Ilan 146

Ti-Dindaan di wúǹ biwɔfib pu

146

1 Aleeluya, nyɔ̄ŋkìmaan ti-Dindaan!

M làá nyɔ̄ŋkì ti-Dindaan nì m-naŋki kɔkɔ!

2 M làá nīn nyɔ́ŋkí ti-Dindaan m-maŋfal wiiŋyi kɔkɔ poon,

ŋyunti ŋun ní m bí dimaŋfalinee,

m làá nīn nyɔ́ŋkí m-Nimbɔtiu ní.

3 Ní taa nín̄ máká abɔtibil,

àá unil un kaa cáá mpɔn kí fīīyee pu.

4 Bi yaa kpíì ki fātìi gítì ntaminee,

tin bi nìn bɔ́ntì kí ŋée mun kúntì dee.

5 Un jòońliu sá Jaakɔb Nimbɔtiu

ní udaan máká ti-Dindaan u-Nimbɔtiu puee bí mmɔnneeee!

6 Ti-Dindaan di náań yilpu nì taapu,

nì tiŋku nì tin kɔkɔ bí u-poonee^a.

Úǹ di ŋúb́ ibaamɔn kí nīn cá jaanjaan.

7 U sòoǹ ki ŋáŋkí bin bi sàantée bɔti,

u tìì bin ŋkùm cááyee tijin.

Ti-Dindaan tìì bisarkadambi dibatɔl,

8 ti-Dindaan ŋúbití bijɔfub nimbiliŋ,

ti-Dindaan yáatí bin bōōyee,

ti-Dindaan néeń deedeedambi.

9 Ti-Dindaan wúǹ binikɔkaabi pu,

u tīkintí ditaŋkpiibil nì ukpiipu,

ama u yàntī binikpitib nín bɔ́ntì tiŋyee ŋáań fám.

10 Ti-Dindaan sá ubɔti ní kí nīn cá jaanjaan.

Siiyɔn, u sá a-Nimbɔtiu ní kí nīn cá abin abin.

Aleeluya, nyɔ̄ŋkìmaan ti-Dindaan!