Ilan 141

Ti-Dindaan, ŋúb́ m-nyɔkɔ

141

1 Daafiidi di ŋmàn̄ nlan nee.

Ti-Dindaan, m kúuǹ ki yíiń-si, dāá jòoń-mi malaa,

m yaa yíì-see, á kpòon̄ a-tafal kí pīlifiǹ-mi.

2 Yàntī m-wimmeem ń nīn sá kii talaalu tūukaayee a-nimbiin,

ní m-ŋalii in m yōoǹ yilpuee ń nīn sá kii kujoou saraauee^a.

3 Ti-Dindaan, ŋúb́ m-nyɔkɔ,

nín̄ cí m-nyunculiŋ punyɔkɔ.

4 Taa yàntī tibɔkpitil ń nyānní m-pɔbil poon,

kí taa yàntī ḿ kūtì bikpitiŋaliibi pu kí ŋá atuŋkpiti.

Maa làá dáká bi-jiŋaalib jinti.

5 Dineendi poonee, deedeedaan ŋūǹ kí fáá-mi,

kí dáaĺ m-tafal,

ama m yíì binikpitib ń dàkà-mi dineendi.

Min kamaa bi bíi ŋáań ikpitee, m làá nīn gbíntìi mèé.

6 Bi yaa láa dū bi-kpilib ki lúkú ditaŋkpal puee,

m-nannanliibi làá dāá béé yii tin m nìn sòoǹee sá mbaamɔn.

7 Kii kitiŋ nín fátí ŋwèeń puee,

míǹ ní ditaŋkpiil làá wàan̄ kinyɔkɔ

kí dū bi-kpabiŋ ŋin yàl̄ee kí náĺ.

8 Ti-Dindaan Unimbɔti, m-nimbikpeeŋu cɔ́ a-pu ní,

sii ní m sáǹ ki kɔ́. Taa yàntī ḿ lántí dimaŋfal.

9 Nyāntí-mi kutaliŋŋu kun ní bi píĺ-mee

nì bikpitiŋaliibi laanti poon.

10 Bikpitiŋaliibi talinti làá fàtīí sàl̄-bi,

ama man làá yùkū kí lákatí.