Ilan 147

Ti-Dindaan sá ukpaan ní ki cáá mpɔŋkpaan

147

1 Aleeluya, nyɔ̄ŋkìmaan ti-Dindaan!

An ŋān̄ tí gāā ilan kí nyɔ̄ŋkì ti-Nimbɔtiu,

an mɔ̄ ní ki máaǹ tí nyɔ̄ŋkì-u!

2 Ti-Dindaan un fātìi máń Jeerusaleem tiŋkee

làá kóoǹ Isirayeel yab bin bi cúú kuyuŋuee kí kpāfì.

3 Úǹ di cāantí bin pɔbiliŋ bíil̀ee,

ní ki fíntí bi-buuŋyi.

4 U kàaǹ iŋmalbijaa,

ki pūǹ i-kɔkɔ ayin.

5 Ti-Dindaan sá ukpaan ní ki cáá mpɔŋkpaan,

u-nyil kaa cáá kigbeennyɔkɔ.

6 Ti-Dindaan tīkintí bin sīntiǹ bi-ba taapuee,

ama u sìntīǹ binikpitib taapu taapu.

7 Ní gāāmaan ilan kí jāam̀ ti-Dindaan,

bɔ̀ɔ̀maan kubeeu kí pàkà ti-Nimbɔtiu.

8 Úǹ di dù atagban kí bìin̄ yilpu,

ní kí yàntī utaa ń nì kitiŋ pu.

U yàntī timool nyēē ajoon pu.

9 U tìì tiwaŋkuti nì digaliŋgaal biyaamu

mun sūǹ ki nyàab̀ tijinee tijin.

10 An kaa sá utaamu pɔŋŋu di tìì-u mmɔn,

kaa tí sá utaatanli pɔ́ɔǹtam di mɔ̄ǹ-u,

11 ama ti-Dindaan nyàab̀ bin fàŋkí-u

ní ki máká u-neeŋkpaandi puee ní.

12 Jeerusaleem, nyɔ̄ŋkì ti-Dindaan,

Siiyɔn, pàkà a-Nimbɔtiu.

13 Di sá yii u mɔ̄tìi tīī a-punuubi kpàlkaati mpɔn.

U bīiǹ a-nib bin kóò a-nee pu.

14 Úǹ di tìì a-tiŋki ŋgbansɔŋfi,

ní ki tìì-si bileemɔnti á jī kí díkí.

15 U tin pée lì yii u tūǹ u-marab kitiŋ puee,

u-nyɔɔbundi kpáà sáǹ malaa malaa ki ŋá míǹ^a.

16 U yàntī ntaayim lítí ní ki pīiǹ káŋkaŋ kii gulfee.

U yàntī nnyim kìl̀ ki kíǹ ki dɔ̄ kii ŋfantamee.

17 U yàntī nnyim kìl̀ ki kpántí kii ataŋkpeeyee ní u cáa tòoń.

An nín sɔ̀m̀ puee, ubɔ kpá ki làá ŋmátí.

18 Ama u yaa tīī maree, ní an kɔkɔ ń dùntī,

u yàntī kubuŋu ń fáá ní an kpántí nnyim ki pùub̀.

19 U lēē u-nyɔɔbundi ki dàkā Jaakɔb,

u-bɔkpaaŋi nì tin u sòon̄ ki síiǹee ki dàkā Isirayeel.

20 Waa pée ŋá míǹ ki tīī ditimbundi diba,

ditimbundi diba kaa bí ki nyí tin u sòon̄ ki síiǹee.

Aleeluya, nyɔ̄ŋkìmaan ti-Dindaan!