Ilan 140

Ti-Dindaan, fīī-mi kí nyāntí bin dàkà tipɔmbɔtee ŋaan

140

1 Daafiidi di ŋmàn̄ nlan nee ki tīī bilaŋgaaliibi kpiliu.

2 Ti-Dindaan, fīī-mi kí nyāntí binikpitib ŋaan,

wúń m-pu bin dàkà tipɔmbɔtee cee.

3 Bi pée dàkafī kí ŋá tikpitil ŋma ní,

baabadalee, bi jāantí binib ní.

4 Bi-limbiliŋ jītí kii ukoobuee,

ukoowaati looti kā bi-nyɔkɔn^a.

5 Ti-Dindaan, taa yàntī ḿ kɔ́ binikpitib ŋaan.

Bin dàkà tipɔmbɔti,

ki nyàab̀ ḿ lítée ceeyee, wúń m-pu.

6 Bilambidambi píĺ-mi kutaliŋŋu.

Bi dū iŋmii nì kulaaŋŋu ki píĺ-mi nsan caŋin,

bi píĺ-mi kpalaabi.

7 Ama m bí ti-Dindaan yii: «A sá m-Nimbɔtiu!

Ti-Dindaan, kpòon̄ a-tafal kí pīlifì m-gbaamii.

8 Ti-Dindaan Unimbɔti, sii un di sá mpɔn ŋun fìil̄-mee,

dikɔ̀ndi wiiŋŋuee, a bìintí m-yil pu.

9 Ti-Dindaan, taa yàntī binikpitib nee ń ká kun bi nyàab̀ee,

taa yàntī bí ŋmā kí ŋá tin bi bɔ́ntèe,

an yaa kaa sá mimmee, bi làá nīn yòontí bi-ba yilpu.

10 Yàntī bi nín sòon̄ kí ŋá-mi tikpitil tiŋyee

ń fàtīí gítí bíǹ bi-ba yil pu!»

11 Yàntī amɔsiŋkoon ń sìtī bi-pu,

Unimbɔti ń yàntī bí jēetí ŋŋmin,

bí jēetí kuboou kun nyóò, baa ti làá ŋmā kí nyēe poon!

12 Bin cāab̀ bi-jutiibi disambiilee

kaa máaǹ kí kàl̄ kitiŋ nee poon.

Nnaabu ń nīn pée kā

unil un dàkà tipɔmbɔtee pu!

13 M nyí yii ti-Dindaan làá sòoǹ unandaan bɔti kí tīī-u,

u làá sòoǹ kí pɔ̀ ufalaadaan.

14 Tiŋman, deedeedambi làá nyɔ̄ŋkì a-yindi,

binib bin pɔbil bí dibee làá nīn bí a-nimbiin.