɔnee, 19 nì falfatib nì abɔmbil ŋin bi fūuntí iŋalee nì iŋaabu in bi bìintí ayil puee, 20 nì iŋaayilkaa, nì ikusaka in bi cáa fūuntí titafatee nì dambalab nì asab nì icaŋŋmii, 21 nì mbɔmbiyaamu nì mbɔmbiyaamu mun bi tūuntí dimaŋfalee, 22 nì jiŋaal wampeeŋkaati nì abɔkutifɔkɔ ŋin wāāyee nì iŋaapaaŋkaa nì ntɔkɔlimu, 23 nì agiti nì iŋaabu in bí fálfalee bɔkutiŋ nì iŋaabu in bi cáa fìǹ diyilee nì in mun bi cáa pāantí tigbigbipati puee.

24 Tiwansuundi nunuŋu

di làá dāá fōō talaalu sɔnsɔfiŋu,

ŋŋmii di làá dāá fōō dambala paaŋŋu,

dibaakpandi di làá dāá fōō

tiyikpilukaal tin nyáń ti-bee paaŋŋu,

kpɔsatab di làá dāá fōō tiwannyaandi paaŋŋu,

ní icoo daaŋku ń dāá fōō kunyaaŋŋu paaŋŋu.

Jeerusaleem kpiipoobi

25 Jeerusaleem, a-nib làá gbíntí kujaau poon,

a-janjaliibi làá kpúń dikɔ̀ndi poon.

26 Niinee a-tiŋki nib kɔkɔ

làá dāá nīn sūǹ ki yáliŋkí,

kii unimpu un kaa ti cáá báà tiba

ki gbíntì ki kā kitiŋee.