Iciin bíi yíì bin kaa nyí tibee
9
1 Iciin máń i-diiku nì ku-jaantalkub biluli bin pu ku tɔ́kɔ́eea. 2 I kūū i-waŋkuti, ki ŋāaǹ i-daam ní ki bɔ́ntì tijin ki yóoǹ. 3 I tú i-tɔntɔnliibi binimpoobi kitiŋin bí jɔ̄m̀ kí tɔ́kɔń laakin bí yilpuee kí bāakì kí tùkù binib yii: 4 «Nimbi bin kaa nyí tibee, dāam̄maan doo!» Ní i yāntì bi tùkū bigbaambi yii: 5 «Ní dāam̄maan kí jī m-jinti, ní kí nyɔ̀ m-daam min m ŋāaǹee. 6 Fámaan digbaandi ní kí nīn bí dimaŋfalin, ní kí nóó dinyil saŋŋu.»Uciŋfiti nì ulambidaan
7 A yaa sáŋkì ulambidaanee, u bèel̄-si ní, a yaa kpōotì unikpitee, asiibil ní a dāa kāntí. 8 Á taa kpòotī ulambidaan, di sá yii u làá nīn ná-si, ama a yaa kpōotì uciŋfitee, u làá nīn néeń-si ní. 9 A yaa sáŋkì uciŋfitee, u mɔ̀tīi cíkití iciin ní, a yaa dàkā deedeedaanee, u-nyil mɔ̀tīi gbēentí ní. 10 Á fàŋkì ti-Dindaan di sá iciin kílilaŋki, á béé un di sá circiree di dàkà yii a sá unyil. 11 Tiŋman, man Iciin làá gbéeǹ a-wiiŋyi pu, m làá yàntī á kàl̄ kitiŋ pu kí yúntí. 12 A yaa sá uciŋfitee, sii di làá páatí a-ciiŋyi pu, a yaa sá ulambidaanee, sii baba di làá túń a-lambil gìńdi. 13 Digbaandi sá kii unimpu un di cáá kufuu fám, kaa nyí tiba ní tiba pée kpá u-yilinee ní. 14 U nyēē ní ki kā u-diiku punyɔkɔpu, dijal pu, kitiŋ poon laakin tɔ́kɔ́ yilpu yilpuee 15 ní ki yíì bisanjitiliibi bin túĺ bi-saŋŋu cáaa ki cée yii: 16 «Nimbi bin kaa nyí tibee, dāam̄maan doo!» Ní u tùkù bigbaambi yii: 17 «Nnaayudaam mɔ̄ dinyɔl, ní tijin tin bi jīǹ dibalinee mɔ̄ dijil!» 18 Ama bin cá u-ceeyee kaa nyí yii bi cá kí ŋàl̄ bin kaa ti bée pu, baa nyí yii ditaŋkpiilin ní bin u yíìyee cá.