Alaŋkpan ŋin sòoǹ unil nín máaǹ kí nīn bí miŋyee
10
1 Saloomɔn laŋkpaŋŋi.Kibiki kin cáá iciinee yàntī ki-baa bí mmɔnni ní, kin kaa cáá iciinee sá kunimbaau ní ki tīī ki-na.
2 Tigaajati tin bi dī isaŋkpiti pu ki kée kaa kèetī, ama deedee saŋŋu nyāntí unil ŋkúmin.
3 Ti-Dindaan kaa yàntī deedeedaan ń kpú ŋkùm, ama waa yàntī binikpitib ń ká tin bi lèe.
4 Iŋal in jòon̄ee cāabìń disool ní, iŋal in tūǹ ditundee tìì tigaajati.
5 Unil un cēē tikpaajin dipeel puee sá ulandɔkɔdaan ní, ama un dɔ̄ ki gèeǹ ŋyunti ŋun bi cēē tikpaajinee cāabìń icoo ní.
6 Unimbɔti bìintí deedeedaan pu, ama tipɔmbɔti nyɔɔbuŋŋi di gbí binikpitib sooŋyi poon.
7 Bi téetí deedeedaan pu nì kupampakau, ama ní kí súntí binikpitib pu kí kpáaǹ bi-yiŋŋi.
8 Uciŋfiti kíikí kí nóó marab kí nīn tɔ́-bi, ama unil un sòoǹ kaa dàkafēe làá nàan̄ u-ba ní.
9 Un cáá tibulcinee còom̄ nì ŋgbansɔŋfi, ama un dī isan in gɔ́ĺee, Unimbɔti làá nyāntí udaan kí páań mpaampiin pu.
10 Unil un cáá ibaamɔn ki bāal̀ u-jutiibee sàantí-bi ní, ní un sòoǹ kaa dàkafēe nàantí u-ba.
11 Deedeedaan nyɔɔbuŋŋi sá kii nnyimbul ŋun tìì dimaŋfalee ní, ama tipɔmbɔti nyɔɔbuŋŋi di gbí binikpitib sooŋyi poon.
12 Kináŋ cāabìń kujaau binib kansikin ní, ama dineendi díǹ bìintí ikpiti kɔkɔ pu nía.
13 Iciin bí unil un cáá dinyilee nyɔɔbuŋŋin, ama mbambaan dɔ̄ ki cí ugbaan boon ní.
14 Biciŋfitiibi kpáafí dinyil kii tigaajatee ní, ama bigbaambi nyɔɔbuŋŋi làá nàan̄-bi dicilpu dicilpu ní.
15 Ugaaja wanti wúń u-pu kii digundee ní, ama bisoodambi sool di nàantí-bi.
16 Deedeedaan paati di sá dimaŋfal, ama unikpiti paati di sá ikpiti.
17 Unil un kíikí bí kpāafì-uee tàkā dimaŋfal saŋŋun, ama un kaa là bí wòoǹ-uee wáŋkí ní.
18 Un ná u-juti dibalinee sá mpɔnnyoondaan, ama un kúŋfí u-juti boonee sá ugbaan ní.
19 Unil un sòoǹ tikpilee, see ú yìntī, ama un kaa sòoǹ tikpilee sá uciŋfiti ní.
20 Deedeedaan nyɔɔbuŋŋi sá kii animbil kúti timɔntiilee ní, ama binikpitib pɔbiliŋ kaa bí tiban.
21 Deedeedaan nyɔɔbuŋŋi kèetī kunipaau ní, ama bigbaambi bíǹ kúù, kun puee baa nyí tiba.
22 Ti-Dindaan biindi baba di yì unil gaajati, u-pɔ́ɔǹtam kaa pée kútí tiba.
23 Kí ŋá ikpitee sá agbiil ní ugbaan cee, míǹ ní iciin mɔ̄ unyil cee.
24 Kun unikpiti fàŋkée di bàń-u, ama tin kā deedeedambi naŋki puee ní bi kāntí.
25 Utaafiiŋkaa tin lì yii u nì kí báatée, unikpiti kaa ti bí, ama deedeedaan úǹ yú kaa cìŋkī.
26 Kii ayeen nín nyàŋfī unil nyiŋŋi pu ní nnyiim kóò unil nimbiliŋin puee, míǹ ní uwutijoodaan sá ki tīī un yaa tú-uee.
27 Unil un fàŋkí ti-Dindaanee maŋfal làá fɔ̀kɔn̄, ama binikpitib kaa bà bi-wiiŋŋu ní kí kpúb.
28 Deedeedambi mákal cāabìń-bi dipɔɔpindi ní, ama binikpitib bíǹ mákal dāa pée kúntí nì fám ní.
29 Ti-Dindaan saŋŋu sá kutaŋkpanaakoou ní ki tīī deedeedaan, ama ní ki sá dinàandi ki tīī binib bin di ŋáań ikpitee.
30 Tiba kpá ki cìŋkì deedeedaan dalba dalba, ama binikpitib bíǹ kaa làá kàl̄ kitiŋ pu.
31 Iciin nyɔɔbuŋŋi di nyēē deedeedaan nyɔkɔn, bi làá dāá gíí kí tìl̄ bin sòoǹ tibɔkpitilee limbil.
32 Deedeedaan nyɔɔbuŋŋi mɔ̄ dipilifil, ama binikpitib bíǹ nyɔmmu nyēē tibɔkpitil ŋma ní.