Ilan 144

Ubɔti wimmeem

144

1 Daafiidi di ŋmàn̄ nlan nee.

M jáaḿ ti-Dindaan, m-taŋkpanaakooku!

U dàkà-mi bi nín jáà kujaau puee,

u bɔ́ntí-mi ki cīití dikɔ̀ndi wiiŋŋu.

2 U sá m-mákal nì m-taŋkpanaakooku,

ki sá m-balilaŋki nì m-fiiliu,

ki sá m-gbampɔɔl, úǹ ní m sáń ki kóò.

Úǹ di dū m-nibooliŋu ki ŋá m-taapu.

3 Ti-Dindaan, unil sá ba ní u-bɔti páb́-si míǹ,

nisaal sá ba ní a dàkafī u-pu míǹ^a?

4 Unil náań nì kubuŋu ní,

ní u-wiiŋyi bí kii mboon nín jītí puee.

5 Ti-Dindaan, kpáb́ kutagbɔŋu kí kpákatiń.

Gbēē ajoon ŋí nīn bíi dùkù.

6 Yàntī utaa ń ŋmɔ́ kí jà a-nannanliibi kí yàaǹ,

tɔ̄ń a-piiŋyi kí jà-bi bí sāǹ.

7 Tàntī a-ŋal doooo yilpu kí fīī-mi.

Fīī-mi kí nyāntí nnyiŋkpaam nee ni,

nì binicambi ŋaan.

8 Bíǹ bin nyɔmmu sòoǹ tinyimɔmbɔti

ní bi yaa yōoǹ bi-ŋaŋgiil ki pūtì bi mɔ́ntée.

9 Unimbɔti, m làá gāā nlampɔɔn kí nyɔ̄ŋkì-si,

m làá bɔ̀ɔ̀ iŋmii saalaa beeku kí tīī-si tinyool.

10 Sii di tìì bibɔtiibi dijajil,

sii di fīī a-tɔntɔnliu Daafiidi kitàataajiki kin kùee cee ki líì.

11 Fīī-mi kí nyāntí binicambi

bin nyɔmmu sòoǹ tinyimɔmbɔti,

ní bi yaa yōoǹ bi-ŋaŋgiil ki pūtì bi mɔ́ntée ŋaan.

12 Yàntī bi-pɔntinee, ti-jipɔmbi ń nīn bí kii

isufi in wíiǹ tiŋanee,

ní ti-bisalib ń nīn bí kii

jaantalkub bin bi kpítì ki dūu nyáantì kubɔtinaakoouee!

13 Yàntī ti-cakalaabi ń gbí,

kí nīn cáá tijin kɔkɔ nì ti-bulifi!

Yàntī ti-piii nì ti-ŋoobui ń bùtī ŋfunyɔm kutuku pu,

ŋfunyɔm kutukub saalaa pu ti-naakpaapɔɔkun!

14 Ti-naai ń nīn bí màlmal!

Ti-tiŋki guŋŋi ń taa bátí kí lítáaa, bí taa cúú-ti kuyuŋuaaa,

kí taa gbìl̄ binib gbáà ibiil ti-mɔŋkijaai pu!

15 Dinibul din cáá tin bí nee kɔkɔee bí mmɔnneeee!

Dinibul din Nimbɔtiu sá ti-Dindaanee bí mmɔnni!