Binimpoobi nì bisapɔmbi
7
1 Gítiń, gítiń usulamiitinimpu,gítiń tí ŋmā kí kpèè-si.
Ba pu ní ni kpèé usulamiitinimpu
un bí akiti ali kansikin ki ŋōōyee?
Unaacimpɔɔn
2 Bɔtiisal, anaataka ŋin a tákée ŋān̄
ki máaǹ-si!
A-caŋ gíí ki ŋān̄ kii
tiwanléeŋkaal tin bi mɔ́ɔ́yee.
3 A-puluul sá kii kɔɔpu un poon
ndaam min sɔ́fèe kaa lóotée ní.
A-pool sá kii dibileekpukul,
ní mpumpukum yú ki māntìi túee.
4 A-biiŋi liitil bí kii ŋŋɔjamu mulee,
a lì kii upeeman jaasibee.
5 A-sil bí kii dikuntinyindi difɔkɔkuee.
A-nimbiliŋ bí kii a yaa nyēē Eesbɔn tiŋkpaaŋkin
anyimbɔbil ŋin bí niinee.
A-maŋfal tɔ́kɔ́ kii Leebanɔn sintil difɔkɔku
kun bí ki túĺ Damaasee.
6 A-yil tɔ́kɔ́ a-wunti pu jìb̀
kii Kaarmeel joolee,
ní a-yikpiti fɔ̀kɔ̀ ki máǹ wúŋwuŋ,
ní tì nín gɔ́liḿ gɔ́liḿ puee sàl̄ ubɔti ubɔ.
7 A ŋān̄ ki bí gbàlgbal.
M-neeŋkaau, sii di sá man pɔɔpindi.
8 A fɔ̀kɔ̀ càb̀ kii bubabuee
ní a-biiŋi sá bu-sakaŋ.
9 M lī yii:
«M làá jɔ̄m̀ bubabu nee
kí gāā bu-sakaŋ!»
A-biiŋi ń nīn sá ki tīī-mi
kii fiinyi sakaŋee.
A-fooku sɔnsɔfiŋu
ń nīn náań nì asubil sɔnsɔfiŋu!
10 A-nyɔkɔ ń nīn mɔ̄
kii ndamɔntiimee!
Usapɔɔn
Tiŋman, ndamɔntiim min m kpáafì
ki yóoǹ un m néeńee,
còol̀ ti-nyunculiŋ pu ti-geem yuntiŋu.
11 M bí ki tīī un m néeńee,
man ní u baasii là.
Un bi néeńee bí mmɔnni
Usapɔɔn
12 Sii un m néeńee, dāan̄ tí nyā!
Tí cù kitimbiliiyin kí dòon̄.
13 Kù yaa wúntì kutaafaau pɔ̀lpɔlee,
ti làá cù fiinyi kpaaŋŋin
kí kpèè yii an púkuḿaaa,
an mātì.
Ti làá kpèè yii greenaadi mun yaa púkuḿ.
Niin ní m làá ŋmāliŋkì-si.
14 Dineendi subiliŋ gbītì ŋi-sɔnsɔfiŋu.
Ti cáá asubil ŋin mɔ̄ee kɔkɔ nì ŋi-bulifi ti-punyɔkɔpu,
akpiki nì apɔɔn kɔkɔ.
Sii un m néeńee, sii ní m kpáafì ki yóoǹ.