A-beel sá jaanjaan beel ní
145
1 Daafiidi di ŋmàn̄ inyɔŋki laŋŋu nee.M-Nimbɔtiu, m-bɔtiu, m làá yòon̄ a-yindi yilpu,
m làá jāam̀-si kí nīn cáa cá jaanjaan.
2 M làá nīn jáaḿ-si baabadal
ní kí nīn nyɔ́ŋkí a-yindi kí taa gbèen̄.
3 Ti-Dindaan sá ukpaan ní ki máaǹ inyɔŋki,
baa ŋūǹ kí dū u nín sá ukpaan puee kí ŋmàntīǹ tiba.
4 Ŋyunti ŋubɔ poon nib làá sòoǹ a-tuuŋŋi pu
kí nàatī ŋun làá dāá páańee yab,
bi làá māafì a-tuŋkpaaŋŋi ŋin a túńee!
5 M làá sòoǹ kí gíti sòoǹ a-nyooti nín ŋān̄ puee pu,
m làá sòoǹ kí bùsì a-maamaaci tuuŋŋi pu.
6 Bi làá sòoǹ a-pɔŋkpaaŋŋu pu!
Mamee, m làá māafì a-tuŋkpaaŋŋi pu.
7 Bí téetí a-ŋaŋkpaanti pu,
bí nīn gà ilan ki fàal̀ a nín sá deedeedaanee pu.
8 Ti-Dindaan poon mɔ̄ ní ki cáá kulaŋŋaŋfitiiu,
waa gífí diŋuul malaa ní u-neendi wīikí tikpilku.
9 Ti-Dindaan ŋān̄ ki tīī báà ŋma,
u-poon mɔ̄ u-wannaaŋkaati kɔkɔ pu.
10 Ti-Dindaan, a-wannaaŋkaati kɔkɔ ń nyɔ̄ŋkì-si,
bin yú nì si deedeeyee ń jāam̀-si!
11 Bí lì yii a-beel cáá tinyool,
bí sòoǹ a-pɔŋŋu pu!
12 Mimmee bi làá yàntī binib ń béé a-tuŋkpaaŋŋi,
nì a-beel nyooti nín jìl̀ puee.
13 A-beel sá jaanjaan beel ní,
a-pɔŋŋu bí ní ki cá abin abin.
Ti-Dindaan yaa pōoǹ kí ŋá puee, míǹ ní u ŋáań,
u dàkà u-neendi u-tuuŋŋi kɔkɔ poon.
14 Ti-Dindaan di tīkintí bin kɔkɔ cá kí lítée,
úǹ di yáatí bin bōōyee.
15 Bi-kɔkɔ nimbikpeeŋu cɔ́ a-pu nì dimákal,
ní a tìì-bi tijin ŋyunti ŋun an máaǹee.
16 Sii di tàntī a-ŋal
ní ki tìì tin kɔkɔ cáá kufoouee tijin tí jī kí díkí.
17 Ti-Dindaan sá deedeedaan tin u ŋáańee kɔkɔ poon,
u dàkà u-neendi u-tuuŋŋi kɔkɔ poon.
18 Ti-Dindaan pìlīǹ bin kɔkɔ yíì-uee,
bin yíì-u nì mbaamɔnee.
19 Bin fàŋkí-uee yaa là kuŋyee, u ŋáań ki tìì-bi ní,
u pílifí bi-biilii ní ki fìil̄-bi.
20 Ti-Dindaan wúǹ bin kɔkɔ néeń-uee pu,
ama u làá kpɔ̀ kí céetí binikpitib kɔkɔ.
21 M làá gāā ilan kí nyɔ̄ŋkì ti-Dindaan,
tin kɔkɔ cáá kufoouee ń jāam̀ u-circir yindi
kí nīn pée cá jaanjaan.