Ilan 148

Nyɔ̄ŋkìmaan ti-Dindaan yilpu nì taapu

148

1 Aleeluya, nyɔ̄ŋkìmaan ti-Dindaan!

Nyɔ̄ŋkìmaan ti-Dindaan doooo yilpu,

nyɔ̄ŋkìmaan-u yilpu yilpu.

2 Nimbi u-tuuŋyi kɔkɔ, nyɔ̄ŋkìmaan-u,

nimbi u-janjakitil kɔkɔ, nyɔ̄ŋkìmaan-u.

3 Ŋwìiń nì uŋmal, nyɔ̄ŋkìmaan-u,

nimbi iŋmalbijaa in jìl̀ee, nyɔ̄ŋkìmaan-u.

4 Nimbi yilpu yilpu fɔ́ŋŋŋ, nyɔ̄ŋkìmaan-u,

nimbi inyiŋfi in bí yilpu yilpuee, nyɔ̄ŋkìmaan-u^a.

5 Bi-kɔkɔ ń nyɔ̄ŋkì ti-Dindaan yindi,

di sá yii u nìn tīī mara ní tiwan gbanti kɔkɔ náań.

6 U dū-tì ki kāaǹ ti-paaŋyi kí nīn cáa cá jaanjaan,

u síiǹ-tì mara un kaa bí kí kpántée.

7 Nyɔ̄ŋkìmaan ti-Dindaan, doooo taapu,

tiŋkub nì tiŋku poon peebilinti,

8 nì ŋŋmi nì ditaanyiŋkumbil nì dipɔ̀ńdi

nì kubuŋu nì kubuŋkpaaŋŋu kun bí u-nyɔɔbundi taapuee.

9 Nyɔ̄ŋkìmaan-u, ajoon nì ŋgbantamu,

nì isufi in lòoǹ abilee nì seedir dɔi kɔkɔ,

10 nì ipeel nì tiwaŋkuti kɔkɔ,

nì inoon nì tin fù ti-pool puee.

11 Nyɔ̄ŋkìmaan-u, kitiŋ pu bɔtiibi,

nì anibul kɔkɔ,

nì abɔtibil nì kitiŋ pu kpootiliibi kɔkɔ,

12 nì binaacimpɔmbi nì bisapɔmbi mun,

nì bitikpilib nì mbiyaamu.

13 Bí nyɔ̄ŋkì ti-Dindaan yindi,

di sá yii úǹ baba yindi di sá diyiŋkpaandi,

u-nyooti tɔ́kɔ́ kitiŋ nì yilpu pu.

14 U yāntì u-nibul yil kíǹ ki gáań.

An sá dinyandi ní ki tīī bin kɔkɔ néeń-uee,

Isirayeel yab, dinibul din pìlīǹ-uee.

Aleeluya, nyɔ̄ŋkìmaan ti-Dindaan!