Ti-Dindaan, taa sòoǹ m-bɔti
143
1 Daafiidi di ŋmàn̄ nlan nee.Ti-Dindaan, pīlifì m-wimmeem,
kpòon̄ a-tafal kí pīlifì m-gbaamii.
A nín ŋān̄ ki sá deedeedaan puee, kíí-mi.
2 Taa sòoǹ man a-tɔntɔnliu bɔti,
di sá yii unifoo ubɔ kaa bí ki sá deedeedaan a-nimbiina.
3 M-nannanliu sāaǹ-mi,
u dū-mi ki lúkú kitiŋ ki tàn̄ tàn̄.
U yāntì m kɔ́ dibɔmbɔndin
kii bin kpíì dooooyee.
4 M-wunti yɔ̄tì,
maa ti cáá mpɔn.
5 M téetí iyunti in jítèe pu,
m dàkafī tin kɔkɔ a ŋée pu,
m dàkafī a-tuuŋŋi pu.
6 M yōoǹ m-ŋal ki túĺ-si,
m fèefī ki nyàab̀-si kii kitiŋ nín fèefī ki nyàab̀ utaa puee.
7 Ti-Dindaan, kíí-mi malaa, maa ti cáá ŋfam.
Taa fàtī a-boon kí tīī-mi, an yaa kaa sá mimmee, an dóò m-pu.
8 Yàntī ḿ gbìl̄ a-neeŋkpaandi pu kutaafaau,
di sá yii sii pu ní m máká.
Dàkà-mi nsan ŋun m máaǹ kí nóóyee,
di sá yii sii watil pú ní m fātì m-ba ki túĺ.
9 Ti-Dindaan, fīī-mi kí nyāntí m-nannanliibi ŋaan,
sii ní m sáǹ ki kɔ́.
10 Bīfì-mi ḿ ŋmā kí ŋá tin fáatiǹ-see,
di sá yii sii di sá m-Nimbɔtiu.
A-Fam ŋān̄ ní,
mí kpòotī-mi kí dī kitiŋ kin kaa cáá diganlakalee pu.
11 Ti-Dindaan, a-yindi puee, tīī-mi dimaŋfal.
A-deedeeu puee, nyāntí-mi dinimbinaamandin.
12 A-neeŋkpaandi poonee, a làá kúntí m-nannanliibi,
kí kpɔ̀ bin jáà nì mee kɔkɔ, di sá yii m sá a-tɔntɔnliu ní.